SportPress.kz Qazaqstan sport jańalyqtary
Kútpegen nátıje Taldyqorǵanda tirkeldi. Onda birinshi lıgada oınaıtyn «Jetisý» komandasy ótken jylǵy el chempıony ári kýboktyń ıegeri «Astanany» qabyldap, 2:1 esebimen jeńiske jetti. 10-mınýtta esepti elordalyq Abzal Beısebekov ashqanymen, kezdesý sońyna taman alań ıeleri ábjildik kórsetti. 75-mınýtta Oleg Hromov tarazy basyn teńestirse, 87-mınýtta Alekseı Shakın jeńis golyn soqty. Sóıtip qazaqstandyq maman Dmıtrıı Ogaıdyń shákirtteri eshkimnen de qaımyqpaıtyndyqtaryn tanytty. Degenmen bul matchta bolgarııalyq maman Stanımır Stoılov «Astananyń» qosalqy quramynda otyrǵandardy alańǵa shyǵardy. Oıyndar ár úsh-tórt kún saıyn ótetindikten, negizgi quramdy tynyqtyryp alýdy oılaǵandyqtan shyǵar, dál sondaı tásildi Oralda «Aqjaıyqtyń» bapkeri Vahıd Masýdov ta qoldandy.
«Aqjaıyq» pen «Aqtóbe» komandalary 120 mınýt boıy ańdysqanymen, birde-bir gol soǵa almady. 11 metrlik básekede oraldyqtardan Rýslan Valıýllın múlt ketip, aqtóbelikter 5:4 esebimen utyp, kelesi kezeńge joldama aldy.
Astanalyqtardyń jolyn «qýmaǵan» «Atyraý» men «Oqjetpes» komandalary Ońtústik Qazaqstanǵa baryp, birinshi lıga klýbtarynan sheberligin asyrdy.
Atyraýlyqtar Shymkentte «Qyrannan» 2:1 esebimen basym tústi. Munda alań ıelerinen Aıdar Jaqsybek esep ashqanymen, «Atyraýdan» Novıa Maksımovıch pen Dáýren Qaırallıev eki doppen jaýap qaıyrdy.
Al «Oqjetpes» Atakentte ótken oıynda «Maqtaaraldy» 4:1 esebimen oısyrata utty. Aleksandr Marochkın, Maksım Fedın, Igor Iýrın jáne Danııl Chertov soqqan golǵa «Maqtaaraldan» Elmar Nábıev bir ǵana doppen «ún qatty».
Esesine Ońtústik Qazaqstannyń bas komandasy «Ordabasy» Petropavlda birinshi lıganyń taǵy bir ókili «Qyzyljarmen» ótken kezdesýde jerge qaraǵan joq. Gogıta Gogýa soqqan jalǵyz gol shymkenttikterge jeńis áperdi.
Jýyrda Qaraǵandy oblysynyń ákimimen kezdesip, qatty synǵa ushyrap, sógis alǵan «Shahter» klýbynyń basshylyǵy sodan qorytyndy shyǵarǵan bolýy kerek. Premer-lıgada kósh sońynda kele jatqan kenshiler Qostanaıda «Tobyldy» 2:1 esebimen tize búktirdi. Aldymen «Shahterden» Iýlıýs Szoke men Aıdos Táttibaev mergendik tanytsa, «Tobyldan» Toqtar Jańǵylyshbaı ǵana kózge túse aldy.
Bıylǵy sýperkýbok ıeleri Almatynyń «Qaıraty» óz alańynda «Tarazdy» qabyldap, 2:0 esebimen basymdylyq tanytty. Bul oıynda Andreı Arshavınnen pas alǵan Georgıı Jýkov «Qaırattyń» sapyndaǵy alǵashqy golyn soqty. Sodan keıin Ivo Ilıchevıch 11 metrlik penaltıden múlt ketken joq.
Oraldaǵy kezdesý sııaqty, Pavlodarda «Ertis» pen Qyzylordanyń «Qaısary» qosymsha eki taım oınaýǵa májbúr boldy. Negizgi ýaqytta alań ıelerinen Ismael Fofana men Frank Dja Djedje qarsylastyń qaqpasyna bir-birden gol engizse, «Qaısardan» Dýman Narzıldaev pen Eljas Altynbekov óz múmkindikterin múlt jibergen joq. Qosymsha ýaqytta Rodrıgonyń arqasynda «Ertis» 3:2 esebimen «Qaısardyń» meselin qaıyrdy.
Sóıtip Qazaqstan kýbogy úshin shırek fınalda «Aqtóbe», «Atyraý», «Oqjetpes», «Shahter», «Ordabasy», «Qaırat», «Ertis» jáne birinshi lıganyń jalǵyz ókili «Jetisý» oınaıtyn bolady.
http://www.inform.kz/kz/futbol-astana-kazakstan-kubogy-zholyndagy-zharystan-shygyp-kaldy_a3018798
