التاي ولكەسىنىڭ استاناسى بارناۋىلدا قازاق ءانى شىرقالدى

جۋىردا التاي ولكەسىنىڭ بارناۋىل قالاسىندا قاراعاندى وبلىسى «تاتتىمبەت» اتىنداعى اكادەميالىق ۇلتتىق اسپاپتار وركەسترىنىڭ « ۇلى دالا سازى» اتتى كونتسەرتى ءوتتى. 

تاتتىمبەت اتىنداعى اكادەميالىق وركەستر الەمنىڭ 40-تان استام ەلىندە گاسترولدىك ساپاردا بولىپ، الەمگە تانىلسا دا بارناۋلدا قازاقستاننىڭ سىرتقى ىستەر مينيسترلىگىنە قاراستى «وتانداستار» قورىنىڭ ۇيىتقى بولۋىمەن ءبىرىنشى رەت ونەر كورسەتتى.

كونتسەرتتىڭ وتۋىنە سەپتىگى تيگەن تاعى ءبىر ۇيىم – التاي ولكەسىندەگى قازاق ۇلتتىق اۆتونومياسى. اۆتونوميا جەتەكشىسى مۇرات بەكمۇراتوۆتىڭ ايتۋىنشا، ۇلتتىق اۋەندەر بابالار رۋحىن وياتادى. ءبىر جارىم ساعاتقا سوزىلعان كونتسەرتتىڭ سوڭىندا قانداستارىمىز «اتامەكەن» ءانىن قوسىلا شىرقادى.

تاتتىمبەت اتىنداعى اكادەميالىق وركەستر مۇشەلەرىنە التاي ايماعىنىڭ گۋبەرناتورى ۆيكتور تومەنكو، التاي ايماعىنىڭ زاڭ شىعارۋشى ورگانىنىڭ توراعاسى الەكساندر الەكسەەۆيچ رومانەنكو، بارناۋىل قالاسىنىڭ اكىمى ۆياچەسلاۆ گەنريحوۆيچ فرانك جانە بارناۋىل قالالىق دۋماسىنىڭ توراعاسى بۋەۆيچ گالينا الەكساندروۆنا ىستىق ىقىلاستارىن ءبىلدىرىپ، ارنايى گۇل شوقتارىن جىبەردى.

قازاقستان رەسپۋبليكاسى پارلامەنتىنىڭ دەپۋتاتتارى عالياسقار سارىباەۆ پەن بولات كەرىمبەك جانە جازۋشىلار بوتا بامان، ءجادي شاكەن ۇلى، كادىربەك قۇنىپيا ۇلى، جۋرناليست اۋىت مۇقيبەك ۇلى بار زيالى قاۋىم وكىلدەرى جەرگىلىكتى تۇرعىندارمەن تىلدەسىپ، ۇسىنىس پىكىرلەران تىڭدادى.

كونتسەرتتىڭ جابىلۋ سالتاناتىن تۇيىندەگەن «وتانداستار» قورىنىڭ پرەزيدەنتى ابزال ساپاربەك ۇلى ءوز سوزىندە ستراتەگيالىق ارىپتەس ەكى ەل اراسىندا ساياسي-ەكونوميكالىق، ينۆەستيتسيالىق ىنتىماقتاستىقپەن قاتار، مادەني-گۋمانيتارلىق بايلانىستار جوعارى دەڭگەيدە ەكەنىنە توقتالىپ، وسى كونتسەرت تە حالىقتار اراسىنداعى دوستىق قارىم-قاتىناسقا وڭ سەپتىگىن تيگىزەدى دەپ سەنىم ءبىلدىردى. جالپى، «وتانداستار» قورىنىڭ ەتنيكالىق قازاقتارمەن قاتار، كەزىندە قازاقستاندا تۋىپ وسكەن، كەيىننەن ءوز تاريحي وتانىنا ورالعان بۇرىنعى وتانداستارمەن دە جۇمىس جۇرگىزۋگە جاۋاپتى رەسمي مەكەمە ەكەنىن اتاپ ءوتتى.

سونداي-اق، قور باسشىسى ابزال ساپاربەك ۇلى التاي ولكەسىندەگى قازاق ۇلتتىق اۆتونومياسىنىڭ جەتەكشىسى مۇرات بەكمۇراتوۆتى قازاقستان رەسپۋبليكاسى پرەزيدەنتى قاسىم-جۇمارت كەمەل ۇلى توقاەۆتىڭ ءتوس بەلگىسىمەن جانە العىس حاتىمەن ماراپاتتادى. سونىمەن قاتار، بىرقاتار بەلسەندى ازاماتتارعا، اتاپ ايتقاندا، جانات مىرزاحمەت ۇلىنا، جانار سۇلەيمەنوۆاعا، باقىتجان سولتانعازينوۆاعا، ايدا رۋسلانقىزى بەكسۇلتانوۆاعا «وتانداستار» قورىنىڭ العىس حاتى مەن «العىس» ەستەلىك مەدالى تابىس ەتىلدى.

«Otandastar qory» ءباسپاسوز قىزمەتى

فوتو: «Otandastar qory» ءباسپاسوز قىزمەتى