اتىراۋدا قازاق كۇرەسىنەن جارىس ءوتتى

بۇگىن اتىراۋ قالاسىنداعى №1 بجسم سپورت زالىندا قازاق كۇرەسىنەن كىشى جاسوسپىرىمدەر اراسىندا «سپورت جۇلدىزدارى» جۋرنالىنىڭ جۇلدەسى ءۇشىن ءىى باتىس ايماقتىق اشىق تۋرنير ءوتتى.

مەكتەپتىڭ سپورت زالى əدەمى بەزەندىرىلىپ، ەكى اق شاڭقاي كيىز ءۇي تىگىلگەنى جارىسقا قاتىسۋشىلارعا كوتەرىڭكى كوڭىل-كۇي سىيلادى.

سپورت مەكتەبىنىڭ ديرەكتورى بيمىرزا تايجانوۆتىڭ قۇتتىقتاۋ سوزىمەن اشىلعان تۋرنيردە جۋرنالدىڭ باس رەداكتورى مۇساعالي تاسقاليەۆ ءتۋرنيردىڭ نەگىزگى ۇيىمداستىرۋشىسى، وبلىستىق قازاق كۇرەس فەدەراتسياسىنىڭ پرەزيدەنتى ماقسوت ايتجان ۇلى مەن ءتۋرنيردىڭ باس دەمەۋشىسى مۇرات سارمانوۆقا «دەنە شىنىقتىرۋ مەن سپورتتى دامىتۋعا قوسقان ۇلەسى ءۇشىن» مەدالىن تابىس ەتسە، ءوز كەزەگىندە ماقسوت ايتجان ۇلى مەكتەپ ديرەكتورى بيمىرزا امانكەلدى ۇلى مەن باس رەداكتوردىڭ ورىنباسارى ەركىن باقتياروۆقا ازيا قازاق كۇرەس فەدەراتسياسىنىڭ پرەزيدەنتى سەرىك كەنەنبايدىڭ اتىنان «قازاق كۇرەسىن دامىتۋعا قوسقان ۇلەسى ءۇشىن» ومىراۋ بەلگىسىمەن ماراپاتتادى.

قاتىسۋشىلارعا ارناپ «ەركە-ناز» تريوسى مەن ء«ىنجۋ-مارجان» حالىقتىق بي ءانسامبلى ونەر كورسەتتى.

تۋرنيرگە اتىراۋ مەن باتىس قازاقستان وبلىستارىنان 100-گە جۋىق پالۋان 7 سالماق دəرەجەسىندە سىنعا ءتۇسىپ، جەڭىمپازدار مەن جۇلدەگەرلەر مەدالدار مەن ديپلومدارعا يە بولدى.

التىن عابيتقىزى،

اتىراۋ