ماڭعىستاۋلىق سپورتشىلار پارا ۇستەل تەننيسىنەن 1 التىن، 1 كۇمىس جانە 2 قولا مەدال الدى

7-12 ءساۋىر ارالىعىندا پاۆلودار قالاسىنداعى «جەڭىمپاز» سپورت كەشەنىندە پارا ۇستەل تەننيسىنەن تىرەك-قيمىل اپپاراتى زاقىمداعان جاستار اراسىندا قازاقستان چەمپيوناتى ءوتتى.

وعان استانا، الماتى قالاسى مەن اتىراۋ، جەتىسۋ، ماڭعىستاۋ، اقتوبە، قوستاناي، پاۆلودار، قاراعاندى، تۇركىستان، قىزىلوردا وبلىسىنان ون ءبىر كوماندا قاتىسىپ، 100-دەن استام سپورتشى باق سىناپ، ۇزدىكتەر انىقتالدى.

ەل چەمپيوناتىنا ماڭعىستاۋلىق ءۇش سپورتشى قاتىسىپ، جۇلدە الدى.

جەكەلەي جۇيەدە:

1 ورىن — دينارا تىنىمباي;

3 ورىن — مايرا ساليەۆا.

جۇپتىق جۇيەدە:

3 ورىن — ءسابيت ورازباەۆ (ماڭعىستاۋ وبل.) پەن انتون كاماروۆ (پاۆلودار وبل.);

ارالاس جۇپتىق جۇيەدە:

2 ورىن — دينارا تىنىمباي (ماڭعىستاۋ وبل.) مەن انتون كاماروۆ (پاۆلودار وبل.).

جارىسقا دايىنداعان ماڭعىستاۋ وبلىسىنىڭ پارا ۇستەل تەننيسىنەن اعا جاتتىقتىرۋشىسى ناۋرىزبەك باقتىعۇل بىلاي دەدى:

— پاۆلودار قالاسىندا وتكەن تىرەك-قيمىل اپپاراتى زاقىمداعان جاستار اراسىندا قازاقستان چەمپيوناتى جاقسى دەڭگەيدە وتكىزىلدى. جارىستا ۇستەل تەننيسى ستولدارمەن جابدىقتالعان ارنايى سپورت كەشەنىندە بولدى. جارىستا ەشقانداي كەمشىلىك بولعان جوق. ينۆاليدتەر اراسىندا جارىس كلاسقا بولىنەدى.

ءبىرىنشى كلاستان بەسىنشى كلاسقا دەيىن اربادا وتىرىپ وينايتىن سپورتشىلار بولدى جانە التىنشى كلاستان ونىنشى كلاسقا دەيىن تۇرىپ وينايتىن بولىپ بولىنەدى. بىزدە اتالعان كلاستار بويىنشا بەسىنشى كلاستا ونەر كورسەتكەن دينارا تىنىمباي چەمپيون اتاندى. ءۇشىنشى كلاستا ونەر كورسەتكەن مايرا ساليەۆا قولا مەدال الدى.

ونىنشى كلاستا ويناعان ءسابيت ورازباەۆ اقتوبەلىك ماعجان مۋساەۆپەن جۇپتىق سىندا بىرگە جۇپ بولىپ ويناپ ءۇشىنشى ورىن الدى. تاعى دا دينارا تىنىمباي جارىس يەسى انتون كاماروۆ ەكەۋى بىرىگىپ ارالاس جۇپ بولىپ ەكىنشى ورىن الدى. جالپى شاكىرتتەرىمنەن ءۇمىت كوپ. دەمەۋشىلەر دەمەپ وبلىس اكىمدىگىمەن سپورت باسقارماسى باسشىلارىنان قولداۋلار بولسا دەيمىن. جالپى، مۇنايلى اۋدانىنا جاتتىعۋ زالدارىن اشىپ، بارلىق قۇرال جابدىقتارىن الىپ بەرسە ەكەن. اۋداندا ۇيىندە وتىرعان مۇمكىندىگى شەكتەۋلى جاندار وتە كوپ. مۇنايلىدان زال اشىپ بەرسە دەيمىن. بۇيىرسا، اشىلىپ جاتسا مۇنايلىنىڭ سپورتشىلارى قازاقستان مەن الەمدىك ارەنالاردا قازاقتىڭ كوك تۋىن جەلبىرەتەتىنە سپورتشىلار شىعارۋعا مۇمكىندىكتەر جاساپ بەرسە، چەمپيوندار شىعاتىنىنا كامىل سەنەمىن.

ايبەك مۇحانوۆ،

قازاقستان جۋرناليستەر وداعىنىڭ مۇشەسى.

ماڭعىستاۋ وبلىسى، اقتاۋ قالاسى.