SportPress.kz Qazaqstan sport jańalyqtary
Almatyda osymen ekinshi ret belgili sport kommentatory, aqyn, sóz zergeri Amangeldi Seıithanovty eske alýǵa arnalǵan shaǵyn fýtboldan respýbıkalyq týrnır bolyp ótti.
Bizde byltyrǵy ótken jarystaǵydaı bir komanda saılap aparyp alaman jýrnalıster jarysyna qosylǵan edik. «Sport jýrnalısteri» degen atpen synǵa shyqqan meniń komandam tamasha oıyn órnegin kórsetip, jarys bastalǵannan bastap kórermendi ózine birden baýrap aldy. Komandamyzdyń qurylýyna uıytqy bolyp shapqylap, jas ta bolsa bas bolyp júrgen Asqar Hamıdınov pen Ázız Jumádil baýyrlaryma aıtar alǵysym sheksiz. Astanadan jolyn taýyp «Aıbars» atty demeýshini taýyp barlyǵymyzǵa sport kıimderin alyp kelgen eken. Ústimizge sý jańa fýtbol formasyn kıgennen keıin, komanda oıynshylarynda ózgeshe rýh paıda bolyp jeńiske degen jigeri arta tústi.
Kún kóterilip qyzýy denege óte bastaǵan kezde jarystyń oıyndary toqtalyp ashylý saltanatyna jol berdi.
Týrnırdiń ashylýyna qatysqan Qazaqtyń sport jáne týrızım akademıasynyń rektory Qaırat Zakırıanov, «Habar» telearnasynyń dırektory Berik Ýálı, aty ańyz oıynshy Seıildá Baıshaqov, tanymal bylǵary qolǵap sheberi Qanat Islam, belgili sport qalamgeri Nesip Júnisbaıuly jáne Amangeldi Seıithanovtyń et jaqyn týystary Amangeldiniń ónegeli ómirinen sóz qozǵap, qatysýshylarǵa jeńisti oıyndar tiledi. «Shákirtsiz ustaz tul» degen babalarymyz, óziniń artyn izbasar shákirt qaldyrý ustaz úshin úlken maqtanysh. Aman ómirden ótse de artyna izdeýshisi bar aıtary kóp, jazary jarasymdy shákirt tárbıelep ketken jan. Olardyń arasynda Jandos Aıtbaıulyn aıtsa bolady. Ustazynyń atyn óshirmeý shákirtke úlken syn. Sondyqtanda Jandos ustazynyń atyndaǵy jarystyń oıdaǵydaı atqarylyp ótýine baryn salyp shapqylap, jarǵaq qulaǵy jastyqqa tımeı zor úlesin qosyp júrgen azamat ekenin aıta ketkenimiz oryndy bolar.
Jarystyń saltanatty ashylýy aıaqtala salyp qatarlas jatqan qos alańda tartysty kezdesýler jalǵasty. Yntymaǵy jarasyp, birligi uıysqan bizdiń komandamyz da sheberligi jaǵynan da qur qol emes ekendikterin oıyn barysynda tamasha kórsete bildi. Aldymen «31 telearna» komandasyn 1:0 esebimen, sosyn «Túrkistan» komandasyn dál osyndaı eseppen utyp, jeńisti jolymyzdy jalǵastyrdyq. Sońǵy oıyndy teń oınap 1/8 fınalyna tobyzdan birinshi orynmen shyqtyq. Sóıtip, Qyzylordadan kelgen «Aqmeshit» komandasymen negizgi oıynda ýaqytynda teń túsip, penaltıden Syr óńirinen kelgen qonaqtarǵa jol berdik.
Iá, penaltı degen ol bir lotoreıa. Kimniń joly bolsa sol ústem bolary belgili. Sonshama jerden at terletip jetken qyzylordalyqtarǵa Jaratýshy ıemiz de meıirimmen qarasa kerek, bul komanda fınalda da «Qazmedıa» komandasyn penaltıden utyp ketti. Al, bizdiń komanda úshinshi oryn úshin «Atyraý» komandasymen alańǵa shyqqan edi. Keskilesken kezdesý ońaıǵa túspedi. Kún uzaq ábden qaljyrap sharshaǵan oıynshylarymyz jeńisti julyp alýǵa shara jetpedi. Esep 3:1 bolyp Syr óńirinen kelgen jigitterdiń jeńisimen aıaqtaldy.
