Álem chempıonatyna ózge el atynan qazaq boksshylar qatysyp jatyr

О́zbekstannyń astanasy – Tashkent qalasynda bokstan eresekter arasynda ótip jatqan álem chempıonatyna ózge memleketterdiń atynan tegi qazaq boksshylary da kúsh synasyp jatyr. Olar Qytaı, Bahreın, О́zbekstan men Mońǵolııa ulttyq quramalarynyń sapynda jarysqa qatysýda.

Qytaı Halyq Respýblıkasynyń quramynda tegi eki qazaq bylǵary qolǵap ıesi bar. Olar 80 keli salmaqtaǵy Tańathan Toqtarbek (Tanglatihan Tuohetaerbieke) men asa aýyr salmaqtaǵy Danabek Baıǵazy (Danabieke Bayikewuzi). Jaqshanyń ishinde olardyń rıngke kóteriler aldynda aǵylshyn tilinde jazylǵan aty-jóni berilgen.

Bul ekeýi de álem chempıonatyndaǵy alǵashqy jekpe-jegin sátti ótkizdi. Tańathan Toqtarbektiń jasy – 26-da. Ol Japonııanyń Tokıo qalasynda ótken Olımpııalyq oıyndarǵa qatysqan. О́z salmaǵynda QHR chempıony atanǵan. Boksshy birinshi jekpe-jeginde Armenııanyń ókili Hambardzým Akopıandy jeńdi.

Qytaıdyń atynan sharshy alańǵa shyǵyp jatqan taǵy bir qandasymyz Danabek Baıǵazy da birinshi kezdesýinde jeńiske jetti. Ol 1/32 fınalda taǵy bir Armenııanyń sportshysy Davıd Chaloıandy utty. Danabek — álem chempıonatynyń kúmis júldegeri.

Bahreın quramasynda 51 keli salmaqtaǵy Azat Mahmetov (Azat Makhmetov) qolǵap túıistirip jatyr. Ol Qazaqstanda týǵan. Sońǵy eki jyldan beri Bahreınde turady. Osy eldiń azamattyǵyn alǵan.

О́zbekstan komandasynda 63,5 keli salmaqtaǵy tegi Rýslan Abdýllaev (Ruslan Abdullaev) degen qandasymyz bar. Ol álem chempıonatynda altyn júldege úmitkerlerdiń biri bolyp sanalady. Rýslan osydan úsh jyl buryn Qazaqstanǵa oralyp, Shymkent qalasy atynan jastar arasyndaǵy Qazaqstan chempıonatyna qatysqan. Biraq elde bir-aq jyl bolyp, qaıta О́zbekstanǵa qonys aýdarǵan. Qazir osy eldiń nómiri birinshi boksshysy.

Mońǵolııa quramasynda 92 keli salmaqtaǵy Beknur Qalı (Byeknur Khali) jarysqa qatysyp otyr.

Bıylǵy álem chempıonatynda qazaq jattyqtyrýshylary da ózge eldiń ulttyq quramalaryn jattyqtyryp jatyr. Mysaly, Bolat Nııazymbetov dodaǵa Serbııa komandasyn bastap kelse, Marokkonyń boksshylaryn Qazaqstanǵa eńbek sińirgen jattyqtyrýshy Erik Alǵabek alyp keldi.

Sonymen birge  Mońǵolııa quramasynda Qaınar Qaısanaı, Túrikmenstan jasaǵynda Teńelbek Jumaqulov, Túrkııa komandasynda Erǵalı Bekmurzaev degen jattyqtyrýshylar bar.

Dastan KENJALIN,

ASTANA