پرەمەر-مينيستر بۇقارالىق سپورتتى دامىتۋدى تاپسىردى

پرەمەر-مينيستر ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا بۇقارالىق سپورتتى دامىتۋ جانە سالاماتتى ءومىر سالتىن قالىپتاستىرۋ ماسەلەلەرى قارالدى.

مادەنيەت جانە سپورت ءمينيسترى اسحات ورالوۆ رەسپۋبليكادا جىل سايىن 1،2 ملن ادامدى، ونىڭ ىشىندە اۋىلدىڭ 500 مىڭ تۇرعىنىن قامتيتىن ءتۇرلى دەڭگەيدەگى 25 مىڭنان استام بۇقارالىق سپورتتىق ءىس-شارالار وتكىزىلەتىنىن حابارلادى. سوڭعى جىلدارى مارافوندار، ۆەلوشەرۋلەر، وتباسىلىق جارىستار، بۇقارالىق كونكي تەبۋ مەن باسقا دا ءىس-شارالاردىڭ تانىمالدىعى ارتىپ كەلەدى. جالپى، بۇگىندە ەلىمىزدە دەنە شىنىقتىرۋمەن جانە سپورتپەن شۇعىلداناتىن ادامدارداردىڭ سانى 38%-دان اسادى (7،5 ملن-نان استام ادام).

سونىمەن قاتار ەلىمىزدە 800-دەن استام بالالار مەن جاسوسپىرىمدەر كلۋبى جۇمىس ىستەيدى. وتكەن وقۋ جىلىندا قوسىمشا ءبىلىم بەرۋ باعدارلاماسى بويىنشا مەكتەپتەردە 1،3 ملن-عا جۋىق بالا قامتىلعان 49 مىڭنان استام سپورت ۇيىرمەسى اشىلدى. سونداي-اق مەملەكەتتىك سپورت تاپسىرىسى شەڭبەرىندە بيىل 190 مىڭنان استام بالا سپورت ۇيىرمەلەرىمەن قامتىلعان.

مينيستر قازاقستاندا 43 مىڭعا جۋىق سپورت نىسانى بار ەكەنىن، ونىڭ 23 مىڭنان استامى اۋىلدىق جەرلەردە ورنالاسقانىن ايتتى. بيىل 113 جاڭا سپورت نىسانىن سالۋ، سونداي-اق 20 نىساندى كۇردەلى جوندەۋ جانە قولدانىستاعى 6 سپورت نىسانىن قايتا جاراقتاندىرۋ جۇمىستارى جۇرگىزىلىپ جاتىر. سونىمەن قاتار قىزمەت كورسەتىپ تۇرعان مەكەمەلەردى تۇگەندەۋ جۇمىستارى اتقارىلىپ، جوندەۋ ىستەرىنە جانە ءتيىستى قۇرال-جابدىقتارعا قاجەتتىلىك انىقتالىپ وتىر.

سونداي-اق الماتى وبلىسىنىڭ اكىمى مارات سۇلتانعازيەۆ، اقتوبە وبلىسىنىڭ اكىمى ەرالى توعجانوۆ، تۇركىستان وبلىسىنىڭ اكىمى دارحان ساتىبالدى وڭىرلەردە اتقارىلىپ جاتقان شارالار تۋرالى بايانداما جاسادى.

ۇكىمەت باسشىسى سپورت پەن بەلسەندى ءومىر سالتى ۇلت دەنساۋلىعىنىڭ كەپىلى عانا ەمەس، سونىمەن قاتار ءار ادامنىڭ تالانتى مەن قابىلەتىن اشاتىنىن اتاپ ءوتتى. بۇل اسىرەسە جاس ۇرپاقتى تاربيەلەۋ ءۇشىن وتە ماڭىزدى.

وسىعان بايلانىستى ول حالىقتىڭ بارىنە بىردەي قولجەتىمدى بولۋىن قامتاماسىز ەتۋ، سونداي-اق بۇقارالىق جانە تۇراقتى سپورتتىق ءىس-شارالاردى ۇيىمداستىرۋ ارقىلى ازاماتتاردى سپورتپەن شۇعىلدانۋعا مىندەتتى تۇردە تارتۋ قاجەتتىگىن ايتتى.

ەلىمىزدە جاقسى داستۇرگە اينالعان ءارتۇرلى جاستاعى ادامدارعا ارنالعان بۇقارالىق مارافوندار مەن جارىستار تۋرالى ءبارى بىلەدى. سوڭعى جىلدارى بارلىق جەردە سپورت الاڭدارى مەن باسقا دا ءىرى وبەكتىلەر سالىنۋدا. ءبىز سپورتپەن شۇعىلداناتىن ادامداردىڭ سانى كۇننەن كۇنگە ارتىپ كەلە جاتقانىن كورىپ وتىرمىز. ۇيلەردىڭ اۋلالارىندا، سكۆەرلەردە جانە ساياباقتاردا ورناتىلعان ترەناجەرلاردى ەشكىمگە قاجەت ەمەس دەپ ساناعان سكەپتيكتەر دە از بولعان جوق، — دەدى ءاليحان سمايىلوۆ.

سونىمەن قاتار بۇقارالىق سپورتتى دامىتۋ بويىنشا ءتۇرلى باعدارلامالار مەن جوبالارعا قاراماستان، كوپتەگەن جۇيەلى ماسەلەلەر شەشىمىن تاپپاعىنىن اتاپ ءوتتى. ماسەلەن، اقپاراتتىق كەڭىستىكتى مونيتورينگتەۋ ناتيجەسىندە شىلدە ايىنىڭ وزىندە عانا وسى سالاداعى پروبلەمالارعا قاتىستى حالىقتان كوپ شاعىم تۇسەتىنى انىقتالدى.

