XIX ازيا ويىندارى: سپورتشىلارعا بەرىلەتىن سىياقى مولشەرى جاريالاندى

تۋريزم جانە سپورت مينيسترلىگى الداعى جازعى ازيا ويىندارىندا جۇلدە العان سپورتشىلار مەن ولاردىڭ جاتتىقتىرۋشىلارىنا اقشالاي ىنتالاندىرۋ مولشەرىن جاريالادى.

ازيا ويىندارىنىڭ چەمپيونى اتانعان سپورتشىعا 10 000 اقش دوللارى كولەمىندە اقشالاي سىياقى بەرىلەدى. ال، التىن مەدال يەگەرىن جارىسقا دايىنداعان جاتتىقتىرۋشىعا 5000 اقش دوللارى قاراستىرىلىپ وتىر.

ازيا ويىندارىنىڭ كۇمىس جۇلدەگەرى 5000 اقش دوللارى، ال جاتتىقتىرۋشىسى 3000 اقش دوللارى كولەمىندە سىياقى الادى. سونداي-اق، قولا مەدال ەنشىلەگەن قۇراما سپورتشىسىنا 3000 اقش دوللارى، ال ونىڭ جاتتىقتىرۋشىسىنا 2000 اقش دوللارى كولەمىندە اقشالاي ىنتالاندىرۋ بەلگىلەنگەن، — دەدى تۋريزم جانە سپورت مينيسترلىگىنىڭ رەسمي وكىلى ءمولدىر ابدۋاليەۆا.

ازيا ويىندارى قىتايدىڭ حانچجوۋ قالاسىندا 23 قىركۇيەك پەن 8 قازان ارالىعىندا وتەدى. ءوز تاريحىندا 29-شى مارتە جالاۋىن كوتەرەتىن ازيا ويىندارىندا 40-تان استام سپورت تۇرىنەن جۇلدەلەر ساراپقا سالىنادى. قۇرلىق بىرىنشىلىگىنە 45 مەملەكەت قاتىسادى دەپ جوسپارلانىپ وتىر.

ازيا ويىندارىنا قاتىساتىن ۇلتتىق قۇراما جاساقتالىپ، ەلىمىزدىڭ ءار وڭىرىندە وقۋ-جاتتىعۋ جيىندارىن وتكىزىپ جاتىر. سپورتشىلارىمىز جاقىن كۇندەرى قىتايعا اتتانادى، — دەدى مينيسترلىكتىڭ رەسمي وكىلى.

بۇگىن قازاقستان بوكس فەدەراتسياسى پرەزيدەنتى كەڭەس راقىشەۆ تا قىتايدىڭ حانچجوۋ قالاسىندا وتەتىن ازيا ويىندارىندا جۇلدە العان ايەلدەر قۇراماسىنا سىياقى تاپسىراتىنىن ايتتى.

ونىڭ ايتۋىنشا، التىن مەدال ءۇشىن چەمپيوندار 50 مىڭ اقش دوللارىن، كۇمىس جۇلدەگەرلەر 30 مىڭ اقش دوللارىن، قولا مەدال ءۇشىن 10 مىڭ اقش دوللارىن الادى.