«Astana» tuńǵysh ret Eýropa lıgasynyń pleı-off kezeńine shyqty

Búgin Chehııanyń Praga qalasynda «Slavııa» men «Astana» klýbtary kezdesti. Bul matchta búkil eldiń úmitin arqalap barǵan «Astananyń» oıynshylary alań ıelerin 1:0 esebimen jeńip, tuńǵysh ret Eýropa lıgasynyń 1/16 fınalyna shyqty.

Matchta jalǵyz dopty bosnııalyq Marın Anıchıch soqty. Ol oıynnyń 38-mınýtynda pragalyq qorǵaýshylardyń qateligin utymdy paıdalanyp, dopty bos qaqpanyń toryna toǵytty.

Birinshi taımnyń basynda da sońynda da Astananyń» gol soǵýǵa birneshe múmkindigi bolǵan edi. Alaıda, «Slavııa» gol jiberip alǵan soń qorǵanysta tas qamaldaı jatyp alyp, qarsylastaryn aıyp dop alańyna jaqyndatpaı qoıdy.

Ekinshi taım chehtardyń basymdyǵymen ótti. Olar oıynnyń ekinshi jartysy bastalysymen otandastarymyzdyń qaqpasyn jıi shabýyldap, gol soǵýǵa jantalasty. «Astana» bolsa saýatty qorǵanyp, qarsy shabýyldar jasap otyrdy. Jalpy, oıyn óte tartysty jáne qyzyqty ótti. «Astananyń» oıynshylary match bastalar aldynda alań ıelerin jeńemiz degen ýádesinde turyp, bas jattyqtyrýshy Stanımır Stoılovtyń senimin aqtap shyqty. «Astana» Eýropa lıgasynyń «A» tobynda ekinshi orynmen pleı-off kezeńine joldama aldy. Qutty bolsyn, aǵaıyn! Jeńisti kúnderimiz kóp bolsyn!

Qazirgi kezde «Astana» qazaq fýtbolynyń flagmanyna aınalyp otyr. Bul qazaq sportynyń ortaq qýanyshy. Bul bizdiń ortaq jeńisimiz!

Dastan KENJALIN