SportPress.kz Qazaqstan sport jańalyqtary
Búgin Almaty oblysy, Eńbekshiqazaq aýdany, Shelek aýylynda bokstan jasóspirimder arasynda respýblıkalyq ashyq týrnır máresine jetti.
Kıkboksıngten álem kýbogynyń ıegeri, eki dúrkin Eýropa chempıony, Azııa birinshiliginiń jeńimpazy, qazaq sportyna eńbek sińirgen qaıratker Elmurat Qaıypjanovtyń júldesine arnalǵan dodaǵa elimizdiń ár aımaǵynan 100-den asa jasóspirim boksshy qatysty. Tartysqa toly ótken týrnırdiń
chempıondary «sport sheberligine úmitker» ataǵyn aldy. Odan bólek jeńimpazdar men júldegerlerge Almaty oblystyq deneshynyqtyrý basqarmasynyń dıplomy men demeýshiler usynǵan baǵaly syılyqtar tartý etildi.
El sportynyń órkendeýine ólsheýsiz úles qosyp júrgen dúnıejúzilik «Jekpe-jek» qaýymdastyǵynyń prezıdenti Sabyrjan Mahmetov «Alash praıd» klýbynyń prezıdenti Danııar Qasqaraýov, bilikti bapker Tursynǵalı Edilov syndy azamattar qurmetti qonaq bolyp, jas boksshylardyń ónerin tamashalady. Almaty oblysy, Eńbekshiqazaq aýdany tizgin ustar azamattary aýdan ákimdigi atynan Elmurat Muqashulyna oqaly shapan jaýyp qurmet-qoshemetterin kórsetti.
«Byltyr da ótýi tıis edi, pandemııanyń kesirinen júzege aspaı qaldy. Mine, endi Almaty oblysy karantındik shekteýdiń sary aımaǵyna ótip, talaptar jeńildegen soń jarystar uıymdastyryla bastady. Týrnırge qatysqan jasóspirimderdiń arasynda talantty boksshylar ósip keledi eken. Solardyń aıqasyn kórip, kóńilimiz marqaıdy. Jastardy janyp, qaıraıtyn nárse – jarys. Mundaı týrnırlerdiń aýyldyq jerde jıi ótýi talanttardyń tuma bulaǵyn ashýǵa orasan septigin tıgizedi», deıdi týrnırdiń uıymdastyrýshysy Erjan Nurhalyqov.
Qýanysh RAZAQ,
Almaty oblysy,
Eńbekshiqazaq aýdany,
Shelek aýyly
