Áıgili qaqpashy Býffon fýtbolmen qoshtasty (FOTO, VIDEO)

in Basty taqyryp, Fýtbol 03.08.2023 0 16 ret oqyldy

Italııanyń ataqty golkıperi Djanlýıdjı Býffon 45 jasynda fýtboldaǵy mansabyn aıaqtady. Bul týraly ol Instagram paraqshasynda jazdy.

Al jigitter, osymen boldy! Sender maǵan bárin berdińder, men de senderge bárin berdim. Biz ony birge jasadyq, — dedi Býffon.

Djanlýıdjı Býffon 1978 jyly Italııanyń Toskana oblysynyń Kararra qalasynda týǵan. Ol eresekter komandasyna erte kelgen.

1995 jyly 17 jasynda «Parma» klýbynda oınaı bastaǵan. Bul komandanyń qaqpasynda 2001 jylǵa deıin turyp, sol jyldan bastap 2018 jylǵa deıin Týrınniń «Iýventýs» klýbynyń qaqpasyn qorǵaǵan. Odan keıin 2018-2019 jyldary Franııanyń «Parı Sen-Jermen» jasaǵynyń jeıdesinde alańǵa shyqqan.

Býffon mansabynyń sońyna deıin «Parma» klýbynda oınaǵan. Bul komandanyń qaqpasyn 2021 jyldan beri kúzetip keldi. Osy ýaqytta ol 44 matchta «parmalyqtardyń» jeıdesin kıip kórgen.

Áıgili golkıper ulttyq quramaǵa 1995 jyly shaqyrylǵan. Sodan beri ol bes álem chempıonatyna, atap aıtqanda 1998, 2002, 2006, 2010 jáne 2014 jyldary bolǵan mýndıaldarǵa qatysqan. Al 2006 jyly Germanııada álem chempıony bolyp, týrnırdiń eń úzdik qaqpashysy atanǵan. Býffon ulttyq quramada 2018 jylǵa deıin oınap, álemdik fýtboldyń rekordshy-qaqpashylarynyń biri boldy.

Dýman AMANJOLULY,

ALMATY