ەندى ءبىر گول سالسام، يىعىمنان اۋىر جۇك تۇسەدى – ەلدور شومۋرودوۆ

تاشكەنت قالاسىنىڭ «پاحتاكور» ستاديونىندا فۋتبولدان وزبەكستان مەن قازاقستان قۇراما كوماندالارى حالىقارالىق جولداستىق كەزدەسۋ وتكىزىپ، ماتچتىڭ الاڭ يەلەرىنىڭ جەڭىسىمەن اياقتالعانى بەلگىلى.

وسى ماتچ تۋرالى وزبەكستاننىڭ Sport.uz سايتى نەبارى بەس سويلەمنەن عانا تۇراتىن حابار بەردى.

«سايىستا ءبىزدىڭ وكىلدەرىمىز قارسىلاستارىن 2:0 ەسەبىمەن جەڭدى. الدىمەن، 11-مينۋتتا حودجيمات ەركينوۆ ماتچتاعى ەسەپتى اشتى. 45-مينۋتتا ەلدور شومۋرودوۆ ەكىنشى گولدى سوقتى»، – دەپ جازادى سايت.

ودان كەيىن شاعىن حاباردا: «وسىلايشا سرەچكو كاتانەتستىڭ شاكىرتتەرى جەڭىسكە جەتتى. قولداعى مالىمەتتەرگە قاراعاندا، ءبىزدىڭ وكىلدەرىمىز 20 قاراشادا رەسەي قۇراماسىمەن ويناۋ ءۇشىن الاڭعا شىعادى»، – دەپ تۇيىندەلەدى.

سايت تىلشىلەرى ماتچتان كەيىن وزبەكستان ۇلتتىق قۇراما كومانداسىنىڭ كاپيتانى جانە يتالياننىڭ «روما» كلۋبىنىڭ شابۋىلشىسى ەلدور شومۋرودوۆتان تومەندەگىدەي سۇحبات الدى.

– قارسىلاستارىڭىزدىڭ ويىن دەڭگەيى جونىندەگى پىكىرىڭىز قانداي؟

– اۋەلى مەن كۇننىڭ سۋىقتىعىنا قاراماستان، ويىندى كورۋگە كەلگەن جانكۇيەرلەرگە العىس ايتىپ الايىن. ويىنعا كەلسەك، ءبىز ءوزىمىزدى جاقسى جاعىنان كورسەتە بىلدىك. ءوزىمىز الدىن الا ويلاستىرعان جوسپارىمىزدى ورىندادىق. سوندا دا بولسا، ولقىلىقتارىمىز بار. ولار تۇزەتىلۋگە ءتيىس. ال قازاقستان قۇراماسى وتە جاقسى ويىن كورسەتتى.

– ۇلتتىق قۇراما ساپىنداعى رەكوردتى جاڭارتۋ ءۇشىن سىزگە ەندى ءبىر گول سالۋ عانا قالدى. ءسىز وسىعان ۇمتىلىپ ءجۇرسىز بە؟

– ارينە، مەنىڭ دە تاريحتا قالعىم كەلەدى. وسى سەبەپتەن مەن رەكوردتى جاڭارتۋعا تىرىسامىن. قۇداي بۇيىرتسا، ونى دا جاسارمىن، سودان كەيىن يىقتان اۋىر جۇك الىنىپ، ويىن جەڭىلدەي تۇسەدى.

– الدا رەسەيمەن كەزدەسۋ تۇر. ءسىز رەسەيدە ويناپ كوردىڭىز، ولاردىڭ مۇمكىندىكتەرىن جاقسى بىلەسىز. جالپى، ءسىز بۇل ماتچ جونىندە نە ايتا الاسىز؟

– رەسەيمەن ويىن، بۇگىنگىگە قاراعاندا، ايتارلىقتاي قيىن بولىپ وتەدى. ەندىگى قارسىلاستارىمىز تەك دەنە كۇشى جاعىنان عانا ەمەس، سونىمەن قاتار تەحنيكالىق جاعىنان دە اناعۇرلىم كۇشتى.

– ءسىز نەگىزگى ماتچتاردا گول سوعىپ ءجۇرسىز. الداعى جوسپارلارىڭىز قانداي؟ دالىرەگى، ەگەر ءسىزدىڭ «روماداعى» احۋالىڭىز جايىنا كەلسەك.

– مەن قازىر ۇلتتىق قۇرامانىڭ ساپىندا ءجۇرمىن. «روما» تۋرالى ءازىر ەشتەڭە ايتا المايمىن.