«استانا» تۇڭعىش رەت ەۋروپا ليگاسىنىڭ پلەي-وفف كەزەڭىنە شىقتى

بۇگىن چەحيانىڭ پراگا قالاسىندا «سلاۆيا» مەن «استانا» كلۋبتارى كەزدەستى. بۇل ماتچتا بۇكىل ەلدىڭ ءۇمىتىن ارقالاپ بارعان «استانانىڭ» ويىنشىلارى الاڭ يەلەرىن 1:0 ەسەبىمەن جەڭىپ، تۇڭعىش رەت ەۋروپا ليگاسىنىڭ 1/16 فينالىنا شىقتى.

ماتچتا جالعىز دوپتى بوسنيالىق مارين انيچيچ سوقتى. ول ويىننىڭ 38-مينۋتىندا پراگالىق قورعاۋشىلاردىڭ قاتەلىگىن ۇتىمدى پايدالانىپ، دوپتى بوس قاقپانىڭ تورىنا توعىتتى.

ءبىرىنشى تايمنىڭ باسىندا دا سوڭىندا دا استانانىڭ» گول سوعۋعا بىرنەشە مۇمكىندىگى بولعان ەدى. الايدا، «سلاۆيا» گول جىبەرىپ العان سوڭ قورعانىستا تاس قامالداي جاتىپ الىپ، قارسىلاستارىن ايىپ دوپ الاڭىنا جاقىنداتپاي قويدى.

ەكىنشى تايم چەحتاردىڭ باسىمدىعىمەن ءوتتى. ولار ويىننىڭ ەكىنشى جارتىسى باستالىسىمەن وتانداستارىمىزدىڭ قاقپاسىن ءجيى شابۋىلداپ، گول سوعۋعا جانتالاستى. «استانا» بولسا ساۋاتتى قورعانىپ، قارسى شابۋىلدار جاساپ وتىردى. جالپى، ويىن وتە تارتىستى جانە قىزىقتى ءوتتى. «استانانىڭ» ويىنشىلارى ماتچ باستالار الدىندا الاڭ يەلەرىن جەڭەمىز دەگەن ۋادەسىندە تۇرىپ، باس جاتتىقتىرۋشى ستانيمير ستويلوۆتىڭ سەنىمىن اقتاپ شىقتى. «استانا» ەۋروپا ليگاسىنىڭ «ا» توبىندا ەكىنشى ورىنمەن پلەي-وفف كەزەڭىنە جولداما الدى. قۇتتى بولسىن، اعايىن! جەڭىستى كۇندەرىمىز كوپ بولسىن!

قازىرگى كەزدە «استانا» قازاق فۋتبولىنىڭ فلاگمانىنا اينالىپ وتىر. بۇل قازاق سپورتىنىڭ ورتاق قۋانىشى. بۇل ءبىزدىڭ ورتاق جەڭىسىمىز!

داستان كەنجالين