Atyraýlyqtar qazaq qyzdarynan shyqqan tuńǵysh júldegerge páter syılady

Atyraýda dzıýdoshy Ábıba Ábýjaqynova men onyń jattyqtyrýshysy Meıirjan Esmaǵambetovke qurmet kórsetildi.

Atyraý qalasynda bir top sport janashyrlary men sportshylar jáne jattyqtyrýshylar bas qosyp, dzıýdo kúresinen qazaq qyzdarynan shyqqan álem chempıonatynyń tuńǵysh qola júldegeri Ábıba Ábýjaqynova men onyń jattyqtyrýshysy Meıirjan Esmaǵambetovke qurmet kórsetti.

Ábıba Ábýjaqynovaǵa 48 kelide Tashkentte ótken álem chempıonatynda qola júldeni jeńip alyp,  el mereıin asyrǵan bolatyn. Arada 15 kún ótkende Ábıba óziniń myqty ekendigin taǵy bir márte dáleldep, BAÁ-de ótken «Úlken dýlyǵa» týrnırinde sol jetistigin qaıtalady.

Jalpy, bıylǵy jyl Ábıbaǵa óte tabysty boldy. Osynyń aldynda qyrkúıek aıynda Astanada ótken Azııa chempıonatynda ol el qorjynyna kúmis júlde salyp, Azııanyń eki dúrkin kúmis júldegeri atanyp edi.

Dzıýdoshy 1997 jyly Tashkent oblysynyń Shyrshyq qalasynda týǵan. Bala kezinen kórkem gımnastıkamen aınalysypty. Alaıda, bir jyldan soń 11 jasynda dzıýdo úıirmesine baryp, О́zbekstanda turatyn qazaq Baqytjan Jumanovtyń qol astynda jattyqqan.

2014 jyly dzıýdoshy qyzdyń otbasy Shymkent qalasyna qonys aýdarady. Sosyn Ábıba Almatydaǵy respýblıkalyq sport kolledjine qabyldanyp, Almaty oblysynyń atynan jarystarǵa qatysady. Endi mine, 2019 jyldan beri Atyraý oblysy atynan synǵa túsip keledi.

Atyraýda dzıýdoshy qyzdyń qurmetine jaıylǵan aq dastarhanǵa oblystaǵy ataqty sportshylar men sport janashyrlary túgelge jýyq jınalyp, aq batalaryn berse, jergilikti kásipkerler Ábıbaǵa Atyraý qalasynan eki bólmeli páterdiń kiltin tabys etti. Meıirjan Esmaǵambetovke tulpar mingizdi.

«Sport juldyzdary» jýrnaly Atyraý fılıalynyń dırektory, djıý-djıtsýdan eki dúrkin álem jáne Azııa chempıony Tynys Bısalıev bas redaktor Musaǵalı Tasqalıevtiń atynan batyr qyzǵa qazaq sportynyń sańlaqtary týraly jazylǵan «Uly dala batyrlary» kitabyn syıǵa tartty. Odan keıin  Ábıbanyń bapkerine qazaqtan shyqqan Keńes odaǵynyń batyrlary týraly Pernebaı Dúısenbın men Musaǵalı Tasqalıevtiń birigip jazǵan «Ult batyrlary» kitabyn tartý etti.

Ábıbanyń endigi basty maqsaty – Parıj Olımpıadasynda el namysyn abyroımen qorǵaý.

Keshke jınalǵan atyraýlyq sportshylardyń barlyǵy qazaqtyń batyr qyzyna «Olımpıada chempıony bol!» dep batalaryn berdi.

Asylbek ABÝLǴAZIEV,

«Sport juldyzdary» jýrnaly,

ATYRAÝ