استاناعا 60-تا استام ەلدىڭ مىقتى دزيۋدوشىلارى كەلەدى

استانادا 10-12 مامىردا دزيۋدودان الەمدىك رەيتينگتىك Qazaqstan Barysy Grand Slam ءتۋرنيرى وتەدى. بۇل جارىستا دزيۋدوشىلار پاريجدە وتەتىن ججازعى وليمپيالىق ويىندارعا ۇپاي جينايدى. سونىمەن بىرگە ول بيىلعى سوڭعى Grand Slam كەزەڭى بولادى، دەپ حابارلادى قازاقستان دزيۋدو فەدەراتسياسى.

قازاقستان دزيۋدو فەدەراتسياسىنىڭ حابارلاۋىنشا، تۋرنيرگە الەمنىڭ كىل مىقتىلارى كەلەدى.  بەلدەسۋلەر جاقسىلىق ۇشكەمپىروۆ اتىنداعى جەكپە-جەك سارايىندا وتەدى. بۇگىنگى كۇنگە جارىسقا 60-تان استام ەلدىڭ، سونىڭ ىشىندە الەمدىك رەيتينگ كوشباسشىلارى جاپونيا، وڭتۇستىك كورەيا، فرانتسيا مەملەكەتتەرىنىڭ سپورتشىلارى تىركەلگەن.

ەسكە سالا كەتەك، وسى دودانىڭ ناتيجەسىندە IJF ەرەجەلەرىنە سايكەس جارىستىڭ جەڭىمپازدارى مەن جۇلدەگەرلەرى اراسىندا الەمدىك جانە وليمپيادالىق رەيتينگتەردە ۇپايلار بولىنەدى. اتاپ ايتقاندا، ءبىرىنشى ورىن ءۇشىن 1 000، ەكىنشى ورىن ءۇشىن – 700، ال ۇشىنشى ورىن ءۇشىن – 500 ۇپاي ەسەپتەلەدى.

قازاقستان دزيۋدو فەدەراتسياسى مەن حالىقارالىق دزيۋدو فەدەراتسياسىنىڭ (IJF) ەكىجاقتى كەلىسىمشارتىنا سايكەس، قازاقستان الەمدىك Grand Slam جارىسىن 2026 جىلعا دەيىن وتكىزەدى.

Qazaqstan Barysy Grand Slam ءتۋرنيرىنىڭ تىكەلەي كورسەتىلىمى Qazsport تەلەارناسىنان بەرىلەدى.

10 مامىردا ايەلدەر 48 كگ، 52 كگ جانە 57 كەلىگە دەيىنگى سالماقتا كۇش سىناسسا، ەرلەر: 60 كگ جانە 66 كگ سالماقتا بەلدەسەدى.

11 مامىردا ايەلدەر 63 كگ جانە 70 كەلىگە دەيىنگى كاتەگوريادا، ەرلەر 73 كگ جانە 81 كگ سالماقتا ەل نامىن قورعايدى.

12 مامىردا ايەلدەر 78 كەلىگە دەيىنگى جانە 78 كەلىدەن اسا سالماقتا تاتاميگە شىعادى. ەرلەر 90-عا دەيىنگى سالماقتا، ەرلەر 100 جانە ودان كوپ سالماقتا جارىسقا تۇسەدى.