سپورت سالعىرتتىقتى كوتەرمەيدى

الماتى وبلىسىندا كوماندالىق سپورتتان ەلىمىزدە عانا ەمەس قۇرلىقتا قارا ءۇزىپ جۇرەتىن «جەتىسۋ» ايەلدەر ۆولەيبولى كومانداسى مەن بيىلعا دەيىن پرەمەر-ليگادا ويناعان «جەتىسۋ» فۋتبول كلۋبى ارتتا قالعان سپورتتىق ماۋسىمدى وتە ناشار اياقتادى. سوڭعى جىلدارى تۇراقتى تۇردە چەمپيون اتانىپ جۇرگەن ۆولەيبولشى قىزدارىمىزدىڭ وزدەرىنە دەگەن سەنىمى تىم جوعارى بولدى ما، الدە جاۋاپكەرشىلىكتى جوعالتتى ما، ۇلتتىق ليگاداعى چەمپيونات قورىتىندىسىندا ءۇشىنشى ورىنعا ارەڭ تۇراقتادى. كەيىنگى كەزدەرى پرەمەر-ليگانىڭ كوشىنىڭ سوڭىندا، قاۋىپتى ايماقتا ءىلىنىپ-سالىنىپ كەلگەن فۋتبولشىلارىمىز اقىرى ودان شىعىپ قالدى. وسىلايشا، قارجىدان كەندەلىك كورمەگەن، بارلىق جاعدايى تولىعىمەن جاسالىپ، قولداۋ مەن قامقورلىقتىڭ قۇشاعىندا بولعان قوس كوماندا «جەتىسۋ» دەگەن اتاۋعا كولەڭكە ءتۇسىرىپ، جانكۇيەرلەرىن جەرگە قاراتتى.

شىدامنىڭ دا، قولداۋدىڭ دا شەگى بار. كۇنى كەشە قوس كلۋبتىڭ باسشىلارى مەن قوسشىلارىن ارنايى شاقىرىپ، كەزدەسۋ وتكىزگەن وبلىس باسشىسى اماندىق باتالوۆ جاڭا سپورتتىق ماۋسىم باستالار الدىندا بۇرىنعىداي ەمەن-جارقىن اڭگىمە­لەسپەدى، باتا بەرمەدى. جاتتىقتى­رۋشىلاردى دا، باسشىلاردى دا سىلكىلەپ، كورسەتىلگەن سەنىمنەن شىقپاي وتىر­عاندارىن جايىپ سالىپ، جاۋاپكەرشىلىكتى كۇشەيتۋ قاجەتتىگىن قاتاڭ ەسكەرتتى.
ءبىرىنشى كەزەكتە قىزدار ۆولەيبولىنىڭ جاتتىقتىرۋشىلار شتابى مەن اكىمشى­لىگىنىڭ قىزمەتىن سىن ساداعىنا الدى. وسىدان ەكى جىل بۇرىن كوماندا باسشىسى ۆياچەسلاۆ شاپران كلۋبپەن قوشتاسىپ، ەلىمىزدىڭ ۇلتتىق قۇراماسىنىڭ تىزگىنىن ۇستاعاننان بەرگى كەزەڭدە «جەتىسۋ» كومانداسىنىڭ جىگەرلى ويىنىنىڭ ءجىبى بوساپ، قيمىلدارىنان قاۋقار كەتكەن. جاتتىعۋلاردىڭ جۇيەلىلىگى بۇزىلىپ، كوماندا جەتەكشىلەرى كلۋبتاعى جىگەرلى جاس ويىنشىلاردى جاسى كەلىپ قالعان ۆولەيبولشىلارمەن اۋىستىرعان. سونىڭ كەسىرىنەن الاڭداعى بارلىق شەپتەگى ويىن كۇرت السىرەپ، ونىڭ سالدارى چەمپيونات قورىتىندىسىندا كورىنىس تاپتى. وسىعان وراي وبلىس اكىمى ناقتى شەشىم قابىلداپ، قازاقستان رەسپۋبليكاسى ۆولەيبول فەدەراتسياسى باسشىلىعىمەن ەكى تاراپقا دا ءتيىمدى كەلىسىمگە كەلىپتى. بيىلدان باستاپ، شاپران ۇلتتىق قۇرامامەن بىرگە، «جەتىسۋ» كلۋبىنىڭ دا باس جاتتىقتى­رۋشىسى مىندەتىن اتقاراتىن بولدى. تال­دىقورعاندىق كوماندا ۇلتتىق قۇرامانىڭ بازالىق كلۋبى مارتەبەسىن يەلەنگەندىكتەن شاپرانعا ەكى بىردەي لاۋازىمدى قوسا الىپ ءجۇرۋ قيىندىققا تۇسپەسى انىق. امان­دىق عابباس ۇلى وسىلاردىڭ بارلى­عىن ەسكەرتە كەلە، كلۋبتىڭ جاڭا باس جات­تىقتىرۋشىسىنىڭ الدىنا ءبىر عانا ناقتى مىندەت – كەلەسى كەزەڭدە تالدى­قورعان­دىقتاردىڭ چەمپيوندىق اتاقتى قايتارىپ الۋىن قامتاماسىز ەتۋدى جۇكتەدى.
