يراندا تاعى ءبىر فۋتبولشى ءولىم جازاسىنا كەسىلدى

يراننىڭ تەبريز قالاسىنىڭ «تراكتور» كلۋبىنىڭ بۇرىنعى فۋتبولشىسى امير ناسر ازاداني قارسىلىق قوزعالىسىنا قاتىسقانى ءۇشىن ءولىم جازاسىنا كەسىلدى. بۇل تۋرالى ازەربايجاننىڭ Oxy.az حابارلادى.

تەبريز كلۋبىنىڭ ءباسپاسوز حاتشىسى Twitter-دە نارازىلىق اكتسياسىنا قاتىسقانى ءۇشىن 26 جاستاعى جارتىلاي قورعاۋشىنىڭ ومىرىنە قاۋىپ ءتونىپ تۇرعانىن جازدى. يراننىڭ رەۆوليۋتسيالىق سوتى وعان نارازىلىق قوزعالىسىنا قاتىسقان العاشقى 11 بەلسەندىنىڭ قاتارىندا ءولىم جازاسىن بەردى. بۇدان ەكى كۇن الدىن ولاردىڭ ءبىرىنشىسى دارعا اسىلىپ، ۇكىمنىڭ ورىندالۋى باستالىپ كەتتى.

امير ناسر ازاداني سوڭعى رەت فۋتبولشى جەيدەسىن 2021 جىلى «يراندجاۆان» كومانداسى ساپىندا كيدى.

تاعى ءبىر ايتا كەتەتىن نارسە، تەبريز – يرانداعى شىعىس ازەربايجان پروۆينتسياسىنىڭ قالاسى. بۇدان باسقا، بۇل ەلدە باتىس ازەربايجان پروۆينتسياسى ۋرميا قالاسى دا بار. ال امير ناسر ازاداني – ۇلتى ازەربايجان فۋتبولشى. ول وسى ەلدەگى 20-30 ملن شاماسىنداعى ازەربايجان حالقىنىڭ وكىلى.

سەرىك ءپىرنازار،

قىزىلوردا