زۋەۆ – ورتاڭقول ويىنشى. قازاقستانعا كەتسە، بارا بەرسىن. ودان ەشتەڭەمىز كەتپەيدى – موستوۆوي

رەسەي جاسوسپىرىمدەر قۇراماسىنىڭ بۇرىنعى ويىنشىسى، «كرىليا سوۆەتوۆ» كلۋبىنىڭ جارتىلاي قورعاۋشىسى الەكساندر زۋەۆ قازاقستان ازاماتتىعىن الدى.

جاقىندا ول ۇلتتىق قۇراما كومانداعا شاقىرىلدى. ول جاراقاتىننا ءالى ايىقپاعان اسلانبەك داراباەۆتى الماستىرادى. ەلىمىزدىڭ باس كومانداسىنىڭ باس جاتتىقتىرۋشىسى ماگومەد اديەۆتىڭ ايتۋىنشا، قازىر ءبىر عانا زۋەۆ ەمەس، رەسەيدىڭ كوپتەگەن فۋتبولشىلارى قازاقستاننىڭ ازاماتتىعىن الىپ، ۇلتتىق قۇرامادا ويناعىسى كەلىپ ءجۇر.

ءبىز ءار نارسەنى ۇلتتىق قۇرامانىڭ ويىنشىلارىمەن اقىلداسىپ شەشەمىز. بىراق سوڭعى ءسوزدى مەن ايتامىن. باس جاتتىقتىرۋشى بولعان سوڭ، شەشىمدى ءوزىم قابىلدايمىن. ءبىزدىڭ كيىم اۋىستىراتىن بولمەمىزدە ويىنشىلارمەن جاقسى تۇسىنىستىك قالىپتاسقان. سوندىقتان جاقسى اتموسفەرانىڭ، جاقسى اۋرانىڭ شىرقىن بۇزعىم كەلمەيدى. ال ازىرشە زۋەۆ قانا قازاقستان ازاماتتىعىن الدى، –  دەدى اديەۆ.

ال الەكساندر زۋەۆكە كەلسەك، ول 1996 جىلى قوستانايدا تۋعان. بالا كەزىندە «توبىل» كلۋبىنىڭ بالالار مەكتەبىندە جاتتىققان. كەيىن رەسەيگە كوشىپ كەتكەن. 2013 جىلى 17 جاسقا دەيىنگى فۋتبولشىلار اراسىندا وتكەن ەۋروپا چەمپيوناتىن جەڭىپ العان. 2016 – 2017 جىلدارداعى فۋتبول ماۋسىمىندا ماسكەۋدىڭ «سپارتاك» جاساعىنىڭ قۇرامىندا رەسەي چەمپيونى اتانعان. سودان كەيىن «رۋبين» (قازان)، «روستوۆ» (روستوۆ نا دونۋ)، ماسكەۋدىڭ تۇبىندەگى حيمكي قالاسىنىڭ «حيمكي» كلۋبى مەن «كرىليا سوۆەتوۆ» (سامارا) كوماندالارىندا ويناعان.

مىنە، مەن قازاقستان ازاماتتىعىن الدىم. ونى الۋ وڭاي بولعان جوق. كوك پاسپورتتىڭ سوڭىنان ۇزاق ءجۇردىم. مەن تۋعان ەلىمنىڭ ازاماتى بولعانىما قۋانىشتىمىن. قازاقستان مەنىڭ وتانىم عانا ەمەس، بۇل جەردە مەنىڭ بال داۋرەن بالالىق شاعىم ءوتتى. بالا كەزىمدە فۋتبولدى قوستانايدىڭ «توبىل» كلۋبىنان باستادىم. بۇل الاڭسىز بالالىق شاق ەدى، شىركىن! بالالىق شاعىم  باقىتتى كەزىم دەۋگە بولادى.

قازاقستاندا مەنىڭ تۋىستارىم مەن تانىستارىم كوپ. رەسەيدە تۇرعاندا قازاقستانعا كوپ كەلىپ جۇرەتىنمىن. سول كەزدە وتباسىممەن قازاقتىڭ مەيرامدارىن تويلايتىنبىز. سوندىقتان مەنىڭ قازاقستانمەن بايلانىسىم ەشقاشان ۇزىلگەن ەمەس. ەندى مەن ەكى ەسە باقىتتىمىن. ويتكەنى، ۇلتتىق قۇراماعا شاقىرتۋ الدىم. بۇل مەنىڭ ماقساتىم ەدى، — دەدى ول.

ونىڭ ايتۋىنشا، ەندى ۇلتتىق قۇرامانىڭ جاتتىقتىرۋشىلار شتابىمەن جەكە سويلەسىپ، ويىنشىلارمەن تانىسىپ الۋ كەرەك. سودان كەيىن عانا ويىنعا كىرىسەمىن، دەيدى ول.

رەسەيدىڭ فۋتبول ماماندارى زۋەۆتىڭ ەلىمىزدىڭ ازاماتتىعىن العانى جونىندە پىكىر بىلدىرۋگە دە ۇلگەرىپتى. مىسالى، رەسەي ۇلتتىق قۇراماسى مەن ماسكەۋدىڭ «سپارتاك» كلۋبىنىڭ بۇرىنعى ويىنشىسى الەكساندر موستوۆوي: «زۋەۆ قازاقستانعا كەتسە، بارا بەرسىن. ودان ەشتەڭەمىز كەتپەيدى. زۋەۆ — ورتاڭقول فۋتبولشى. ونى «سپارتاكتىڭ» جانكۇيەرلەرى عانا بىلەدى. باسقا ەشكىم بىلمەيدى»، دەگەن ەكەن.

سونداي-اق، ول قازىر رەسەي فۋتبولى يزولياتسيادا بولعان سوڭ، فۋتبولشىلاردىڭ باسقا ەلدەردىڭ ازاماتتىعىن الىپ جاتقانى قالىپتى نارسە ەكەنىن ايتتى.

بۇل قالىپتى نارسە. بۇكىل الەمدە سپورتشىلار ازاماتتىعىن اۋىستىرىپ، حالىقارالىق ارەناعا شىققىسى كەلەدى. مىسالى، فرانتسيانىڭ ۇلتتىق قۇراماسىنا قوسىلا الماعان ويىنشىلار الجير نەمەسە ماروككونىڭ كومانداسىنا بارىپ ءجۇر. سوندىقتان زۋەۆتى تۇسىنۋگە بولادى، — دەدى ول.

ول رەسەي سپورتشىلارىنىڭ قازاقستانعا كەتىپ جاتقانىنان تراگەديا جاساماۋدى ءوتىنىپتى.

داستان كەنجالين،

استانا

داستان كەنجالين،

استانا