رىباكينا ريم WTA 1000 ءتۋرنيرىنىڭ چەمپيونى اتاندى

قازاقستاننىڭ ءبىرىنشى، الەمنىڭ 6-راكەتكاسى ەلەنا رىباكينا ريم WTA 1000 ءتۋرنيرىنىڭ چەمپيونى اتاندى، دەپ حابارلادى قازاقستان تەننيس فەدەراتسياسى.

رىباكينا فينالدا الەمنىڭ 47-راكەتكاسى، ۋكراينالىق انگەلينا كالينينامەن باس جۇلدەنى ساراپقا سالدى.

قارسىلاستار وسىعان دەيىن ءوزارا ءبىر رەت جولىعىپ، وندا ۋكراينالىق تەننيسشى جەڭىسكە جەتكەن ەدى.

بۇل جولى كالينينا ماتچتى بىردەن برەيكپەن باستادى – 2:0. دەگەنمەن ەلەنا تارازى باسىن تەڭەستىرىپ، ءوزى العا شىقتى – 4:3. سوسىن ءبىر ساعاتقا جۋىق ۋاقىتقا سوزىلعان سەتتى برەيكپەن ءبىتىردى – 6:4.

ەكىنشى پارتيا باسىندا ەسەپ 0:1 بولعاندا، ۋكراينالىق تەننيسشى باسەكەنى جالعاستىرۋدان باس تارتتى.

ءبىر ساعات 3 مينۋتقا سوزىلعان ماتچتا رىباكينا 3 ەيسپەن بىرگە 9 برەيك-پوينتتىڭ ەكەۋىن پايدالاندى.

وسىلايشا، ول ءوز سپورتتىق جولىندا العاش رەت ريم ماستەرس ءتۋرنيرىنىڭ چەمپيونى اتاندى.

الداعى دۇيسەنبىدە جاڭارتىلاتىن الەمدىك رەيتينگىدە قازاقستاندىق تەننيسشى 4-ورىنعا كوتەرىلەدى.