Sanjar Táshkenbaı ákesine kólik syılady (VIDEO)

Bokstan álem chempıony Sanjar Táshkenbaı ákesine kólik alyp berdi.

Assalaýmaǵaleıkúm, qazaq eli!
Allaǵa shúkir keshe asqar taý ákeshime bala kezden armandap júrgen syılyǵymdy syıladym. Eń birinshi osy kúnge jetkizgen Allaǵa sansyz shúkir
Ekinshi ata-anamyzdyń arqasy, barlyqtaryńyzǵa juǵysty bolsyn!, — dedi ol.

Sanjar Táshkenbaı 48 keli salmaqta 1-14 mamyr aralyǵynda О́zbekstannyń astanasy – Tashkent qalasynda bokstan eresekter arasynda ótken álem chempıonatyn jeńip alǵan bolatyn. Ol fınalda grýzııalyq Sahıl Alahverdobımen qolǵap túıistirip, tóreshilerdiń biraýyzdan sheshimimen 5:0 esebimen qarsylasyn jeńgen. Osylaısha, ol 19 jasynda tuńǵysh ret álem chempıony atanyp, Qazaqstan qorjynyna alǵashqy altyn júldeni saldy.

Álem chempıonatynan oralǵannan keıin Sanjar ulttyq quramanyń basqa da boksshylarymen jáne jattyqtyrýshylarymen birge prezıdent Qasym-Jomart Toqaevtyń qabyldaýynda boldy. Boksshy álemdik dodadaǵy jeńisi úshin Halyqaralyq boks qaýymdastyǵynan 200 myń dollar, Qazaqstan boks federaııasy tarapynan 100 myń dollar aldy. Odan basqa Astana qalasynyń ákimdigi oǵan úsh bólmeli páterdiń kiltin tapsyrsa, jergilikti kásipker Beles qurylys kompanııasynyń dırektory Mahat Tóreáli boksshyǵa bir bólmeli páterdi syılap, astyna at mingizdi. Kásipker onyń jeke jattyqtyrýshysy Nurjan Nasanovqa da astyna sáıgúlik mingizip, qurmet kórsetti.

Buǵan deıin boksshy otbasymen birge 20 jyl ýaqyt páter jaldap kelgen bolatyn. Al onyń ákesi Táken Táshkenbaı taksıst bolyp jumys istegen edi. Sanjardyń anasy Halıda Ulybaeva ákesi sııaqty balasynyń jetistigine qýanyp, barlyq taraptan kórsetilgen qoldaýǵa alǵysyn bildirdi.

Dastan KENJALIN,

ASTANA

 

View this post on Instagram

 

A post shared by Sanjar Tashkenbaı (@tashkenbay_sanzhar)