ەكىباستۇزدا تۇڭعىش رەت ساداق اتۋدان جارىستىڭ جالاۋى جەلبىرەدى (فوتو)

ەكىباستۇز قالاسىنداعى ءماشھۇر ءجۇسىپ اتىنداعى عىلىم مەكتەبىنىڭ بازاسىندا قازاقتىڭ ۇلتتىق سپورت ونەرىنىڭ ءبىرى — ساداق اتۋدان ەرەسەكتەر مەن جاسوسپىرىمدەر اراسىندا اشىق بىرىنشىلىك ءوتتى.

اشىق بىرىنشىلىكتى ۇيىمداستىرعان «زەردە» ماماندىرىلعان دارىندى بالالارعا ارنالعان ليتسەي-مەكتەبىنىڭ دەنە تاربيەسى مۇعالىمى  نۇربەك مۇقىشەۆتىڭ ايتۋىنشا، اتالعان مەكتەپتە وقۋشىلار اراسىندا ساداق اتۋ ۇيىرمەسىنىڭ اشىلعانىنا ەكى جىل بولدى. بىلتىر ءتورت وقۋشى قاراعاندىدا وتكەن رەسپۋبليكالىق تۋرنيردەن ولجالى ورالدى. ەكى جىل تالماي، جۇيەلى  ەڭبەك ەتۋدىڭ ارقاسىندا ساداق اتۋ ۇيىرمەسى قازاقستان ءداستۇرلى ساداق اتۋ فەدەراتسياسىنان «سارساداق قونىس» مەرگەندەر كلۋبىنىڭ  ليتسەنزياسىن الدى.

ال العاش رەت وتكەن اشىق بىرىنشىلىكتىڭ وزىنە كەلسەك، ونىڭ اشىلۋ سالتاناتىندا ەكىباستۇز قالاسى اكىمدىگىنىڭ مادەنيەت جانە تىلدەردى دامىتۋ، دەنە شىنىقتىرۋ، سپورت ءبولىمىنىڭ باسشىسى مەدعات ماناپوۆ ءسوز سويلەپ، جاس ساداقشىلارعا اقجولتاي تىلەك ايتتى. سودان كەيىن جاڭادان اشىلىپ، كوپسالالى باعىتتا جۇمىس ىستەپ كەلە جاتقان ءماشھۇر ءجۇسىپ اتىنداعى عىلىم مەكتەبىنىڭ قۇرىلتايشىسى ەرلان امانجول ۇلى ءسوز الىپ، ۇلتتىق رۋحتىڭ اسقاقتاۋىنا ءداستۇرلى ۇلتتىق ويىنداردىڭ ماڭىزى زور ەكەنىن اتاپ ءوتتى.

اشىق بىرىنشىلىككە ەلىمىزدىڭ جەر-جەرىنەن كوماندالىق جانە جەكەلەي سىندا 120 سپورتشى قاتىستى. اتاپ ايتساق، ەكىباستۇز، پاۆلودار، سەمەي، قاراعاندى، استانا، ماڭعىستاۋ، اتىراۋ قالالارىنان، اقسۋ-ايۋلى، بۇقار-جىراۋ اۋداندارى (قاراعاندى وبلىسى)، اياگوز (اباي وبلىسى)، اقكول (ەكىباستۇز اۋدانى)، باياناۋىل جانە باياناۋىل اۋدانىنىڭ مايقايىڭ، قۇندىكول، ەگىندىبۇلاق اۋىلدارىنان ءجاسوسپىرىم وقۋشىلار كوماندالارى باق سىنادى. سونىڭ ىشىندە بىرىنشىلىككە 7 جاسار نۇرالي سەرىك تە قاتىستى.

ويىن ءتارتىبى بويىنشا 10 جاسقا دەيىنگى بالالار 10 مەترلىك قاشىقتىقتان ادىرناسىن ون رەت تارتىپ، ەكى اينالىم نىسانا كوزدەدى. وسى تارتىپتە 10-15 جاس ارالىعىنداعى ۇل جانە قىز بالالار سايىسقا ءتۇستى. ەرەسەكتەر 20، 25، 30 مەتر قاشىقتىقتان جامبى اتتى. ويىن ءسات سايىن قىزا ءتۇستى.  ساداعىن شىرەنە تارتقان سپورتشىلار تۇگىلى جانكۇيەرلەردىڭ دەلەبەسى قوزدى. ساداق تارتىپ قىزىقتاعان  جانكۇيەر: «جەبەنى شىرەنە تارتىپ، ساداقتىڭ شىقىرلاعان داۋىسىن، جەبەنىڭ سۋىلداپ ۇشقانىن ەستىگەندە ارقا قوزىپ، بويىڭدى تىلسىم ءبىر كۇش كەرنەيدى ەكەن»، — دەپ ايتىپ جاتتى.

