ىلە باسكەتبولى ىلگەرى جىلجىپ كەلەدى

باسكەتبول وليمپيادالىق سپورت ءتۇرى بولعاندىقتان جارىستىڭ بۇل تۇرىنە جاستاردى تارتۋ وتە ماڭىزدى. اسىرەسە، قىزدار اراسىندا ءوزىمىزدىڭ قاراكوز جاستارىمىزدا باۋلاپ، قىزىقتىرا ءبىلۋدىڭ ورنى ەرەكشە.

بۇگىنگى تاڭدا الماتى وبلىسى وسى سپورت ءتۇرىن دامىتۋدى كەڭىنەن قولعا الىپ وتىر. وعان جيىلەتىپ ءوتىپ جاتقان جارىستار دالەل بولادى. باسكەتبولدان اسىرەسە، قىزدار اراسىندا ىلە اۋدانىنىڭ جاستار مەن جاسوپىرىمدەر كوماندالارى قامشى سالدىرماي الدا كەلەدى. نەگىزى، ءاربىر سپورتتى دامىتۋ ءۇشىن وعان قاجەتتى سپورت ينۆەنتارى كەرەك ەكەنى بەلگىلى. ىلە اۋدانى وتەگەن كەنتىندە باسكەتبول سپورتىمەن اينالىستان جاسوسپىرىمدەر كوپ جىلدان بەرى ءوزىنىڭ ستاندارتقا ساي سپورت زالىنىڭ جوقتىعىنان ءبىراز قيىنشىلىقتى باستارىنان كەشكەن ەكەن. ولار كوپتەن بەرى م.ماقاتاەۆ اتىنداعى №13 ورتا مەكتەپتىڭ سپورت زالىن جالعا الىپ جاتتىعۋلارىن جالعاستىرىپ كەلىپتى. «جوق جومارتتىڭ قولىن بايلايدى»، دەمەكشى، قاجەتتى سپورت باسپاناسىنىڭ جوقتىعىنان بالالار دودالى جارىستارعا دا قاتىسا الاماي، ەگەر بارىپ جاتسا بار مۇمكىندىگىن اشا الماي اۋىر ساتتەرگە كەز بولادى.

ءتۇننىڭ ارتىنان كۇن شىعاتىنى سياقتى، وتەگەن كەنتىندە 2011 جىلى بالالار مەن جاسوسپىرىمدەر سپورت مەكتەبى اشىلىپ، ءزاۋلىم سپورت كەشەنى قولدانىسقا بەرىلە باستايدى. سول ساتتەن باستاپ، سپورتتىڭ بىرنەشە ءتۇرى، سونىڭ ىشىندە باسكەتبول دا تۇرلەنىپ سالا بەرەدى. اسىرەسى، 2021 جىلى سپورت مەكتەبىنە قازاق كۇرەسىنەن قازاقستاننىڭ تۇڭعىش «بارىسى» ۇلان رىسقۇلدىڭ باسشىلىققا كەلۋى سول-اق ەكەن، سپورتتىڭ بارلىق سالاسى جايناپ سالا بەردى دەسە بولادى. ويتكەنى، قازاق كۇرەسىنىڭ مايىن ءىشىپ جىلىگىن شاققان داڭقتى بالۋان، سپورتتىڭ قازانىندا قايناپ وسكەندىكتەن جەڭىستىڭ قالاي كەلەتىنىن جاقسى بىلەتىن ەدى. تانىمال بالۋان الدىمەن جاستارعا قاجەتتى جاعداي جاساۋدى قولعا الادى. مىسالى، باسكەتبولدىڭ جىلجىمالى دوپ تاستايتىن تور سەتكاسى بار تاقتانىڭ جاڭاسىن الىپ اكەلىپ قويعاننان باستاپ، باسكەتبولعا قۇمار جەتكىنشەكتەر سۇيىكتى سپورتىمەن بەلسەنە جاتتىعىپ، جەڭىستەرگە جەتە باستاعان ەكەن. ال، سونداي باسكەتبول سپورتى ءۇشىن اۋاداي قاجەت سپورت ينۆەنتارى بۇرىن-سوڭدى بولماپتى. سوندىقتان دا ۇلاننىڭ جاسوسپىرىمدەرگە جاساعان دەمەۋىنە ريزا بولعان جاس شەبەرلەر سۇيىكتى سپورتتارىنىڭ جەمىسىن بەرە باستايدى. وبلىستىق، رەسپۋبليكالىق جارىستارعا ۇزبەي قاتىسىپ جۇلدەلى ورىنداردان كورىنۋ كوپ كۇتتىرمەگەن ەكەن. قولداۋ، قامقورلىقتىڭ ارقاسىندا جەڭىستەر دە جايلاپ كەلە باستايدى.