مىسالى، پاۆلودار وبلىسى باياناۋىل اۋدانى مايقايىڭ كەنتىندە 2020 جىلى جوندەلگەن ستاديون قۇلاپ جاتىر. 3 جىل ىشىندە بۇل وبەكت جارامسىز بولىپ قالدى دەسە دە بولادى: فۋتبول الاڭى مەن جۇگىرۋ جولدارىنان باستاپ تريبۋنالار مەن كيىم اۋىستىراتىن بولمەلەرگە دەيىن جارامسىز كۇيگە تۇسكەن، – دەدى ءاليحان سمايىلوۆ.

سونداي-اق ول قاراعاندى وبلىسىنداعى شۇباركول كومىر ۆاحتالىق كەنتىندە سپورت زالى قيراپ قالعانىن اتاپ ءوتتى. ال اقتوبە وبلىسىنىڭ شيقۇدىق اۋىلىنداعى تەرەكتى مەكتەبىندە سپورتزال جوق.

بىزدە سپورت زالدارى جوق مەكتەپتەر تەك شاعىن اۋىلداردا عانا ەمەس، سونىمەن قاتار ءىرى قالالاردا ءالى دە كوپ. دەنە شىنىقتىرۋ مۇعالىمدەرى مەن كاسىبي جاتتىقتىرۋشىلار جەتىسپەيدى، — دەدى پرەمەر-مينيستر.

سونىمەن قاتار ءاليحان سمايىلوۆ استاناداعى ۇلتتىق سپورت ۋنيۆەرسيتەتىنىڭ جانە الماتى وبلىسىنداعى وليمپيادالىق دايارلىق ورتالىعىنىڭ قۇرىلىسى ۇزاققا سوزىلىپ كەتكەنىنە جۇرتشىلىقتىڭ نارازى ەكەنىن باسا ايتتى.

سپورتتى دامىتۋ جانە سالاماتتى ءومىر سالتىن ناسيحاتتاۋ باعىتىندا ءبىز اۋقىمدى جۇمىستار جۇرگىزىپ كەلەمىز، الايدا، كەيبىر ماسەلەلەر بويىنشا ءبىر ورىندا تۇرىپ قالدىق. وكىنىشكە قاراي، بىزدە دەنە شىنىقتىرۋ مەن سپورتتى باسقارۋدىڭ ءتيىمدى ءبىرتۇتاس جۇيەسى جوق. بۇل ماسەلە، اسىرەسە جەرگىلىكتى جەرلەردە وتە وزەكتى. سپورتتى جانە سالاماتتى ءومىر سالتىن ناسيحاتتاۋمەن اينالىساتىن مەملەكەتتىك ورگاندار مەن وزگە دە ۇيىمداردىڭ قىزمەتىن ۇيلەستىرۋ جۇمىستارىندا كەمشىلىك كوپ، — دەپ اتاپ ءوتتى ۇكىمەت باسشىسى.

وسىعان بايلانىستى ۇكىمەت دەنە شىنىقتىرۋ مەن سپورتتى دامىتۋدىڭ 2023-2029 جىلدارعا ارنالعان تۇجىرىمداماسىن بەكىتتى. ونىڭ اياسىندا 2030 جىلعا قاراي حالىقتىڭ 50%-ىن دەنە شىنىقتىرۋعا جانە سپورتپەن شۇعىلدانۋعا تارتۋ مىندەتى تۇر. وسىعان بايلانىستى ءاليحان سمايىلوۆ سالالىق مينيسترلىك پەن اكىمدىكتەرگە وسى باعىتتاعى جۇمىستى كۇشەيتۋدى تاپسىردى.

سونىمەن قاتار پرەمەر-مينيستر جۇمىس ىستەپ تۇرعان سپورت نىساندارىنىڭ ينۆەنتاريزاتسياسىن اياقتاپ، ولاردىڭ قاجەتتىلىكتەرىن ايقىنداۋدىڭ ماڭىزدىلىعىن اتاپ ءوتتى.

ءبىز ءارى قاراي جۇمىس ىستەۋگە قاي نىساننىڭ مۇمكىندىگى بار ەكەنىن، قايسىسى كۇردەلى جوندەۋدى قاجەت ەتەتىنىن، قانشا سپورتتىق قۇرال-جابدىقتار قاجەت ەكەنىن ناقتى ءبىلۋىمىز كەرەك، — دەدى ول.

ۇكىمەت باسشىسى سونداي-اق وڭىرلەردە ساياباقتاردى، كوشەلەردى، جاعالاۋلار مەن تۇرعىن ءۇي اۋلالارىن ترەناجەرلارمەن، سپورت الاڭدارىمەن جابدىقتاۋعا ەرەكشە نازار اۋدارۋدى تالاپ ەتتى.

ءسوز سوڭىندا ءاليحان سمايىلوۆ مادەنيەت جانە سپورت، عىلىم جانە جوعارى ءبىلىم، وقۋ-اعارتۋ مينيسترلىكتەرى الەمدىك تاجىريبەنى ەسكەرە وتىرىپ، دەنە شىنىقتىرۋ جاتتىقتىرۋشىلارى مەن مۇعالىمدەرىن دايارلاۋ جۇيەسىن قايتا قاراۋدى تاپسىردى.

 

داستان كەنجالين،

استانا