جارىس بارىسىندا جەڭىمپازدارعا كۋبوكتار مەن اقشالاي دەمەۋشىلىك كورسەتكەن وڭىرلىك كاسىپكەرلەر مەن شارۋا قوجالىقتارى، «كازليدەرمەح» جشس باسشىسى نۇرمان باتتالعازى ۇلىنا، مارات سەرىك ۇلىنا جانە قالالىق دەنە تاربيەسى باعىتىنىڭ ادىسكەرى ازامات دۇيسەنباي ۇلىنا العىس ايتامىز. تۋرنير ناۋرىز مەرەكەسىنە ءدوپ كەلگەندىكتەن  كيىز ءۇي تىگىلىپ، اس تارتىلىپ، قىمىز، ناۋرىزكوجە بەرىلۋى دە الىستان كەلگەن قوناقتارعا دەگەن قۇرمەت ەدى.

ساداق اتۋ ويىنى پاۆلودار وڭىرىندە كسرو كەزىندەگى جەتپىس جىلدا، ودان كەيىنگى وتىز جىلدا العاشقى رەت قولعا الىنىپ وتىرعانىن ەسكەرۋ كەرەك.  دەسەك تە  قولداۋ تاپقانىنا قۋانامىز. شۇرايلى قونىس، القاپتى جايىلىم ءۇشىن جان الىسىپ، جان بەرىسكەن زاماندا ەرتىس-بايان وڭىرىنەن شىققان باتىرلاردىڭ ەرلىگى ءسوزسىز. بىراق قازىرگى تاڭدا ءبىرىن بىلسەك، ءبىرىن بىلمەي جاتامىز. سولاردىڭ ءبىرى ءماشھۇر ءجۇسىپ كوپ تومدىقتارىندا ەرلىگى حاتتالعان باياناۋىل-شىدەرتى دالاسىنداعى قاندى قاقتىعىستا كوزگە تۇسكەن، قۇرالايدى كوزگە اتقان مەرگەن، ساداقشى قونىس باتىر بولعان ەكەن. سول مايداننان كەيىن جۇرت مەرگەندىگىن دارىپتەپ، سارساداق قونىس دەپ اتاپ كەتسە كەرەك.

وسى وڭىردەن شىعار بولاشاق ەلىمىزدىڭ جانە حالىقارالىق تۋرنيرلەردە توپ جارار جەتكىنشەكتەردى اتا-بابالارىنىڭ ارۋاعى جەلەپ-جەبەپ ءجۇرسىن دەگەن ىرىمنىڭ نىشانى رەتىندە مەرگەندەر كلۋبىن «سارساداق قونىس» اتادىق دەيدى، — دەدى نۇربەك مۇقىشەۆ.

جارىستا ەرەسەكتەر اراسىندا باس جۇلدەنى سەمەي قالاسىنىڭ «الاش» ساداق اتۋ كلۋبىنىڭ مۇشەسى دۋلات قىساتاي جەڭىپ السا، ءبىرىنشى ورىندى قاراعاندىنىڭ وكىلى، «قايرات» ۇلتتىق جانە ات سپورتى تۇرلەرى مەكتەبىنىڭ وكىلى نيكيتا چەرنيكوۆ يەلەندى. ال جانكۇيەرلەر الداعى ۋاقىتتا سالقار ونەر ساداق اتۋ سپورتىن بۇدان دا بيىك دەڭگەيدە كورىنەتىنىنە سەنىم ءبىلدىرىپ، اشىق بىرىنشىلىكتى جالعىز ءوزى ۇيىمداستىرعان نۇربەك مۇقىشەۆكە العىس ايتتى.

 

قارشىعا مۇقىش،

فوتو: اۆتور

استانا

اشىق بىرىنشىلىك باستالار الدىندا

ساداعىن شىرەنە تارتقان سپورتشىلار

جەتى جاسار مەرگەن نۇرالي نۇربەك ۇلى سەرىك

ءتيدى!!!

ەرەسەكتەر اراسىندا باس جۇلدەنى سەمەي قالاسىنىڭ «الاش» ساداق اتۋ كلۋبىنىڭ مۇشەسى دۋلات قىساتاي جەڭىپ الدى

«قازاقتىڭ ساداق اتۋ ونەرىنە ءتانتىمىن»، دەيدى «قايرات» ۇلتتىق جانە ات سپورتى تۇرلەرى مەكتەبىنىڭ وكىلى نيكيتا چەرنيكوۆ

تۇڭعىش اشىق بىرىنشىلىكتى ۇيىمداستىرۋشى نۇربەك مۇقىشەۆ بالاسى نۇرالي سەرىكپەن بىرگە