ۋنيۆەرسيادا: قازاقستان حوككەيشىلەرى ءبىر تۋر قالعاندا پلەي-وففقا شىقتى

قىسقى ۋنيۆەرسيادادا شايبالى حوككەيدەن قازاقستان قۇراماسى ءتورتىنشى ويىنىن سلوۆاكياعا قارسى وتكىزءىپ، قارسىلاستارىن 4:0 ەسەبىمەن ۇتتى. وسىلايشا وتانداستارىمىز ءبىر تۋر قالعاندا پلەي-وفف باسەكەسىنە شىقتى.

قازاقستاندىق حوككەيشىلەر ۆ توبىندا وڭتۇستىك كورەيا، ۆەنگريا، ۇلىبريتانيا، سلوۆاكيا جانە اقش-پەن سىنعا تۇسۋدە. اتاپ ايتقاندا، 12 قاڭتاردا وڭتۇستىك كورەيانى – 5:1، ودان كەيىن ۆەنگريانى – 9:1، ۇلىبريتانيانى 15:1 ەسەبىمەن جەڭدى.

بۇگىنگى ويىندا قازاقستان قۇراماسىنان ماكسيم مۋحامەتوۆ (8-مينۋت)، ستانيسلاۆ الەكساندروۆ (10-مينۋت)، باتىرلان مۋراتوۆ (20-مينۋت) جانە ولەگ بويكو (29-مينۋت) شايبا سوقتى.

سلوۆاكيا قۇراماسى بۇعان دەيىن ۆەنگريانى – 4:0، ۇلىبريتانيانى – 14:0، اقش-تى 5:2 ەسەبىمەن جەڭگەن ەدى.

ەندى قازاقستان ستۋدەنتتەر قۇراماسى 18 قاڭتاردا اقش-قۇراماسىمەن كەزدەسەدى.

اتالعان توپتان العاشقى ەكى ورىنداعى قۇرامالار 21 قاڭتاردا وتەتىن جارتىلاي فينالعا جولداما الادى. فينال مەن ءۇشىنشى ورىن ءۇشىن ويىن 22 قاڭتار كۇنى بولادى.

شايبالى حوككەيدەن قازاقستان ستۋدەنتتەر قۇراماسى ءدۇبىرلى دوداعا توعىز مارتە قاتىستى. 1995 جىلى يسپانيانىڭ حاكا قالاسىندا چەمپيوندىق تۇعىرعا كوتەرىلسە، 1993، 2013، 2015، 2017 جىلداردا كۇمىس، 2007 جىلى قولا مەدال يەگەرى اتاندى.

داستان كەنجالين،

استانا