III تمد ەلدەرى ويىندارى: مەرگەندەر قورجىنعا ەكى مەدال سالدى

ازەربايجاندا باستالعان تمد ەلدەرىنىڭ III ويىندارىندا ستەند اتۋدان قازاقستان قۇراماسى ەكى جۇلدەنى جەڭىپ الىپ ۇلگەردى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

سكيت جاتتىعۋىندا ارالاس جۇپتىق سىندا ماكسيم پوچيۆالوۆ پەن ليديا باشاروۆا جۇبى اسا تارتىستى وتكەن فينالدا كۇمىس جۇلدەگەر اتاندى.

ميكستەن جۇلدەگەرلەر:

1. رەسەي
2. قازاقستان
3. ازەربايجان

ال تراپ جاتتىعۋىندا جەكەلەي سىندا نارگيزا سارمانوۆا قولا جۇلدەگە يە بولدى. ول فينالدا 30 ۇپاي جينادى. تاعى ءبىر وتانداسىمىز اناستاسيا پريلەپينا 6-ساتىعا تۇراقتادى.

تراپ باعدارلاماسىنىڭ جۇلدەگەرلەرى:

1. الينا احاتوۆا (رەسەي)
2. نارمين دجافاروۆا (ازەربايجان)
3. نارگيزا سارمانوۆا (قازاقستان)

ستەند اتۋدان جارىس 1 قازاندا مارەسىنە جەتەدى. سپورتتىڭ بۇل تۇرىنەن گابالا قالاسىندا 8 وتانداسىمىز جۇلدەگە تالاسىپ جاتىر. ولاردىڭ قاتارىندا بيىل شىمكەنتتە وتكەن ازيا چەمپيوناتىندا توپ جارعان انگەلينا سوروكينا، نارگيزا سارمانوۆا سىندى مەرگەندەر بار.