جۋىردا ەسىك قالاسىندا باسكەتبولدىڭ كىشى ءتۇرى ستريتبولدان 18 جاستان ۇلكەن ايەلدەر اراسىندا وتكەن الماتى وبلىسىنىڭ چەمپيوناتىنا قاتىسقان ىلە اۋدانى ءبىرىنشى ورىندى جەڭىپ السا، ەكىنشى ورىندى تالعار كومانداسى، ءۇشىنشى ورىندى ەڭبەكشى قازاق اۋدانىنىڭ كومانداسى تۇيىندەپتى. امەريكالىقتار ويلاپ شىعارعان ستريتبول سپورتىنا ءۇش سپورتشىدان قاتىسادى. الدىمەن كوشە ويىنى بولىپ كەلگەن بۇل سپورت ءتۇرى قازىرگى تاڭدا ۇلكەن الامان جارىستار وتەتىن سپورتتىڭ كەڭ تارالىپ بارا جاتقان تۇرىنە اينالىپ كەلەدى. قازاقستاندا دا بۇل سپورت ءتۇرى كەنجەلەپ قالماي، قازىرگى كۇنى ەل چەمپيوناتتارىن ۇيىمدىستارىلىپ، دامىپ بارادى.

ىلە اۋدانى وتەگەن كەنتىندە ورنالاسقان بالالار مەن جاسوپىرىمدەر اتىنداعى سپورت مەكتەبىندە جاتتىعاتىن وقۋشىلار دا الدىڭعى تولقىن اپايلارىنىڭ ءىزىن باسىپ، ەداۋىر جەتىستىكتەرگە جەتە باستادى. جاقىندا قوناشۆ قالاسىندا كىشى باسكەتبول ياعني، ستريتبول تۇرىنەن 2007 — 2008 جىلعى قىزدار اراسىندا الماتى وبلىسىنىڭ بىرىنشىلىگى ۇيىمداستىرىلىپ، ىلە اۋدانىنىڭ وقۋشىلارى جۇلدەلى ءۇشىنشى ورىندى يەلەندى. بۇل قىزداردى جاتتىقتىرۋدا جانىن سالىپ جۇرگەن وتەگەن كەنتىندەگى سپورت مەكتەبىنىڭ باپكەرى شولپان جامبىلوۆا ەڭبەگى زور ەكەنىن ايتساق بولادى. تاعى ءبىر ايتا كەتەر ءجاي، وسى سپورت مەكتەبىنەن قاناتتارىن قامداعان دارىندى جاس نازەركە توكەنوۆا مەن ارۋجان اقىپبەكوۆا قازىرگى كەزدە جەرگىلىكتى جۇرتتىڭ ماقتانىشتارىنا اينالىپ كەلەدى. ايتۋلى ەكى سپورتشى وبلىس قۇرامىسىنا ەنىپ، رەسپۋبليكاىق جارىستاردا ءوز وڭىرلەرىنىڭ نامىسىن ابىرويمەن قورعاپ ءجۇر ەكەن. ەندەشە، ىلە اۋدانىندا باسكەتبول سپورتىنىڭ قارقىنى جامان ەمەس دەۋگە بولادى. كىم ءبىلسىن الداعى ۋاقىتتا اللا ءناسىپ ەتىپ، قازاقستان قۇرامىسىنىڭ ساپىندا ىلەنىڭ قوس قىزى تاماشا ويىندارىمەن كوزگە ءتۇسىپ جاتسا، بۇرىمدى ارۋلاردىڭ قانداي سپورت مەكتەبىنەن ءتالىم العىنان مىندەتتى تۇردە ەسكە الارىمىز. ونى ارينە، ۋاقىت كورسەتەدى. ازىرگە جاتتىقتىرۋشىلاردىڭ العا قويعان باستى ماقساتى — ەل چەمپيوناتىندا جۇلدەلى ورىنداردان كورىنۋ.

اقىن ورداباي ۇلى،

الماتى وبلىسى، ىلە اۋدانى