ستراندجا كۋبوگى: قازاقستاننىڭ ەكى بوكسشىسى جارتىلاي فينالعا شىقتى (ۆيدەو)

ستراندجا كۋبوگى ءۇشىن حالىقارالىق تۋرنيردە شيرەك فينالدىق شايقاستار بولىپ، ەلىمىزدىڭ ەكى بوكسشىسى جارتىلاي فينالعا شىقتى.

قازاقستان قۇراماسىنان شيرەك فينالعا دەيىن ءۇش سپورتشى جەتكەن بولسا، سولاردىڭ ۇشەۋى دە وزبەك بوكسشىلارىمەن قولعاپ ءتۇيىستىردى. وسى ىشكى تارتىستا قازاقستاندىقتار 2:1 ەسەبىمەن جەڭىسكە جەتتى.

رينگكە ءبىرىنشى بولىپ 57 كەلىگە دەيىنگى سالماقتاعى ورازبەك اسىلقۇلوۆ شىقتى. ول ازيانىڭ سوڭعى چەمپيوناتىنداعى التىن جۇلدەگەرى ابدۋماليك حالوكوۆپەن جۇدىرىق سىلتەستى.

حالوكوۆ وزبەكستاننىڭ تيتۋلى كوپ بەلگىلى بوكسشىلارىنىڭ ءبىرى ەدى. ول 2018 جىلى جاستار اراسىندا الەم چەمپيونى اتانعان. سول جىلى وتكەن جاسوسپىرىمدەر وليمپيالىق ويىندارىنىڭ چەمپيونى، ال 2022 جىلى امماندا ەرەسەكتەر اراسىندا چەمپيون بولعان. ونىڭ ەسەبىندە سونداي-اق 2021 جىلعى الەم چەمپيوناتىنىڭ كۇمىس مەدالى، ازيا چەمپيوناتىنىڭ سول جىلعى قولا مەدالىن يەلەنگەن.

ال مۇنداي اتاقتارى جوق اسىلقۇلوۆ ءبىزدىڭ قۇرامانىڭ وزىندە ەكىنشى نومەرلى بوكسشى بولىپ سانالادى.

سوعان قاراماستان، كەزدەسۋ وتە تارتىستى ءوتتى. ەكى سپورتشى دا ايانىپ قالعان جوق. مۇندا ءبارىبىر ورازبەكتىڭ ارتىقشىلىعى بايقالىپ تۇردى. ناتيجەسىندە ول تورەشىلەردىڭ شەشىمىمەن 4:1 ەسەبىمەن سەنساتسيالىق جەڭىسكە جەتتى.

ودان كەيىن 75 كەلىگە دەيىنگى سالماقتاعى نۇرقانات رايىس پەن الوحون ابدۋللاەۆتىڭ جەكپە-جەگى بولدى. وندا وتانداسىمىز قارسىلاسىن 4:1 ەسەبىمەن ۇتتى. الايدا ول ءۇشىنشى راۋندتا ەكى رەت نوكداۋنعا ءتۇسىپ قالدى. قۋانىشتىسى، ولار قورىتىندى ناتيجەنى وزگەرتە المادى.

وسى كۇنى قازاقستان قۇراماسىنان 80 كەلىگە دەيىنگى سالماقتاعى بەكزات نۇرداۋلەتوۆ جەڭىلىپ قالدى. ونىڭ جاسۋربەك يۋلداشەۆپەن كەزدەسۋى اسا تارتىستى ءوتتى. دەگەنمەن، ءسال ارتىقشىلىقپەن (3:2) جەڭىس وزبەك بوكسشىسىنىڭ قانجىعاسىندا كەتتى.

وسىمەن ورازبەك اسىلقۇلوۆ پەن نۇرقانات رايىس كەمىندە قولا مەدال الاتىن بولدى.

داستان كەنجالين،

استانا