ويىن ءبىز ويلاعانداي بولعان جوق – ماگومەد اديەۆ

فۋتبولدان قازاقستان قۇراماسىنىڭ باس جاتتىقتىرۋشىسى ماگومەد اديەۆ وزبەكستان كومانداسىمەن ماتچ تۋرالى پىكىر ءبىلدىردى. ول ەلىمىزدىڭ باس كومانداسىنىڭ ۇتىلۋىنىڭ سەبەبىن ايتتى. بۇل كەزدەسۋ 2:0 ەسەبىمەن الاڭ يەلەرىنىڭ پايداسىنا شەشىلگەن ەدى.

قازاقستان ۇلتتىق قۇراماسىنىڭ باس جاتتىقتىرۋشىسى ءباسپاسوز ءماسليحاتىنا قاتىسىپ، باق وكىلدەرىنىڭ سۇراقتارىنا جاۋاپ بەردى.

— ماگومەد مۇسا ۇلى ويىننان قانداي اسەر الدىڭىز؟

— ويىن جامان بولمادى. بىراق ءبىز ويلاعانداي بولعان جوق. ماتچتا گول سوعۋعا برولاتىن جاقسى مۇمكىندىكتەر بولدى. ەندى ىرىكتەۋ كەزەڭىنە دەيىن ويىندى وزگەرتۋدى قاراستىراتىن بولامىز. ارينە، كەمشىلىكتەر بولىپ تۇرادى. ونسىز بولمايدى. ءوزىمىزدىڭ قاتەلىكتەردەن كەيىن گول جىبەرىپ الدىق. ماعان ەندى باس جاتتىقتىرۋشى رەتىندە سولارمەن جۇمىس ىستەۋ كەرەك. ەكى جاقتا دا گول سوعاتىن ساتتەر بولدى. الايدا الاڭ يەلەرى جەڭىسكە جەتتى. مەن ولاردى قۇتتىقتايمىن.

— كوپشىلىگى باحتيەر زاينۋتدينوۆ پەن ەلدور شومۋرودوۆتىڭ تارتىسىن العاشقى مينۋتتان باستاپ تاماشالاعىسى كەلدى. نەلىكتەن باحتيەر قوسالقى قۇرامدا قالدى؟

— كەشە جاتتىعۋدا ازداپ بۇلشىق ەت جاراقاتى بولدى. فۋتبولشىنىڭ دەنساۋلىعىن ويلادىم. ەشقاشان تاۋەكەلگە بارمايمىن. نەگىزى قۇرامعا شىعارۋ جوسپاردا بولعان. ول رەسەي پرەمەر-ليگاسىندا جەكسەنبى كۇنى ويناپ، كەلەسى كۇنى ۇشىپ كەلدى. سول سەبەپتى، ونىمەن سويلەسىپ، ءبىر تايم وينايدى دەگەن شەشىمگە كەلدىم.

— باۋىرجان يسلامحان ۇزاق ۇزىلىستەن كەيىن الاڭعا قايتا ورالدى. ول ويناعان 20 مينۋتقا قانداي باعا بەرەسىز؟

— يسلامحاننىڭ جاسىل الاڭدا الەۋەتى بار. ول ءالى ناعىز بابىندا ەمەس. الاڭنىڭ قاي جەرىندە وينايتىنىن تۇسىنگىم كەلەدى. ءالى دە جۇمىس ىستەۋ كەرەك. ۇزاق ۇزىلىسكە قاراماستان دوپتى ساقتاپ، ءوتىمدى پاستار بەرە الادى.

— وزبەكستان قۇراماسىنان قاي فۋتبولشى تاڭعالدىردى؟

— ەلدور جوق جەردەن ەكى گول سالدى. كۇتپەگەن جەردەن گول سالاتىن جاقسى قاسيەتى بار. سول سەبەپتى، يتاليادا وينايدى. قيىن سوققىنى قايتارعان قاقپاشىنىڭ ەڭبەگىن دە اتاپ وتكىم كەلەدى. ورتالىق الاڭ مەن قاپتالدا وينايتىن جاقسى فۋتبولشىلار بار ەكەن.

سونداي-اق وزبەكستان مەن قازاقستاننىڭ جولداستىق ماتچى تۋرالى ۇلتتىق قۇرامانىڭ قاقپاشىسى يگور شاتسكي دە پىكىر ءبىلدىردى. ول دا ويىننىڭ جوسپارداعىداي بولماعانىن ايتىپ،  وزبەكستاننىڭ جەكەلەگەن ويىنشىلارىنىڭ شەبەرلىكتەرى كەزدەسۋدىڭ «تاعدىرىن» شەشىپ كەتكەنىن ەسكەرتتى.

ويىن ءبىز جوسپارلاعانداي وتپەدى. جاتتىقتىرۋشىنىڭ ايتقانى دا بولمادى. ءبىرىنشى تايمدى ۋىسىمىزدان شىعارىپ الدىق. ەكىنشىسىندە جيناقى وينادىق. دەگەنمەن قۋىپ جەتۋ قيىن بولدى. وزبەكستان – وتە جاقسى قارسىلاس. ولاردا شومۋرادوۆتىڭ جەكە شەبەرلىگى شەشىپ كەتتى. جانكۇيەرلەر قولداۋى ماڭىزدى. ولار بىزگە قولداۋىن اياعىن جوق. سوندىقتان كەشىرىم سۇراعىم كەلەدى.

ەندى وسىمەن تۇرىپ قالماي، ەۋروعا دايىندالۋ قاجەت. باپكەرلەر شتابى ءبىر قورىتىندىعا كەلەر. قالىپقا كەلىپ، جاڭا ءبىر تاكتيكانى قولدانىپ كورەمىز. جاتتىقتىرۋشىلار شتابى ءبارىن شەشەدى، – دەدى شاتسكي.

ەندى قازاقستان قۇراماسى كەلەسى كەزدەسۋىن 19 قاراشادا ءابۋ-دابي قالاسىندا ءباا-گە قارسى وتكىزەدى.

داستان كەنجالين،

استانا