الماتى وبلىسىندا ۇشقىر بايگەدەن QAZAQ WORLD CUP ءتۋرنيرى باستالادى

1 مامىر – قازاقستان حالىقتارىنىڭ بىرلىگى كۇنى مەرەكەسىنە وراي، الماتى وبلىسىنىڭ تالعار اۋدانىنداعى قوبلاندى باتىر اتىنداعى يپپودرومدا مادەنيەت جانە سپورت مينيسترلىگى مەن اقپارات جانە قوعامدىق دامۋ مينيسترلىگىنىڭ قولداۋىمەن ۇشقىر بايگەدەن Qazaq World Cup ءتۋرنيرى وتەدى.

جۇلدە قورى – 17 700 000 تەڭگە بولاتىن جارىستى ۇلتتىق سپورت قاۋىمداستىعى، الماتى وبلىسىنىڭ اكىمدىگى، رەسپۋبليكالىق «بايگە» فەدەراتسياسى، «قازاق جوكەي كلۋبى» قوعامدىق ۇيىمى مەن «Bayserke Agro» حولدينگى ۇيىمداستىرىپ وتىر.

ءتۋرنيردىڭ اشىلۋىنا الماتى وبلىسىنىڭ اكىمى مارات سۇلتانعازيەۆ، ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ، «قازاق جوكەي كلۋبى» قوعامدىق ۇيىمىنىڭ توراعاسى ماقسات احاەۆ ارنايى قاتىسادى.

قازاق «جىلقى – مالدىڭ پاتشاسى» دەپ اتقا بۇرىننان ەرەكشە قۇرمەتپەن قارايدى. كوشپەندى ءومىر سالتىنداعى بابالارىمىز ءۇشىن جىلقى ۇزاق جولداعى سەرىگى دە، جاۋعا شاپقانداعى ماڭىزدى قارۋى دا بولعان. تەك كولىك ءتۇرى رەتىندە قولدانىپ قانا قويماي، جىلقىنى ەرەكشە قاسيەتكە يە دەپ سەنگەن. ءتىپتى قازاقتى «جىلقىمىنەزدى» دەپ اتاۋ دا ءبىر ماقتاۋدىڭ ءتۇرى ەدى. سوندىقتان ءبىز ءۇشىن ءوز وبلىسىمىزدا ات سپورتىنان سايىس وتكىزۋ – ۇلكەن مارتەبە.

وسىلاي ەل نامىسىن اسقاقتاتىن مۇنداي اۋقىمدى جارىس – الماتى وبلىسى ءۇشىن ابىرويلى جوبا. ءبىز حالقىمىزعا جاقىن، قانىمىزدا بار ات سپورتىنىڭ دامۋىنا جانە ناسيحاتتالۋىنا ءوز ۇلەسىمىزدى قوسۋعا قاشان دا دايىنبىز، — دەدى مارات ەلەۋسىز ۇلى.

سونداي-اق ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ جارىستىڭ ماڭىزدىلىعىنا توقتالدى.

جالپى، ات بايگەسىنىڭ قازاق دالاسىندا ەرتەدەن جالعاسىپ كەلە جاتقان ۇلتتىق سپورت تۇرلەرىنىڭ ءبىرى ەكەنى بارشامىزعا بەلگىلى. بۇگىندە بايگە سپورتى قاناتىن كەڭگە جايىپ، بۇقارالىق سيپاتقا يە بولىپ وتىر. ۇلتتىق سپورتىمىزدىڭ دامۋى، الەمگە ناسيحاتتالۋى – مەملەكەت باسشىسى قاسىم-جومارت توقاەۆتىڭ ءجىتى نازارىندا. اتبەگىلىك – اتادان قالعان كاسىپ ءارى ونەر. قازىر جاستارىمىزدىڭ اراسىندا تاي جاراتىپ، جىلقى باپتاۋعا دەن قويعاندار قاتارى كوبەيىپ جاتقانىنا ءوز باسىم وتە قۋانىشتىمىن!

بايگەسۇيەر قاۋىمعا قۋانىشتى جاڭالىعىمدى جەتكىزۋگە رۇقسات ەتىڭىزدەر. ءبىز ەندى وسىناۋ ۇشقىر بايگەنىڭ جارىستارىن ءار 2 اپتا سايىن وتكىزەتىن بولامىز. وسىنداي دودالار ارقىلى ءبىز الەمدىك ارەنالارعا شىعاتىنىمىزعا سەنىمدىمىن! – دەدى يسلامبەك سالجانوۆ.

سونىمەن بۇل جارىستىڭ جەڭىمپازدارىنان بولەك، كورەرمەندەر اراسىندا جالپى جۇلدە قورى 2 ميلليون تەڭگەگە جۋىق بولاتىن «ەڭ ۇزدىك ۇلتتىق كيىم»، ارقان تارتۋ، قىز قۋ، اسىق اتۋ، قوشقار كوتەرۋ سىندى ويىنداردان سايىستار ءوتىپ، سوڭى ەلىمىزگە تانىمال انشىلەردىڭ قاتىسۋىمەن كونتسەرتتىك باعدارلاماعا ۇلاسادى.

ەركەعالي بەيسەنوۆ،

استانا