«Қызыл-Жар» клубы айыппұл арқалады

Қазақстан футбол федерациясы тергеуге көмектесуден бас тартқан «Қызыл-Жар» футбол клубын жазалау туралы шешім қабылдады.

Тергеу шілде айында Түркістан қаласында «Қызыл-Жар» мен «Тұран» клубтарының ойынына байланысты болып отыр. ҚФФ-ға матч алдын ала келісіп қойылған болуы мүмкін деген күдік тудырған.

-Осыған орай Қазақстан футбол федерациясының Бақылау, тәртіптік және этикалық комитетінің отырысы өтіп, «Тұран» клубымен матчқа байланысты қызметтік тергеу ісіне көмектесуден бас тартып, кедергі келтіргені үшін «Қызыл-Жар» футбол клубына жаза қолданылды. Яғни, клубқа 100 АЕК, яғни 393 200 теңге көлемінде айыппұл салынды. Бұл соманы 2025 жылдың 7 қарашасына дейін төлеу қажет, — делінген ҚФФ-ның хабарламасында.

Сонымен бірге клуб ҚФФ-ның Қауіпсіздік және интегрити қызметіне ойыншылардан, менеджерден, бапкерлік штабтан және матчқа қатысы бар адамдардан сұрақ-жауап алуға көмектесуге міндетті.

«Қызыл-Жар» футбол клубы ҚФФ шешімін орындамаған жағдайда қатаң шара қолданылады.

Оның ішінде ұпайлары алынып, клуб төменгі лигаға түсіріледі. Ойыншылар мен ресми азаматтарға футбол саласында жұмыс істеуге тыйым салынады.

Рүстем ЖҰМАН,

АСТАНА