Kenen aýylynda ótken kelisti týrnır

«Aýylylym altyn besigim», demekshi, aýylylǵa baryp, týǵan-týys, el-jurtpen qaýyshyp qaıtqanda alǵan áserdi aýylda týyp-ósken jan ǵana biletin shyǵar.

Keshe Alla sátin salyp týyp-ósken Kenen aýylyna jol túsip baryp qaıtqan edim. Qasıetti qara shańyraǵyma bas suǵyp, ákem men anam turǵan kıeli úıdiń árbir zatyn sıpalap baqılyq saparǵa ketken ata-anamdy saǵyna eske aldym. Sosyn besin namazymdy oqyp, kindik qanym tamǵan qara shańyraǵymnyń berekesi uıyp turýyna duǵa tiledim. Iá, árkimniń de týǵan aýyly, týǵan úıi ystyq qoı. О́mirdiń soqpaq joldarymen kósh uzap ketken adamdar aýylyn, elin ósken ortasyn eshqashan umytpaıdy. Men úshin qaıda júrsem de aýylym, el jurtym, týǵan úıim, jaryq dúnıege ákelgen áke-sheshemniń orny erek. Olar máńgilik júregimde. Tamyrymyz aýyldan taraý alǵandyqtan aýyl ómirimniń máni ári sáni.

Hosh, aǵaıyn aýyl jaıly terbenip ketsem keshirim surap, sapar jaıly áńgimeni jalǵastyraıyn. Aýylǵa negizi kelgen eki sebeptiń biri taı qulyndaı birge ósken qurdasym Aıdar Búrbaevtyń bıyl tiri bolsa 100 jasqa keletin marqum ákesi men sheshesine as berip, at shaptyrǵan sharasy bolsa, ekinshi sebebim aýyl tórinde sý jańa stadıon salynyp, sonyń saltantty ashylý sharasy edi. Bul eki jaǵdaıda aýyl turǵyndary men qonaqtarǵa úlken merekelik kóńil-kúı tartý etti. Men birge ósken dosymnyń ata-anasyna bergen asyna qatysyp shyqqannan keıin, ortalyqta jańa stadıonnyń qurmetine uıymdastyrylǵan dop dodasyn baryp tamashaladym.

Jarysqa Qordaı aýdany boıynsha 10 komanda kelip qatysty. Úsh topqa bólinip, jeńis úshin jan aıamaı tartysty oıyn kórsetkender kún eńkeıe baryp jeńimpazdardy anyqtaıtyn kezge kelip jetti. Negizi aýyl fýtbolynda óner kórsetip júrgen talantty jastardyń kóptep ósip kele jatqanyna erekshe rıza bolasyń. Qazirgi tańda kishi men úlken fýtbolda el namysyn qorǵaıtyn oıynshylardyń arasynda qarakóz jastarymyzdyń qatary kóbeıip bara jatqanyna qýanamyz. Sol ulttyq quramnyń jeıdesin kıetin qazaq oıynshalary osy aýyl sportynan qanat jaıyp jatqanynyn umytpaǵan abzal. Endeshe, aýyl sportyna kóńil dál osyndaı óńirlerde stadıon, sport mektepteri ashylyp, kóp kóńil bóline túskende ǵana jemisin kóremiz. Sondyqtan da Kenen aýylynda salynǵan sý jańa stadıon sol aıtqan sózimniń aıǵaǵy. «Taý balasy taýǵa qarap ósedi», demekshi qyrǵyz-qazaqqa áıgili aqyn kompozıtor Kenen Ázirbaevtyń aýylynyń jastarynyń ekiniń biri ónerli. Sport dese ishken asyn jerge qoıyp, ásirese, fýtboldan aýdan birinshilikterine top jaryp jeńispen jelpintip aýylynyń maqtanyshtary bolyp júr. Al, aýyl tórine oryn alǵan Ekeıbaı Qashaǵanov atyndaǵy orta mektepte dene tárbıesinen sabaq beretin Aıdar Turǵanqulovtyń jas órenderdi daıyndaýda eńbegi óte zor. Osy dúbirli týrnırdi uıymdastyrýda shapqylap joqtan bardy taýyp jasap ótkizgen Aıdarǵa qatysýshylardyń rahmeti erekshe bolyp jatty.

Sonymen, fınalǵa «A» tobynan osy jarysta barlyq komandalardy asqan basymdylyqpen jeńip shyqqan, arasynda sheberligine jan súısiner oıyn kórsetken Ýálı, Aıanǵalı sekildi aýyl fýbolynyń maqtanyshtary bar Kenen aýylynyń komandasy fınalǵa shyqty. Al ekinshi toptan Qordaı aýdanynyń komandasy  óziniń jeńiske laıyqty jasaq ekenin jaqsy oıyndary arqyly kórsetip, sońǵy oıynǵa joldama aldy. Osylaı tartysqa toly ótken fınaldyq kezdesýde gol soǵylmaı, jeńimpaz komanda penaltı serııasy arqyly anyqtalatyn boldy. Penaltı negizi qaqpashylardyń sheberligi synǵa túsetin sát ekeni belgili. Bul básekede Kenen aýylynyń qaqpashysy Aıbek úsh soqqynyń ekeýin qaıtaryp komandasyn jeńiske jetkizdi. Osylaısha Kenen aýylynyń komandasy bas júldeni jeńip aldy. Al, úshinshi oryndy Otar komandasy ıelendi. Jarystyń sońynda jeńimpazdar men júldegerler uıymdastyrýshylardyń baǵaly syı-qurmetterimen marapattaldy. Týrnırdiń úzdik oıynshysy, úzdik qorǵaýshysy, úzdik qaqpashysy-degen marapattarda óz ıelerin taýyp saltanatpen tabys etildi. Osylaısha jaqsy kóńil kúıde uıymdastyrylǵan tartymdy týrnır shegine jetip,qatysýshylar estelikke sýretke túsip jatty. Aýyl fýtbolynyń damýyna úlesin qosyp jatqan, osyndaı kózinde oty bar, namysy zor darynda jastardyń ósip kele jatqanyna úlken rıza bolyp, biz de tarqastyq.

Aqyn ORDABAIULY,

ALMATY