SportPress.kz Qazaqstan sport jańalyqtary
Tashkent qalasynyń «Pahtakor» stadıonynda fýtboldan О́zbekstan men Qazaqstan qurama komandalary halyqaralyq joldastyq kezdesý ótkizip, matchtyń alań ıeleriniń jeńisimen aıaqtalǵany belgili.
Osy match týraly О́zbekstannyń Sport.uz saıty nebári bes sóılemnen ǵana turatyn habar berdi.
«Saıysta bizdiń ókilderimiz qarsylastaryn 2:0 esebimen jeńdi. Aldymen, 11-mınýtta Hodjımat Erkınov matchtaǵy esepti ashty. 45-mınýtta Eldor Shomýrodov ekinshi goldy soqty», – dep jazady saıt.
Odan keıin shaǵyn habarda: «Osylaısha Srechko Katanetiń shákirtteri jeńiske jetti. Qoldaǵy málimetterge qaraǵanda, bizdiń ókilderimiz 20 qarashada Reseı quramasymen oınaý úshin alańǵa shyǵady», – dep túıindeledi.
Saıt tilshileri matchtan keıin О́zbekstan ulttyq qurama komandasynyń kapıtany jáne ıtalıannyń «Roma» klýbynyń shabýylshysy Eldor Shomýrodovtan tómendegideı suhbat aldy.
– Qarsylastaryńyzdyń oıyn deńgeıi jónindegi pikirińiz qandaı?
– Áýeli men kúnniń sýyqtyǵyna qaramastan, oıyndy kórýge kelgen jankúıerlerge alǵys aıtyp alaıyn. Oıynǵa kelsek, biz ózimizdi jaqsy jaǵynan kórsete bildik. О́zimiz aldyn ala oılastyrǵan josparymyzdy oryndadyq. Sonda da bolsa, olqylyqtarymyz bar. Olar túzetilýge tıis. Al Qazaqstan quramasy óte jaqsy oıyn kórsetti.
– Ulttyq qurama sapyndaǵy rekordty jańartý úshin sizge endi bir gol salý ǵana qaldy. Siz osyǵan umtylyp júrsiz be?
– Árıne, meniń de tarıhta qalǵym keledi. Osy sebepten men rekordty jańartýǵa tyrysamyn. Qudaı buıyrtsa, ony da jasarmyn, sodan keıin ıyqtan aýyr júk alynyp, oıyn jeńildeı túsedi.
– Alda Reseımen kezdesý tur. Siz Reseıde oınap kórdińiz, olardyń múmkindikterin jaqsy bilesiz. Jalpy, siz bul match jóninde ne aıta alasyz?
– Reseımen oıyn, búgingige qaraǵanda, aıtarlyqtaı qıyn bolyp ótedi. Endigi qarsylastarymyz tek dene kúshi jaǵynan ǵana emes, sonymen qatar tehnıkalyq jaǵynan de anaǵurlym kúshti.
– Siz negizgi matchtarda gol soǵyp júrsiz. Aldaǵy josparlaryńyz qandaı? Dáliregi, eger sizdiń «Romadaǵy» ahýalyńyz jaıyna kelsek.
– Men qazir ulttyq quramanyń sapynda júrmin. «Roma» týraly ázir eshteńe aıta almaımyn.
