ءجاميلا باقبەرگەنوۆا – ءۇش دۇركىن ازيا چەمپيونى! (ۆيدەو)

استانا قالاسىندا ايەلدەر كۇرەسىنەن ءوتىپ جاتقان ازيا چەمپيوناتىنىڭ ەكىنشى كۇنى 72 كگ سالماقتا بوزكىلەمگە شىققان ءجاميلا باقبەرگەنوۆا التىن جۇلدەنى جەڭىپ الدى. ول وسىمەن ءۇشىنشى رەت ءار جىلدارى (2020، 2022) وتكەن ازيا چەمپيوناتىنىڭ قۇرمەت تۇعىرىنىڭ ەڭ بيىك ساتىسىنا كوتەرىلدى. ياعني، قۇرلىقتىڭ  ۇش دۇركىن چەمپيونى اتاندى. سونىمەن بىرگە ول الەم چەمپيوناتىنىڭ ەكى دۇركىن كۇمىس جۇلدەگەرى.

ءجاميلا باقبەرگەنوۆانىڭ فينالداعى قارسىلاسى جاپونيانىڭ بالۋان قىزى سۋميرە نيكۋرانى 5:1 ەسەبىمەن ۇتتى.

وسىلايشا، ءجاميلا باقبەرگەنوۆا ايەلدەر قۇراماسىنا ەكىنشى التىن مەدالدى سىيلادى.

كەشە ەلميرا سىزدىقوۆا جەڭىس تۇعىرىنا كوتەرىلگەن ەدى.  سونىمەن بىرگە بيىلعى ازيا چەمپيوناتىندا مارينا سەدنەۆا (55 كەلىگە دەيىن)، نيليفۋر رايموۆا (57 كەلىگە دەيىن) مەن ەلەنا شالىگينا (68 كەلىگە دەيىن) قولا جۇلدەنى يەلەندى. جالپى، قازاقستاننىڭ بالۋان قىزدارى 5 جۇلدەگە يە بولدى.

بالۋان قىزداردىڭ بەس مەدالى قۇراما كوماندانى جالپىكوماندالىق ەسەپتە ءۇشىنشى ورىن الۋعا مۇمكىندىك بەردى. ءبىرىنشى جانە ەكىنشى ورىنداردا جاپونيا مەن قىتاي وكىلدەرى تۇر.

13 ساۋىردە بوزكىلەمگە ەركىن كۇرەستىڭ بالۋاندارى شىعادى.

بۇعان دەيىن حابارلاعانىمىزداي، ۇلتتىق قۇرامانىڭ مۇشەسى گۇلمارال ەركەباەۆا ازيا چەمپيوناتىندا قىزدارىمىز كەم دەگەندە ەكى التىن مەدالدى جەڭىپ الاتىنىن ايتقان ەدى.

ازيا چەمپيوناتىندا ءبىزدىڭ قىزدارىمىز التىن، كۇمىس، قولا جۇلدەنى دە العان. سوندىقتان ارقايسىنىڭ مۇمكىندىكتەرى بار. بولجامىم بويىنشا، كەمىندە 2 التىن مەدال الامىز دەپ ويلايمىن. كىمدەر ەكەنىن ايتپاي-اق قويايىن، – دەگەن ەدى بالۋان قىز.

ەلميرا سىزدىقوۆا مەن ءجاميلا باقبەرگەنوۆانىڭ جەڭىستەرىنە قاراپ، ونىڭ بولجامىنىڭ ءدال كەلگەنىن ايتۋعا بولادى.

داستان كەنجالين،

استانا

 

View this post on Instagram

 

A post shared by سپورتتى دامىتۋ ديرەكتسياسى (@drs_kz)