Hosh, qalaı desek te, killi 30-dan asyp, orda buzǵan qalamgerlerden quralǵan bizdiń «Sport jýrnalısteri» komandasy Aman dosymnyń rýhyna arnalǵan respýblıkalyq jarysta 16 komandanyń ishinen oıyp turyp tórtinshi orynǵa ıe boldy. Iá, júldege súıem jer qalǵanda súrindik. Degenmen halyqtyń ystyq yqylasyna bólenýdiń ózi úlken maqtanysh dep bilemin. Komanda jigitteri jan aıamaı jeńis úshin baryn saldy. Negizi, bıylǵy jarysty uıymdastyrýdy óz qamqorlyǵyna alǵan «Habar» telaranasy men onyń basshysy Berik Ýálıdiń týrnırdi ótkizýge asqan jaýapershilikpen qaraǵandyǵy kórinip turdy.
Berik Ýálımen erterekte sport jýrnalıstıkasynyń aqtańger atasy Seıdahmet Berdiqulovtyń atynda ótetin dástúrli respýblıkalyq týınırdiń alańynda jıi kezdesip, talaı ret teńbil dopty birge tepken edik. Berik sol jyldary qalamgerler arasynda fýtboldy sheber oınaıtyn oıynshynyń bir edi. «Syrly aıaqtyń syry ketse de syny ketpeıdi», demekshi, arada jyldar zýlap ótse de boıda qalyptasyp qalǵan sheberligi áli sol saqtalyp qalǵandyǵynyń kýási boldym. Áriptesimniń elge málim úlken telearna ujymnyń basshysy bola turyp, teńbil dopty urshyqsha ıirip alyp, sheber oınaıtyn oıynshy ekenin tamasha soqqan goldarymen kórsete bildi. Osylaısha, Berik Ýálıdiń jarysty uıymdastyryp qana qoımaı, jasyl alańda belsene áriptesterimen jan aıamaı ıyq qaǵysyp kórsetken ónerine tánti boldyq. Osylaısha, áriptesimizdiń Amangeldi Seıithanov marqumǵa degen zor qurmetiniń arqasynda týrnır joǵary deńgeıdi ótip, qatysýshylardyń barlyǵy júldesiz úıine qaıtpady.
Úzdik oıynshylar nomınaııasynda bizdiń «Sport jýrnalısteri» komandasynyń qaqpashysy da marapatqa ıe bolyp, týrnırdiń úzdik qaqpashysy ataǵyna ıe boldy. Sondaı-aq, bizdiń komandaǵa 100 myń teńge syıaqy berildi. Buryn-sońdy tórtinshi orynǵa qarjy kólemi berilip kórmegendikten uıymdastyrýshylar alqasyna, komandamyzdy elep eskerip bergen osyndaı qarjylaı qurmetine zor alǵysymyzdy jetkizdik. Sonymen 500 myń teńge men bas kýbokty Syr óńirinen kelgen «Aqmeshit» komandasy jeńip alsa, júldeli ekinshi oryndy alǵan «Qazmedıa» komandasyna 300 myń teńge syıaqy berildi. Týrnırdiń qola júldesi 200 myń teńgedeı syıaqa alǵan «Atyraý-Aqparat» komandasy marapattaldy.
Jarys sońynda barsha qatysýshylar estelikke sýretke birin-biri tartyp qımaı qoshtasyp ketip jatty. «О́li razy bolmaı tiri baıymaıdy», deıdi babamyz. Qazaq sport jýrnalıstkasynda ózinshe iz qaldyrǵan belgili sport kommentatory, jeztańdaı aqyn,sóz zergeri ardaqty dosymyz Amangeldi Seıithanovty eske alýǵa arnalǵan dástúrli týrnır osylaı óz máresine jetti. Alla amandyǵyn berse aldaǵy jyly da bul jarys jalǵasyn tabar degen senimdemin!
Aqyn ORDABAIULY,
ALMATY