ءوزىنىڭ تاريحىندا ءبىر رەت قانا پرە­مەر-ليگادا كۇمىس جۇلدەگەر اتانعان، قالعان كەزدەرى قالىڭ توپتىڭ بىردە ورتاسىندا، ەندى بىردە سوڭىندا سالپاقتاپ جۇرگەن «جەتىسۋ» فۋتبول كومانداسى وتكەن سپورتتىق ماۋسىمدى مۇلدە ءساتسىز اياقتاپ، پرەمەر-ليگامەن قوشتاسىپ تىندى. سۇرەڭسىز ويىن، سىلبىر قيمىلعا باسقا سەبەپتەرمەن بىرگە، كلۋبتىڭ باسىنان سوڭعى جىلدارى ايىقپاي قويعان قار­جىلىق داۋ-دامايدىڭ دا كەرى اسەر ەتكەنى انىق. كوماندانىڭ بۇرىنعى باسشىلارى قارجىلىق قيتۇرقىلارىمەن تالدىقورعان قالاسى مەن «جەتىسۋ» كلۋبىنىڭ اماناتىن ۋەفا-عا دەيىن شىعاردى. سالىقتاردىڭ دەر كەزىندە تولەنبەگەنى، شەتەلدىك جات­تىقتىرۋشىلار مەن ويىنشىلاردىڭ جالاقى قارىزىنا قاتىستى جۇزدەگەن ميلليون تەڭگە ايىپپۇل تولەۋگە، حالىق­ارالىق قۇقىق پەن قازاقستاندىق زاڭنا­ماعا قايشى كەلەتىن شەشىمدەر قابىلداعان باسشىلاردىڭ جاۋاپسىزدىعىنىڭ كە­سىرىنەن سوت پروتسەستەرىنە قاتىسۋعا تۋرا كەلگەنىن جايىپ سالعان باتالوۆ كلۋبتىڭ جاڭا باسشىلىعى مەن جاتتىقتىرۋلار شتابىنا ءبىرىنشى كەزەكتە كوماندانى ءبىرىنشى ليگادان پرەمەر-ليگاعا قايتارۋ قاجەت­تىگىن ەسكەرتتى. ءبىرىنشى ليگادا دا وسال كو­ماندا جوقتىعىن ەسكەرسەك، «جەتى­سۋ­دىڭ» ەل فۋتبولىنىڭ سەركەلەرى ساپىنا ورالۋى وڭايعا سوقپاسى انىق. ول ءۇشىن تۋرنير كەستەسىندە كەم دەگەندە العاشقى بەستىكتەن كورىنۋ كەرەك. بۇل ماقساتقا قول جەتكىزۋ ءۇشىن ءبىرىنشى كەزەكتە كلۋبتىڭ قارجىلىق جاعدايىن تارتىپكە كەلتىرىپ، فۋتبول ماڭىن اينالشىقتاپ وڭاي تابىس تاۋىپ جۇرگەندەردەن ارىلىپ، ناعىز ما­مانداردى عانا قالدىرعان ءجون. سونى­مەن بىرگە، سەلەكتسيالىق جۇمىستى ساپالى جۇرگىزىپ، الدىعا قويىلعان مىندەتتى ورىنداي الا­تىن كوماندا جاساقتاۋعا باسا نازار اۋدارى­لادى. ەڭ باستىسى، جاقسى ويىن كورسەتىپ، جانكۇيەرلەردىڭ ستاديونعا ورالۋىنا ىقپال ەتۋ.
قوس كلۋبتى جوعالتقان بيىكتەرىن قايتا باعىندىرۋعا قاتىستى ءبىراز قايراپ، رەتتى جەرىندە قاتتى-قاتتى سىناپ العان وبلىس باسشىسى وبلىستىق دەنە تاربيەسى جانە سپورت باسقارماسى باسشىلىعىنىڭ جۇمىسىنا دا كوڭىلى تولمايتىنىن جاسىرعان جوق. باسقانى ايتپاعاندا، ءوز وڭىرىمىزدە وتكەن قىسقى ۋنيۆەرسيادادا بىردە-ءبىر جۇلدە الماۋىمىزدىڭ ۇيات ەكەنىن ايتا كەلە، الىپ جاتقان اۋماعى مەن حال­قىنىڭ سانى جونىندە كەيبىر ەۋروپا­لىق ەلدەرمەن تەڭەسەتىن وبلىستىڭ سوعان ساي سپورتتىق جەتىستىگى جوقتىعىنا قىنجىلىس ءبىلدىردى. سوندىقتان جاستار مەن بالالار سپور­تىنا قولداۋدى كۇشەيتە وتىرىپ، بۇعان دەيىن ءبىراز جەتىستىككە جەتكەن سپورت­شىلارىمىزدىڭ توقمەيىلسۋىنە توقتاۋ سالىپ، جاۋاپكەرشىلىكتى بارىنا كۇشەيتەتىن كەزدىڭ كەلگەنىن قاتاڭ ەسكەرتتى.
بولات اباعان