Қаймағы бұзылмаған Қосағаш (ФОТО)

Моңғолияның Ұлан-Батыр, Налайх, Ховда, Баян-Өлгей аймақтарында болған кездесу Алтай Республикасының Қосағаш ауданында жалғасты.

Орыс, алтай, қазақ халықтарының татулықты ту еткен мекенінде құрамында «Отандастар» қорының президенті Абзал Сапарбекұлы және Парламент депутаттары Ғалиасқар Сарыбаев пен Болат Керімбек пен бір топ зиялы қауым өкілдері бар ресми делегацияны Қосағаш ауданының әкімі Серікжан Мұратханұлы мен аудан мәслихатының төрағасы Санаш Дидунов шекара шебінен қарсы алып, Алтай қазақтарының мұрасы сақталған Жаңа ауыл елдімекеніне алып барды. Делегация мүшелері өңірдің тұрмыс-тіршілігімен танысып, осындағы ұлттық құндылықтар дәріптелген мұражайды аралады.

Алтай Республикасында аумағы жағынан ең үлкен және үш бірдей елмен шекаралас жатқан (Моңғолия, Қазақстан, Қытай) Қосағаш ауданының халқы қазақы дәстүрі мен салтын жақсы сақтаған. Атап өтерлігі, Ресейдегі қазақ тілінде 1-5 сыныптарға арналған оқулық өткен жылы осы жерде ұстаздардың ұзақ жылғы еңбегімен осы ауданда қолданысқа енді.​

Халықпен кездесу, тұрғындармен тілдесу аудан орталығында орналасқан саябақта ресми делегациямен қатар жүрген қарағандылық «Тәттімбет» атындағы академиялық ұлттық аспаптар оркестрдің салтанатты концертімен жалғасты. Бұл іс-шаралар Ресей халқының Отбасы күнімен орайлас келді.

Қазақстан тәуелсіздік алғаннан бері алғаш рет осы деңгейде қазақша концерт тыңдаған Қосағаштықтар ерекше қуанышқа бөленіп, көздеріне жас алды. Атамекеннен алыста жатқан Алтай қазақтарының көңілі марқайып, рухы асқақтап, Қазақстанға дұғай сәлемдерін жеткізді.​

Іс-шара соңында аймақ халқының бірлігі, қазақ тілін сақтау жолында аянбай еңбек етіп жүрген Қосағаштағы қазақ мәдени орталығының басшысы Арқалық Сұлтанов Қазақстан президенті Қасым-Жомарт Тоқаевтың төс белгілі Алғыс хатымен марапатталды. Сонымен қатар аудан әкімі Серікжан Мұратханұлы мен аудан мәжіліс төрағасы Санаш Дидуновқа «Отандастар» қорының алғыс хаты мен «Алғыс» естелік медалі табыс етілді.

Басқосу аяқталып, делегация құрамы елге қайтар тұста «Қазақстан кетіп бара жатыр» — деп құшақтап, қимастықтың көз жасына ерік берген тұрғындар, ұзақ уақыт көз алмай жолға шыққан көлікке қарап тұрды.

«Otandastar qory» баспасөз қызметі

ФОТО:  «Otandastar qory» баспасөз қызметі