تەننيسشى جىبەك قۇلامباەۆا ITF ءتۋرنيرىنىڭ شيرەك فينالىنا شىقتى

تەننيسشى جىبەك قۇلامباەۆا جۇپتىق سىندا تايلاندتا ءوتىپ جاتقان ITF ءتۋرنيرىنىڭ شيرەك فينالىنا شىقتى، دەپ حابارلادى قازاقستان تەننيس فەدەراتسياسى.

قۇلامباەۆا جارىستا 4-راكەتكا بولىپ تىركەلىپ، تايلاندتىڭ وكىلى لانلانا تارراۋديمەن بىرگە العاشقى اينالىمدا ءۇندى ليل دەساي مەن رەسەيلىك اناستاسيا سۋحوتينانى جەڭدى.

ماتچ ەكى سەتكە سوزىلىپ، 6:1، 7:5 ەسەبىمەن قۇلامباەۆا – تارراۋدي تاندەمىنىڭ پايداسىنا شەشىلدى.

ەندى ولار جارتىلاي فينالعا شىعۋ ءۇشىن تايبەيلىك يا سين لي مەن قىتايلىق ليۋ فانچجوۋمەن كەزدەسەدى.

سونىمەن بىرگە قازاقستاننىڭ ازاماتتىعىن العان الەكساندر شەۆچەنكو مەن ەلەنا رىباكينا وزدەرى قاتىسىپ جاتقان تۋرنيرلەردە كەلەسى اينالىمعا جولداما الدى. شەۆچەنكو نيدەرلاندتىڭ روتتەردام قالاسىندا جالاۋى جەلبىرەگەن ATP 500 ءتۋرنيرىنىڭ ەكىنشى اينالىمىنا شىقتى.

ول العاشقى ماتچتا الەمدىك رەيتينگىدە وزىنەن ون ساتى جوعارى تۇرعان قىتاي تەننيسشىسى چجان چجيچجەندى 6:4، 6:4، 6:3 ەسەبىمەن جەڭىسكە جەتتى.

ماچتا شەۆچەنكو 13 ەيسپەن بىرگە 8 برەيك-پوينتتىڭ تەڭ جارتىسىن ءمۇلت جىبەرمەدى. ال ويىن 2،5 ساعاتقا سوزىلدى. ەندى تەننيسشىگە شيرەك فينالعا شىعۋ ءۇشىن الەمنىڭ 7-راكەتكاسى، دانيالىق حولگەر رۋنە نەمەسە رەيتينگىدە 39-ساتىداعى رەسەيلىك رومان ءسافيۋلليننىڭ جەڭگەنىمەن تالاسادى.

ەلەنا رىباكينا كاتاردىڭ دوحا قالاسىندا  WTA 1000 ءتۋرنيرىنىڭ ءۇشىنشى اينالىمىنا شىقتى.

تەننيسشى جارىستىڭ 3-راكەتكاسى بولىپ تىركەلدى. ماچتا رىباكينا تەننيسشى دۇنيەجۇزىلىك رەيتينگىدە 57-ورىندا تۇرعان قىتايلىق چجۋ لينمەن وينادى.

وسىعان دەيىن قارسىلاستار ءوزارا ەكى رەت كەزدەسىپ، ءبىر-ءبىرىن جەڭگەن ەدى.

2019 جىلى اۋستراليا اشىق چەمپيوناتىندا قىتايلىق سپورتشى 6:2، 6:4 ەسەبىمەن باسىس تۇسسە، كەيىن سول جىلى قىركۇيەكتە رىباكينا  قىتايدىڭ ۋحاندا قارسىلاسىندا قارىمتا قايىردى. سول كەزدە ماتچ  7:5، 2:6، 6:0 بولىپ اياقتالدى.

بۇل جولى ەلەنا ماتچتى بىردەن برەيكپەن باستادى. ءسويتىپ، 2:0 ەسەبىمەن العا شىقتى.  سودان كەيىن سەتتى تاعى ءبىر برەيكپەن ءبىتىردى. ەسەپ — 6:2.

ەكىنشى جانە ءۇشىنشى پارتيادا دا وسىنداي ەسەپپەن اياقتالدى.

رىباكينا ءبىر ساعاتقا جەتپەيتىن ۋاقىتتا 7 ەيسپەن بىرگە 7 برەيك-پوينتتىڭ تورتەۋىن ءمۇلت جىبەرگەن جوق.

ەلەنا رىباكينا جۇلدە قورى 3،2 ملن اقش دوللارىنان اساتىن جارىستىڭ شيرەك فينالىنا شىعۋ ءۇشىن الەمنىڭ 23-راكەتكاسى، امەريكالىق ەمما ناۆاررومەن كەزدەسەدى.