Arqalyqta aýyr atlet Gaıdar Sarjanovty eske alýǵa arnalǵan týrnır ótti

Zil kóterýden Qazaqstannyń 6 dúrkin chempıony, KSRO-nyń sport sheberi Gaıdar SARJANOVTY zańǵar atlet deýge tolyq negiz bar. Ol Torǵaı oblysy Arqalyq aýdanyna qarasty Qaıyńdy qoı sovhozynda týǵan. Bala kezinen sportty serik etip, aýyldaǵy aýyr temir-tersekti basynan asyryp, keıin kóptegen jarystarǵa qatysyp, ziltemirshi retinde odaqtyq deńgeıge kóterilgen edi.

Jaqynda Arqalyq qalasynda Torǵaı eli talantymen tas jarǵan Tolaǵaı ulyn taǵy bir eske alyp, aýyr atletıkadan respýblıkalyq týrnır ótkizdi. Bul týrnırdi osymen ekinshi ret Gaıdar Sarjanovtyń týǵan-týystary uıymdastyrdy. Osy jarysta jas sportshylar zil temir kóterýden ózara myqtyny anyqtady.

Gaıdar Sarjanovtyń týa bitken talanty, tula boıyna bitken taý qoparardaı kúshi, ony ári qaraı damyta bilgen óziniń qajyrly eńbegi – onyń ózin jalpaq jurtqa tanymal etti, abyroıyn asqaqtatty. Áıtpese, ol kezde Qazaqstannyń 6 dúrkin chempıony, KSRO-nyń sport sheberi ataný árkimniń basyna buıyra bermeıtin baq bolǵan. Qazirgi kúnmen salystyrsaq, respýblıka chempıonatyn alty ret jeńip alý, Odaqtyń sport sheberi ataný álem chempıony bolý degenmen birdeı. Ol kisi jaıyndaǵy maǵlumatqa tolyǵyraq kózderińiz jete túsý úshin belgili aqyn, jýrnalıst Ábjan Ábiltaıdyń  taý tulǵaly jerlesimiz týraly osydan biraz jyl buryn «Torǵaı tańy» gazetine jarııalanǵan  «Bizdiń Gaıdar» atty maqalasynan úzindiler keltire ketsek. «Ony biletinder biraýyzdan bizdiń Gaıdar deıdi. Bizdiń Gaıdaryńyz ózi aıtatyndaı «Qaıyńdy» qoı sovhozynyń balasy, odan qaldy sonda Batıqa degen kempir bar, sonyń balasy, eldiń aıtýynsha Seıtiken men Mártaıdyń balasy, taǵy da Gaıdarǵa salsań, Qazybektiń balasy. Alasy joq, talasy… 8 klasta oqyp júrip, sol kezdiń ózinde-aq aýyl dúkeninen eki qap undy qoltyǵyna qystyryp júre beretin qasqa sol edi. Quıttaıynan MTM-da shashylyp jatqan dóńgelekterdi bilikke tizip, kókke kóterdi, jer ıisketti. Sóıtip júrip, «bolar bala boǵynan» degendeı (ony 9 klasta-aq mamandar baıqaǵan), Almatynyń dene shynyqtyrý ınstıtýtyna qoıdy da ketti. Instıtýttyń birinshi kýrsynda oqyp júrip sport sheberiniń normatıvin oryndaý árkimniń peshenesine jazyla bermeıdi. Osyndaı ólermender qaıda qazir?

… Gaıdar sportty eń ósken shaǵynda, kemeline kelip, endi-endi taǵy da birdeńe istermin dep turǵan kezinde tastady. Ony oılasa kózine jas úıiriledi, kómeıine sóz kepteledi…Gaıdardyń sahnaǵa (arenaǵa, pomostqa) sońǵy shyǵýy da sol boldy. Álemdik rekordty basyna kóterip turyp, tastap jiberdi. Bar bolǵany az ǵana sát. Soǵan onyń júregi shydaǵanymen, beli men bilegi shydaı almaı qaldy-aý! Sol jarysta Gaıdardyń bulshyq etteri jyrtylyp ketip, aýrýhanaǵa tústi. Sodan keıin de sol páleni jalǵastyrýǵa bolatyn edi, árıne. Ol óıtkeni…», – dep jazǵan eken qalamger.

Endi Gaıdar Sarjanovty  eske alýǵa arnalǵan týrnırdiń nátıjesine toqtalsaq. Oǵan Almatydan, Qostanaı qalasy men Qostanaı aýdanynan, Áýlıekól, Jarqaıyń men Atbasar aýdandarynan zil temirshiler arnaıy keldi. Týrnırdi Gaıdar Sarjanovtyń Qobylandy Esmaǵambetov bastaǵan  týǵan-týystary uıymdastyrdy. Bul iske Arqalyq balalar men jasóspirimder sport mektebiniń ujymy da óz úlesterin qosty. Bas tóreshi jáne uıymdastyrýshylardyń qatarynda jarystyń jaqsy ótýine atalǵan sport mektebiniń jattyqtyrýshysy Kúntýar Jánkishev te atsalysty.

Týrnırde 61 jastaǵy Astanadan Turmaǵanbet Imanbaev, Sapabek Sámenov, Jarqaıyńnan 66 jastaǵy Asqar Álkeshev, Arqalyqtan 57 jastaǵy Aıdar Esmaǵanbetov jáne 56 jastaǵy Kúntýar Jánkishev sekildi ardager sportshylar da óner kórsetip, kórermenniń yqylasyna bólendi.

Osy jarysta  erler arasynda Arqalyqtan Ernar Maqataı (34 kg), Aleksandr Trınko (38 kg, Áýlıekól aýdany), Shalqar Serik (42 kg, Arqalyq), Alekseı Chýrkan (46 kg, Áýlıekól), Qaınar Gaıdar (50 kg, Almaty), Jańabek Qabıdolla, (56 kg, Arqalyq), Nurdáýlet Erkenov, (62 kg, Arqalyq), Aıan Baızaqov, (69 kg, Arqalyq) pen Erbolat Balǵabaev (69+ kg, Arqalyq) jeńimpaz atandy. Al qyzdar arasynda arqalyqtyq Lýnara Súıinǵarına (40 kg) men Aıgúl Beısenova (63 kg) qurmet tuǵyrynyń eń bıik satysyna kóterildi.  Jeńimpazdar men ardagerlerge aqshalaı syılyqtar men týrnırdiń arnaıy daıyndalǵan medali tabys etildi.

Darhan  ERMAǴANBETOV,

ARQALYQ

Foto: avtor