استانادا «جەڭىمپاز رۋحى» ۇلتتىق سپورت سىيلىعى بەرىلەدى

بۇگىن استانادا سپورت سالاسىنداعى جىلدىڭ تاڭداۋلى جۇلدەسى – «جەڭىمپاز رۋحى» ۇلتتىق سپورت سىيلىعىن تابىس ەتۋ ءراسىمى وتەدى.

سالتاناتتى كەش بارىسىندا مادەنيەت جانە سپورت مينيسترلىگى ۇزدىك سپورتشىلار، جاتتىقتىرۋشىلار، سپورت سالاسىنا قاتىستى مەكەمەلەردەگى وزگە دە مامانداردى، سپورت جۋرناليستەرىن ماراپاتتايدى. قازىلار القاسى جىلدى قورىتىندىلاپ، 2022 جىلعى ۇزدىكتەردىڭ اتىن اتايدى. بۇل تۋرالى

مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ «سپورتتى دامىتۋ ديرەكتسياسى» رەسپۋبليكالىق مەملەكەتتىك قازىنالىق كاسىپورنى حابارلادى.

بارلىعى 14 نوميناتسيا بويىنشا 20 ۇمىتكەرگە سىيلىق بەرىلەدى:

1) «جىلدىڭ ۇزدىك سپورتشىسى» — 2 نوميناتسيا

2) «جىلدىڭ ۇزدىك جاتتىقتىرۋشىسى» — 2 نوميناتسيا

3) «جىلدىڭ ۇزدىك اككرەديتتەلگەن سپورت فەدەراتسياسى»

4) «جىلدىڭ ۇزدىك سپورت مەكەمەسى»

5) «جىلدىڭ ۇزدىك سپورت ءوڭىرى»

6) «اۋىلداعى ۇزدىك جاتتىقتىرۋشىسى»

7) «دەنە شىنىقتىرۋ جانە سپورت ءبولىمىنىڭ ۇزدىك مامانى»

8) «جىلدىڭ ۇزدىك بالالار جاتتىقتىرۋشىسى»

9) «ويىن تۇرلەرى بويىنشا ۇزدىك سپورت كومانداسى»

10) «اۋىلداعى ۇزدىك دەنە شىنىقتىرۋ جانە سپورت ءبولىمىنىڭ ادىسكەرى»

11) «جىل جاڭالىعى – ۇزدىك سپورتشى»

12) «جىلدىڭ ۇزدىك مەتسەناتى»

13) «جاستار مەن جاسوسپىرىمدەر اراسىنداعى ۇزدىك سپورتشى»

14) «سەيداحمەت بەردىقۇلوۆ اتىنداعى ۇزدىك سپورت ءجۋرناليسى»  نوميناتسياسى

بۇل سىيلىقتىڭ ماقساتى – ەل سپورتىن دامىتۋعا ۇلەس قوسۋ، ناسيحاتتاۋ. ەندى قالىپتاسىپ كەلە جاتقان سپورتشىلاردى بيىك شىڭداردى باعىندىرۋعا ەل بولىپ جىگەرلەندىرۋ.

ماراپاتتاۋ كەشىنە ەسكەندىر يبراگيم، ايدانا مەدەنوۆا، داۆيد چارلين، «JUMYR QYLYSH» توبى،  گۇلنۇر ورازىمبەتوۆا، اقتوتى بولشوۆا سىندى وتاندىق ەسترادا ارتىستەرى قاتىسادى.

كەش جۇرگىزۋشىلەرى – سىرىم قاشقاباەۆ، گۇلميرا دايراباەۆا مەن سانجار ءمادي.

سىيلىق نومينانتتارىنىڭ ەسىمدەرى ماراپاتتاۋ راسىمىندە جاريالانادى.

ۋاقىتى: 22 جەلتوقسان، ساعات 18:00. بولاتىن جەرى: «قازمەديا ورتالىعى»، استانا قالاسى.

 

داستان كەنجالين،

استانا