بوكس: بەسىنشى كۇنگى كورسەتكىش – ەكى جەڭىس، ءبىر جەڭىلىس

تاشكەنتتە ءوتىپ جاتقان بوكستان الەم چەمپيوناتىنىڭ بەسىنشى كۇنى ءبىزدىڭ ەكى اتلەت جەڭىسكە جەتىپ، ءبىر سپورتشىمىز جەڭىلىسكە ۇشىرادى. بۇل تۋرالى rast.kz حابارلادى.

بۇگىن 57، 80 جانە 92 كەلىلەرگە دەيىنگى سالماقتارداعى بىلعارى قولعاپ شەبەرلەرى شارشى الاڭدى شايقادى.

كۇندىزگى سەسسيادا 57 كەلىگە دەيىنگى سالماقتاعى سەرىك تەمىرجانوۆ 1/16 فينالدا ماليلىك ابدۋل كاريم باتحيليمەن جۇدىرىق ءتۇيىستىردى. ناتيجەسىندە ءبىزدىڭ جىگىت ۇپاي سانىمەن جەڭىسكە جەتتى. ماليلىك بوكسشى وسى چەمپيوناتتىڭ اشىلۋىنداعى ءبىرىنشى جەكپە-جەككە شىعىپ، مولدوۆان قارسىلاسىن جەڭىپ كەتكەن بولاتىن.

كەشكى سەسسيادا ءبىرىنشى بولىپ 80 كەلىگە دەيىنگى سالماقتاعى نۇربەك ورالباي 1/16 فينالدا ازەربايجان مۋراد اللاحۆەرديەۆپەن كەزدەستى. ءبىزدىڭ وعلان قارسىلاسىنان ءۇش راۋندتا دا باسىم بولدى. سوندىقتان ونىڭ جەڭىسى ەش كۇمان تۋعىزبادى. ەسەپ – 5:0. ونىڭ سىڭارى – 92 كەلىگە دەيىنگى سالماقتاعى ايبەك ورالباي 1/16 فينالدا يتاليالىق ازيز اببەس موۋحيدينمەن قولعاپ ءتۇيىستىردى. وكىنىشتىسى، قازاقستاندىق سپورتشى قاشىپ ءجۇرىپ ۇرىس سالعان باسەكەلەسىنە قارسى ايلا تاپپادى. ول ەكىنشى راۋندتا عانا باسىمدىققا جەتتى. بىراق ءۇشىنشى راۋندتا تارازى باسىن بۇرىپ كەتە المادى. قورىتىندىدا 0:4 ەسەبىمەن جەڭىلىس تاپتى.

وسى كۇنى قىتاي قۇراماسى ساپىنداعى تاعى ءبىر قازاق جىگىتى – 80 كەلىگە دەيىنگى سالماقتاعى تاڭاتقان توقتاربەك ماروككولىق موحامەد ءاسساچيردى نوكاۋتپەن جەڭدى.

وزبەكستاننىڭ ءبىرىنشى بوكسشىسى جارىس جولىنان شىعىپ قالدى. ول – جاسۋربەك يۋلداشەۆ 80 كەلىگە دەيىنگى سالماقتا يوردانيالىق حۋسسەين ەيشايش ياشايشتان ۇتىلدى.

ەندى سەرىك تەمىرجانوۆ 7 مامىردا ۆەنگەر رولاند ۆەرەسپەن 1/8 فينالدا كەزدەسەدى، نۇربەك ورالباي 8 مامىردا تۇرىك ايكۋتسىن كاانمەن 1/8 فينالدا شايقاسادى.

بۇگىن جارىس جولىن اياقتاعان ايبەك ورالبايدى قوسقاندا، وسى كەزگە دەيىن قازاقستان قۇراماسى ساپىنان ءۇش بوكسشى چەمپيوناتتان شىعىپ قالىپ وتىر. ايبەك مۇنىڭ الدىندا، 1 مامىر كۇنى 1/32 فينالدا بولگار رادوسلاۆ پانتەلەەۆتى تىزە بۇكتىرگەن ەدى.

باسقا ساتسىزدىكتەرىمىزگە كەلسەك، بۇرناعى كۇنى 60 كەلىگە دەيىنگى سالماقتاعى تالعات سىرىمبەتوۆ يوردانيالىق ازيا چەمپيونى موحاممەد ابۋ دجادجەدكە ەسە جىبەرىپ الدى. ول 1 مامىر كۇنى 1/32 فينالدا تاي ساكدا رۋامتحامدى 5:2 ەسەبىمەن ۇتقان. ال كەشە 63،5 كيلوعا دەيىنگى سالماقتاعى ءساناتالى تولتاەۆ ماۆريكيلىك ريچارنو كولين لۋيستەن ۇتىلىپ قالدى. ول 2 مامىر كۇنى 1/32 فينالدا يزرايلدىك احماد ءشتيۆيدى جارىس جولىنان شىعارىپ تاستاعان-تىن.

ەرتەڭ، 6 مامىر، چەمپيوناتتىڭ التىنشى كۇنى 63،5، 67، 71 كەلىگە دەيىنگى سالماقتارداعى اتلەتتەر كۇش سىناسادى. بىزدەن دۋلات بەكباۋوۆ (67 كگ) پەن 71 اسلانبەك شىمبەرگەنوۆ (71 كگ) تاشكەنت رينگىندەگى ءبىرىنشى ۇرىستارىن وتكىزەدى. اتاپ ايتقاندا، دۋلات – رۋمىنيالىق اندرەي مۋستەتپەن، اسلانبەك ترينيداد جانە توباگو وكىلى اارون پرينسپەن كۇش سىناسادى. ەكەۋى دە كۇندىزگى سەسسيادا ونەر كورسەتەدى.

كۇندىزگى سەسسيا شايقاستارى – ساعات 14:00-16:30، كەشكى سەسسيا ساعات 18:00-20:30 ارالىعىندا وتەدى.

سول ۋاقىتتاردا Qazsport تەلەارناسىنان تىكەلەي ەفيردە كورسەتىلەدى.