«ەلوردا كۋبوگى»: استانادا بوكستان حالىقارالىق تۋرنير وتەدى

27 ماۋسىم مەن 2 شىلدە ارالىعىندا استاناداعى «Beeline Arena»سپورت كەشەنىندە ەرلەر مەن ايەلدەر اراسىندا بوكستان ءىى حالىقارالىق «ەلوردا كۋبوگى» ءتۋرنيرى وتەدى.

وعان 12 ەلدەن 200-دەن استام سپورتشى قاتىسادى. ولاردىڭ ىشىندە وزبەكستان، قىتاي، ءۇندىستان، موڭعوليا مەن باسقا دا ەلدەردىڭ وكىلدەرى بار.

ەرلەر 13 سالماق دارەجەسىندە (46-48 كگ، 51 كگ، 54 كگ، 57 كگ، 60 كگ، 63،5 كگ، 67 كگ، 71 كگ، 75 كگ، 80 كگ، 86 كگ، 92 كگ، +92 كگ)، ال ايەلدەر 12 سالماق دارەجەسىندە (45-48 كگ، 50 كگ، 52 كگ، 54 كگ، 57 كگ، 60 كگ، 63 كگ، 66 كگ، 70 كگ، 75 كگ، 81 كگ، +81 كگ) ءوز باقتارىن سىنايتىن بولادى.

ءتۋرنيردىڭ جەڭىمپازىنا 700 اقش دوللارى بەرىلەدى. ەكىنشى ورىنعا 400 دوللار، قولا جۇلدە العان بوكسشىعا 200 دوللار تاپسىرىلادى.

جارىستىڭ جەڭىمپازدارى مەن جۇلدەگەرلەرى ءتيىستى دارەجەدەگى مەدالدارمەن جانە ديپلومدارمەن ماراپاتتالادى.

حالىقارالىق تۋرنير IBA جارىستارىنىڭ تەحنيكالىق ەرەجەلەرىنە سايكەس وتەدى.

جەكپە-جەك 3 مينۋتقا سوزىلاتىن ءۇش راۋندتان تۇرادى. راۋندتار اراسىندا ءبىر مينۋتتىق ءۇزىلىس بولادى. 10 ۇپايلىق IBA ۇپاي جۇيەسى قولدانىلادى.

قازاقستان قۇراماسى ساپىندا وليمپيالىق ويىنداردىڭ چەمپيوندارى، الەم، ازيا جانە باسقا دا حالىقارالىق جارىستاردىڭ جەڭىمپازدارى مەن جۇلدەگەرلەرى قاتىسادى.

تۋرنير التى كۇنگە سوزىلادى. جەكپە-جەكتى Qazsport تەلەارناسى مەن «QAZAQ RING» YouTube پلاتفورماسى تىكەلەي ەفيردە كورسەتەدى.

جارىس كۇن سايىن ساعات 14.00-دە باستالادى. كىرۋ تەگىن.

جارىستىڭ اشىلۋ سالتاناتى 27 ماۋسىم ساعات 16.00-گە جوسپارلانعان.

قوسىمشا اقپارات ءۇشىن ايان تولەگەن +7 702 838 4466

داستان كەنجالين،

استانا