قازاقستان ۆاتەرپولشىلارى — ازيا چەمپيوناتىنىڭ قولا جۇلدەگەرى!

تايلاندتىڭ بانگكوك قالاسىندا سۋ دوبىنان وتكەن ازيا چەمپيوناتىندا قازاقستان قۇراما كومانداسى ءۇشىنشى ورىن الدى.

وسى چەمپيوناتقا قاجىمۇقان مۇڭايتپاسوۆ اتىنداعى وليمپيادا رەزەرۆىنىڭ رەسپۋبليكالىق ماماندىرىلعان مەكتەپ-ينتەرنات-كوللەدجدىڭ 10 «ۆ» سىنىپ وقۋشىسى ەگور بەلوۋسوۆ تا قاتىسىپ، قازاقستان قۇراما كومانداسىنا قولا جۇلدەنى سىيعا تارتتى.

سپورت ورداسىنىڭ ءباسپاسوز قىزمەتىنىڭ جەتەكشىسى ارداق توعىموۆتىڭ ايتۋىنشا، وسى ەرەن ەڭبەگى ءۇشىن ەگور بەلوۋسوۆقا حالىقارالىق دارەجەدەگى سپورت شەبەرى اتاعى بەرىلدى.

«بۇگىندە 10 «ۆ» سىنىپ وقۋشىسى، جاستار اراسىنداعى قازاقستان چەمپيوناتىنىڭ ەكى دۇركىن كۇمىس جۇلدەگەرى، ەرەسەكتەر اراسىنداعى ەل چەمپيوناتىنىڭ كۇمىس جۇلدەگەرى.

ۇزدىك ويىنشىنى قازاقستان ۇلتتىق قۇراماسىنىڭ جاتتىۇتىرۋشىلارى بايقادى. سودان كەيىن ول ۇلتتىق قۇرامانىڭ وقۋ-جاتتىعۋ جيىنىنا شاقىرىلىپ، ازيا چەمپيوناتىنا قاتىسۋعا جولداما الدى.

ەگور ۇلتتىق قۇرامانىڭ كوشباسشىلارىنىڭ بىرىنە اينالىپ، يران كومانداسىمەن تارتىستى كەزدەسۋدە قولا جۇلدەنى جەڭىپ الۋعا اتسالىستى»، — دەدى ارداق توعىموۆ.

ول قازاقستاننىڭ سۋ دوبى تاريحىنداعى ازيا چەمپيوناتىنىڭ ەڭ جاس جۇلدەگەرى بولىپ تانىلدى. ەگور الەكسەەۆيچ بەلوۋسوۆ 2007 جىلى 26 مامىردا اتىراۋ وبلىسىندا تۋعان. وسىدان ەكى جىل بۇرىن قاجىمۇقان مۇڭايتپاسوۆ اتىنداعى مەكتەپ-ينتەرنات-كوللەدجىنە وقۋعا ءتۇستى.

داستان كەنجالين،

استانا