يراندا جانكۇيەرلەر «زەنيتپەن» ويىن كەزىندە ۋكرايناعا قولداۋ كورسەتتى (ۆيدەو)

يراندا سانكت-پەتەربۋرگتىڭ «زەنيت» فۋتبول كومانداسىنىڭ ويىنى كەزىندە جەرگىلىكتى جانكۇيەرلەر ۋكراينانى قولدايتىن پەرفومانس ۇيىمداستىردى. بۇل تۋرالى Twitter-دەگى Iran International English پاراقشاسىندا حابارلاندى.

يران جانكۇيەرلەرى ءوز كوماندالارى سانكت-پەتەربۋرگتىڭ «زەنيت» كلۋبىمەن وتكىزگەن جولداستىق كەزدەسۋدە ۋكراينانى قولدايتىندارىن كورسەتتى، – دەلىنگەن حابارلامادا.

بۇل كۇنى نەۆا جاعالاۋىنان كەلگەن كلۋب تەگەراننىڭ «سەپاحان» كومانداسىمەن كۇش سىناستى. قازىر ەكى كوماندا دا ءوز چەمپيوناتتارىندا كوش باستاپ كەلەدى.

جالپى، رەسەيدىڭ ۋكرايناعا اشقان باسقىنشىلىق سوعىسىنا بايلانىستى وقشاۋلاۋعا ءتۇسىپ قالعان رەسەيلىك فۋتبول كلۋبتارى ەندى جالعاسقالى تۇرعان چەمپيوناتتارىنا دايىندىق شەڭبەرىندە ءارتۇرلى «ەكزوتيكالىق» جەرلەر تاۋىپ الۋعا ءماجبۇر بولىپ ءجۇر. ولارمەن كوپتەگەن ەلدەردىڭ كوماندالارى بايلانىسقىلارى كەلمەيتىنى بەلگىلى.

رەسەي فەدەراتسياسىنىڭ قازىرگى ارەكەتتەرىنە نارازىلار پارسى ەلىندە دە از ەمەس ەكەن. يران فۋتبول فاناتتارى، ءوز ەلدەرى ۇكىمەتىنىڭ ماسكەۋمەن دوستىق قارىم-قاتىناستى ۇزبەي جالعاستىرىپ كەلە جاتقانىنا قاراماستان، ۋكراينانى قولدايتىندارىن ماتچ باستالعاننان انىق بايقاتتى. ولار ويىن كەزىندە تريبۋنالارعا ۋكراينا جالاۋلارىن جايىپ ۇستاپ تۇردى. بۇعان قوسا، ءوز ەلىن باسقىنشى جاۋدان قورعاپ جاتقان ۋكراينداردى قولدايتىن ۇراندار ايتتى.

ماتچ بارىسىندا «سەپاحان» كومانداسىنىڭ فۋتبولشىلارى دا قوناقتارعا جىلى شىراي تانىتا قويمادى. ولار ءار تايمدا پەتەربۋرگتىكتەر قاقپاسىنا ءبىر دوپتان سالىپ، قورىتىندىدا 2:0 ەسەبىمەن جەڭىسكە جەتتى.

تاعى ءبىر ايتا كەتەتىن جايت، «زەنيت» قۇرامىنداعى قازاقستاندىق فۋتبولشى نۇرالى ءالىپ كەزدەسۋدىڭ ەكىنشى تايمىندا الاڭعا شىقتى.

داستان كەنجالين،

استانا

During a friendly football match between Iran’s Sepahan FC and Russia’s @fczenit_en held in the city of Isfahan، a group of Iranian fans waved the Ukrainian flag in support for the people of Ukraine. pic.twitter.com/9zKQddzJXU

— Iran International English (@IranIntl_En) February 17، 2023