الەم چەمپيوناتىنا وزگە ەل اتىنان قازاق بوكسشىلار قاتىسىپ جاتىر

وزبەكستاننىڭ استاناسى – تاشكەنت قالاسىندا بوكستان ەرەسەكتەر اراسىندا ءوتىپ جاتقان الەم چەمپيوناتىنا وزگە مەملەكەتتەردىڭ اتىنان تەگى قازاق بوكسشىلارى دا كۇش سىناسىپ جاتىر. ولار قىتاي، باحرەين، وزبەكستان مەن موڭعوليا ۇلتتىق قۇرامالارىنىڭ ساپىندا جارىسقا قاتىسۋدا.

قىتاي حالىق رەسپۋبليكاسىنىڭ قۇرامىندا تەگى ەكى قازاق بىلعارى قولعاپ يەسى بار. ولار 80 كەلى سالماقتاعى تاڭاتحان توقتاربەك (Tanglatihan Tuohetaerbieke) مەن اسا اۋىر سالماقتاعى دانابەك بايعازى (Danabieke Bayikewuzi). جاقشانىڭ ىشىندە ولاردىڭ رينگكە كوتەرىلەر الدىندا اعىلشىن تىلىندە جازىلعان اتى-ءجونى بەرىلگەن.

بۇل ەكەۋى دە الەم چەمپيوناتىنداعى العاشقى جەكپە-جەگىن ءساتتى وتكىزدى. تاڭاتحان توقتاربەكتىڭ جاسى – 26-دا. ول جاپونيانىڭ توكيو قالاسىندا وتكەن وليمپيالىق ويىندارعا قاتىسقان. ءوز سالماعىندا قحر چەمپيونى اتانعان. بوكسشى ءبىرىنشى جەكپە-جەگىندە ارمەنيانىڭ وكىلى حامباردزۋم اكوپياندى جەڭدى.

قىتايدىڭ اتىنان شارشى الاڭعا شىعىپ جاتقان تاعى ءبىر قانداسىمىز دانابەك بايعازى دا ءبىرىنشى كەزدەسۋىندە جەڭىسكە جەتتى. ول 1/32 فينالدا تاعى ءبىر ارمەنيانىڭ سپورتشىسى داۆيد چالوياندى ۇتتى. دانابەك — الەم چەمپيوناتىنىڭ كۇمىس جۇلدەگەرى.

باحرەين قۇراماسىندا 51 كەلى سالماقتاعى ازات ماحمەتوۆ (Azat Makhmetov) قولعاپ ءتۇيىستىرىپ جاتىر. ول قازاقستاندا تۋعان. سوڭعى ەكى جىلدان بەرى باحرەيندە تۇرادى. وسى ەلدىڭ ازاماتتىعىن العان.

وزبەكستان كومانداسىندا 63،5 كەلى سالماقتاعى تەگى رۋسلان ابدۋللاەۆ (Ruslan Abdullaev) دەگەن قانداسىمىز بار. ول الەم چەمپيوناتىندا التىن جۇلدەگە ۇمىتكەرلەردىڭ ءبىرى بولىپ سانالادى. رۋسلان وسىدان ءۇش جىل بۇرىن قازاقستانعا ورالىپ، شىمكەنت قالاسى اتىنان جاستار اراسىنداعى قازاقستان چەمپيوناتىنا قاتىسقان. بىراق ەلدە ءبىر-اق جىل بولىپ، قايتا وزبەكستانعا قونىس اۋدارعان. قازىر وسى ەلدىڭ ءنومىرى ءبىرىنشى بوكسشىسى.

موڭعوليا قۇراماسىندا 92 كەلى سالماقتاعى بەكنۇر قالي (Byeknur Khali) جارىسقا قاتىسىپ وتىر.

بيىلعى الەم چەمپيوناتىندا قازاق جاتتىقتىرۋشىلارى دا وزگە ەلدىڭ ۇلتتىق قۇرامالارىن جاتتىقتىرىپ جاتىر. مىسالى، بولات نيازىمبەتوۆ دوداعا سەربيا كومانداسىن باستاپ كەلسە، ماروككونىڭ بوكسشىلارىن قازاقستانعا ەڭبەك سىڭىرگەن جاتتىقتىرۋشى ەرىك العابەك الىپ كەلدى.

سونىمەن بىرگە  موڭعوليا قۇراماسىندا قاينار قايساناي، تۇرىكمەنستان جاساعىندا تەڭەلبەك جۇماقۇلوۆ، تۇركيا كومانداسىندا ەرعالي بەكمۇرزاەۆ دەگەن جاتتىقتىرۋشىلار بار.

داستان كەنجالين،

استانا