مىرزاعالي ايتجانوۆ باس جاتتىقتىرۋشى بولىپ تاعايىندالدى

بوكستان كسرو جانە ەۋروپا چەمپيونى مىرزاعالي ايتجانوۆ قازاقستان ۇلتتىق قۇراما كومانداسىنىڭ باس جاتتىقتىرۋشىسى بولىپ تاعايىندالدى. بۇل قىزمەتكە ول 3 قاڭتار كۇنى كىرىسىپ كەتتى.

بۇيرىق شىقتى. قازاقستان بوكس فەدەراتسياسى ۇلتتىق قۇراما كوماندانى سەنىپ تاپسىردى. سول سەنىمدى اقتاۋعا تىرىسامىز. جاڭا جىلدىڭ قارساڭىندا باسشىلار باس جاتتىقتىرۋشى بولۋعا ۇسىنىس ايتقان بولاتىن. مەن كەلىسىمىمدى بەرگەنمىن. سودان كەيىن بۇيرىق جاڭا جىل مەرەكەسىنەن كەيىن شىقتى. 3 قاڭتاردان بەرى وقۋ-جاتتىعۋ جيىنىندامىز، –  دەدى مىرزاعالي ايتجانوۆ.

مىرزاعالي قۇلان ۇلى ايتجانوۆ 1970 جىلى 13 قىركۇيەكتە قازىرگى تۇركىستان وبلىسىنا قاراستى سايرام اۋدانىنداعى قاراباستاۋ اۋىلىندا تۋعان. جاستار اراسىندا كەڭەس وداعى كۋبوگىنىڭ كۇمىس جۇلدەگەرى، كسرو جانە ەۋروپا چەمپيونى.

ول ۇلتتىق قۇراماعا 2009-2018 جىلدارى باس جاتتىقتىرۋشى بولدى. سول كەزدەرى ۇلتتىق قۇراما وليمپيا ويىندارىندا  2 التىن، 3 كۇمىس، 2 قولا، الەم چەمپيوناتىندا 5 التىن، 8 كۇمىس، 7 قولا، ازيا ويىندارىندا 8 التىن، 6 كۇمىس، 4 قولا، ازيا چەمپيوناتىندا 15 التىن، 7 كۇمىس، 6 قولا مەدالدى جەڭىپ الدى. سونداي-اق مىرزاعالي ايتجانوۆ الەمنىڭ ەكى مارتە ۇزدىك جاتتىقتىرۋشىسى اتانعان.

سودان كەيىن ۇلتتىق قۇرامانى قايرات ءساتجانوۆ جاتتىقتىردى. ول قۇراما تىزگىنىن بىلتىر توكيو وليمپياداسىنان كەيىن ۇستادى. كوماندانى بەلگرادتا وتكەن الەم چەمپيوناتىنا باستاپ باردى. سەربيادا قازاقستان قۇراماسى 2 التىن جۇلدەنى جەڭىپ الدى. بيىل ۇلتتىق قۇراما اممانداعى ازيا چەمپيوناتىنا دا قاتىستى. ەندى مىنە، ۇلتتىق قۇرامانىڭ تىزگىنىن مىرزاعالي قۇلان ۇلى قايتا ۇستاپ وتىر.

داستان كەنجالين،

استانا