«نيزكي پوستۋپوك»، «كولحوزنىي ۆاريانت». يليا يلين مەن فەدەراتسيا وكىلى ءتىلشىنىڭ نامىسىنا تيگەن

«حابار 24» تەلەارناسىنىڭ ءتىلشىسى اسلان قاجەنوۆتى بەلگىلى اۋىر اتلەت يليا يلين مەن جەڭىل اتلەتيكا فەدەراتسياسىنىڭ وكىلى كەمسىتە سويلەگەن.

بۇل تۋرالى halyq-uni.kz حابارلادى.

ءتۇرىم كولحوزعا ۇقساپ تۇر ما؟ نەگە ۇنەمى وزگە ۇلت وكىلدەرىنەن وسىنداي بالاعات ەستيمىز؟ ءبىر ەمەس، ەكى ەمەس… انا جولى يليا يلين «نيزكي پوستۋپوك جاسادىڭ» دەپ ەدى، ەندى پاۆەل كۋكين «كولحوزنوي ۆاريانتسىڭ» دەيدى. بۇنىڭ شەگى بار ما ءوزى؟! — دەپ كۇيىندى ارىپتەسىمىز.

ونىڭ ايتۋىنشا، ول جەڭىل اتلەتيكادان استانادا وتكەن ءامين تۇياقوۆ اتىنداعى حالىقارالىق جارىسقا بارعان. سول كەزدە فەدەراتسيا وكىلى «ءامين تۇياقوۆتان سۇحبات جازاسىڭدار ما؟» دەپ سۇراعان. سۇحباتقا كەلىسكەننەن كەيىن تىلشىگە «بىراق كۋرتكاڭدى شەشىپ تاستاشى، كولحوزنىي ۆاريانت» دەپ سالعان.

الدىمەن اتى-ءجونى مەن قىزمەتىن سۇرادىم. ايتپادى. ودان كەيىن «نەگە ولاي ايتاسىز؟ ءسىز مەنى تانىمايسىز دا. سوندىقتان كەشىرىم سۇراڭىز! ماسەلەنى جابامىز. سوسىن سۇحبات الۋعا بارامىز»، — دەپ تۇرىپ الدىم. تسيتاتا. ادەيى ءسىز دەگەن سىپايىلىقتان شىقپادىم جانە قولىمدى الىپ جۇگىرمەدىم. ال ول ەستىمەگەن، ەلەمەگەن بولدى. قىسقاسى، قاتەلىگىن مويىنداپ، ءسوزىن قايتىپ الۋعا ءداتى بارمادى. ىشىندەگى بىردەڭەسى جىبەرمەدى، — دەيدى اسلان قاجەنوۆ.

ودان كەيىن جەڭىل اتلەتيكا فەدەراتسياسىنان ءبىر قىز كەلىپ، الگى ادامنىڭ اتقارۋشى ديرەكتور ەكەنىن جەتكىزگەن. الايدا ونىڭ كەشىرىم سۇراۋىن تالاپ ەتكەن ارىپتەسىمىزدى «قاي كانالدان كەلدىڭ؟ قازىر باستىعىڭا زۆاندايمىن» دەپ قورقىتپاق بولعان.

مەن وسىمەن ەكىنشى رەت ءتىرى ولىككە اينالدىم. بىرەر اي بۇرىن يليا يلين قازاق تىلىندە سۇحبات سۇراعانىم ءۇشىن (وندا دا باسقا ادامنان) «نيزكي پوستۋپوك جاساپ جاتسىڭ» دەپ ەدى. ەندى بۇل جولى تاعى بىرەۋ (اتقارۋشى ديرەكتور) كۋرتكاما قاراپ، «كولحوزنىي ۆاريانت» دەيدى. ەكەۋى دە كەشىرىم سۇرامادى. ەكەۋى دە ءوز مىندەتىن اتقارىپ جۇرگەن قازاق ءجۋرناليسىن بالاعاتتادى. ءتىپتى، سوڭىندا، كەرىسىنشە، ءوزىمدى قورقىتقىسى كەلەدى، — دەپ جازدى ول.

وسى جايتتارعا اشىنعان جۋرناليست الەۋمەتتىك جەلىدە زاڭگەرلەر مەن قۇقىق قورعاۋشىلاردان اقىل-كەڭەس سۇراپ وتىر. فەدەراتسيا وكىلدەرىنىڭ تەلەارنا باسشىلىعىنا حابارلاسىپ، جان-جاقتى قىسىم باستالاتىنىن دا جەتكىزدى. ءتىپتى، جەكە ومىرىنە فيزيكالىق قاۋىپ تونۋىنە الاڭداۋلى.

ەركەعالي بەيسەنوۆ،

استانا