Iranda jankúıerler «Zenıtpen» oıyn kezinde Ýkraınaǵa qoldaý kórsetti (VIDEO)

Iranda Sankt-Peterbýrgtiń «Zenıt» fýtbol komandasynyń oıyny kezinde jergilikti jankúıerler Ýkraınany qoldaıtyn perfomans uıymdastyrdy. Bul týraly Twitter-degi Iran International English paraqshasynda habarlandy.

Iran jankúıerleri óz komandalary Sankt-Peterbýrgtiń «Zenıt» klýbymen ótkizgen joldastyq kezdesýde Ýkraınany qoldaıtyndaryn kórsetti, – delingen habarlamada.

Bul kúni Neva jaǵalaýynan kelgen klýb Tegerannyń «Sepahan» komandasymen kúsh synasty. Qazir eki komanda da óz chempıonattarynda kósh bastap keledi.

Jalpy, Reseıdiń Ýkraınaǵa ashqan basqynshylyq soǵysyna baılanysty oqshaýlaýǵa túsip qalǵan reseılik fýtbol klýbtary endi jalǵasqaly turǵan chempıonattaryna daıyndyq sheńberinde ártúrli «ekzotıkalyq» jerler taýyp alýǵa májbúr bolyp júr. Olarmen kóptegen elderdiń komandalary baılanysqylary kelmeıtini belgili.

Reseı Federaııasynyń qazirgi áreketterine narazylar parsy elinde de az emes eken. Iran fýtbol fanattary, óz elderi Úkimetiniń Máskeýmen dostyq qarym-qatynasty úzbeı jalǵastyryp kele jatqanyna qaramastan, Ýkraınany qoldaıtyndaryn match bastalǵannan anyq baıqatty. Olar oıyn kezinde trıbýnalarǵa Ýkraına jalaýlaryn jaıyp ustap turdy. Buǵan qosa, óz elin basqynshy jaýdan qorǵap jatqan ýkraındardy qoldaıtyn urandar aıtty.

Match barysynda «Sepahan» komandasynyń fýtbolshylary da qonaqtarǵa jyly shyraı tanyta qoımady. Olar ár taımda peterbýrgtikter qaqpasyna bir doptan salyp, qorytyndyda 2:0 esebimen jeńiske jetti.

Taǵy bir aıta ketetin jaıt, «Zenıt» quramyndaǵy qazaqstandyq fýtbolshy Nuraly Álip kezdesýdiń ekinshi taımynda alańǵa shyqty.

Dastan KENJALIN,

ASTANA

During a friendly football match between Iran’s Sepahan FC and Russia’s @fczenit_en held in the city of Isfahan, a group of Iranian fans waved the Ukrainian flag in support for the people of Ukraine. pic.twitter.com/9zKQddzJXU

— Iran International English (@IranIntl_En) February 17, 2023