اتىراۋلىقتار قازاق قىزدارىنان شىققان تۇڭعىش جۇلدەگەرگە پاتەر سىيلادى

اتىراۋدا دزيۋدوشى ءابيبا ابۋجاقىنوۆا مەن ونىڭ جاتتىقتىرۋشىسى مەيىرجان ەسماعامبەتوۆكە قۇرمەت كورسەتىلدى.

اتىراۋ قالاسىندا ءبىر توپ سپورت جاناشىرلارى مەن سپورتشىلار جانە جاتتىقتىرۋشىلار باس قوسىپ، دزيۋدو كۇرەسىنەن قازاق قىزدارىنان شىققان الەم چەمپيوناتىنىڭ تۇڭعىش قولا جۇلدەگەرى ءابيبا ابۋجاقىنوۆا مەن ونىڭ جاتتىقتىرۋشىسى مەيىرجان ەسماعامبەتوۆكە قۇرمەت كورسەتتى.

ءابيبا ابۋجاقىنوۆاعا 48 كەلىدە تاشكەنتتە وتكەن الەم چەمپيوناتىندا قولا جۇلدەنى جەڭىپ الىپ،  ەل مەرەيىن اسىرعان بولاتىن. ارادا 15 كۇن وتكەندە ءابيبا ءوزىنىڭ مىقتى ەكەندىگىن تاعى ءبىر مارتە دالەلدەپ، ءباا-دە وتكەن «ۇلكەن دۋلىعا» تۋرنيرىندە سول جەتىستىگىن قايتالادى.

جالپى، بيىلعى جىل ابيباعا وتە تابىستى بولدى. وسىنىڭ الدىندا قىركۇيەك ايىندا استانادا وتكەن ازيا چەمپيوناتىندا ول ەل قورجىنىنا كۇمىس جۇلدە سالىپ، ازيانىڭ ەكى دۇركىن كۇمىس جۇلدەگەرى اتانىپ ەدى.

دزيۋدوشى 1997 جىلى تاشكەنت وبلىسىنىڭ شىرشىق قالاسىندا تۋعان. بالا كەزىنەن كوركەم گيمناستيكامەن اينالىسىپتى. الايدا، ءبىر جىلدان سوڭ 11 جاسىندا دزيۋدو ۇيىرمەسىنە بارىپ، وزبەكستاندا تۇراتىن قازاق باقىتجان جۇمانوۆتىڭ قول استىندا جاتتىققان.

2014 جىلى دزيۋدوشى قىزدىڭ وتباسى شىمكەنت قالاسىنا قونىس اۋدارادى. سوسىن ءابيبا الماتىداعى رەسپۋبليكالىق سپورت كوللەدجىنە قابىلدانىپ، الماتى وبلىسىنىڭ اتىنان جارىستارعا قاتىسادى. ەندى مىنە، 2019 جىلدان بەرى اتىراۋ وبلىسى اتىنان سىنعا ءتۇسىپ كەلەدى.

اتىراۋدا دزيۋدوشى قىزدىڭ قۇرمەتىنە جايىلعان اق داستارحانعا وبلىستاعى اتاقتى سپورتشىلار مەن سپورت جاناشىرلارى تۇگەلگە جۋىق جينالىپ، اق باتالارىن بەرسە، جەرگىلىكتى كاسىپكەرلەر ابيباعا اتىراۋ قالاسىنان ەكى بولمەلى پاتەردىڭ كىلتىن تابىس ەتتى. مەيىرجان ەسماعامبەتوۆكە تۇلپار مىنگىزدى.

«سپورت جۇلدىزدارى» جۋرنالى اتىراۋ فيليالىنىڭ ديرەكتورى، دجيۋ-دجيتسۋدان ەكى دۇركىن الەم جانە ازيا چەمپيونى تىنىس بيساليەۆ باس رەداكتور مۇساعالي تاسقاليەۆتىڭ اتىنان باتىر قىزعا قازاق سپورتىنىڭ ساڭلاقتارى تۋرالى جازىلعان « ۇلى دالا باتىرلارى» كىتابىن سىيعا تارتتى. ودان كەيىن  ابيبانىڭ باپكەرىنە قازاقتان شىققان كەڭەس وداعىنىڭ باتىرلارى تۋرالى پەرنەباي دۇيسەنبين مەن مۇساعالي تاسقاليەۆتىڭ بىرىگىپ جازعان «ۇلت باتىرلارى» كىتابىن تارتۋ ەتتى.

ءابيبانىڭ ەندىگى باستى ماقساتى – پاريج وليمپياداسىندا ەل نامىسىن ابىرويمەن قورعاۋ.

كەشكە جينالعان اتىراۋلىق سپورتشىلاردىڭ بارلىعى قازاقتىڭ باتىر قىزىنا «وليمپيادا چەمپيونى بول!» دەپ باتالارىن بەردى.

اسىلبەك ابۋلعازيەۆ،

«سپورت جۇلدىزدارى» جۋرنالى،

اتىراۋ