اسەم ورىنباي مەن ەدۋارد ەششەنكو – ازيا ويىندارىنىڭ چەمپيونى!

قىتايدىڭ حانچجوۋ قالاسىندا ءوتىپ جاتقان ءحىح جازعى ازيا ويىندارىندا اسەم ورىنباي مەن ەدۋارد ەششەنكو ستەندتىك اتۋ ءتۋرنيرىنىڭ ارالاس جۇپتىق سايىسىندا التىن مەدال جەڭىپ الدى. «سكيت» جاتتىعۋىنىڭ فينالىندا ۇلتتىق قۇراما سپورتشىلارى كۋۆەيتتىك مەرگەندەر – ەمان ءالشاماا مەن ابدۋللا ءال-راشيديدەن باسىم ءتۇستى. قورىتىندى ەسەپ –40:35.

قاتار قۇراماسى باحرەيننەن باسىم ءتۇسىپ، قولا مەدال الدى. ەكىنشى قولا قىتاي سپورتشىلارىنا بۇيىردى.

ءسال ەرتەرەك اسەم مەن ەدۋارد ىرىكتەۋدە 148 ۇپاي جيناپ، ەكىنشى ورىنمەن فينالعا جولداما العان بولاتىن.

ءبىزدىڭ مەرگەندەر تاعى دا كەرەمەت ناتيجە كورسەتتى. سپورتشىلاردى، جانكۇيەرلەردى جانە ارينە، كوماندانىڭ جاتتىقتىرۋشىلار شتابىن وسى جەڭىسپەن قۇتتىقتايمىن! بۇكىل ەل مەرگەندەرىمىزبەن ماقتانادى. بۇل جەڭىس مىڭداعان قازاقستاندىق جەتكىنشەكتەردى وسى سپورت تۇرىمەن اينالىسۋعا شابىتتاندىراتىنىنا سەنىمدىمىن، — دەدى تۋريزم جانە سپورت ءمينيسترى ەرمەك مارجىقپاەۆ.

اسەم ورىنباي مەن ەدۋارد ەششەنكو وسىعان دەيىنگى بىرقاتار حالىقارالىق باسەكەدە بىرگە ءساتتى ونەر كورسەتىپ، ەلىمىزگە تاريحي جۇلدە سىيلاپ ۇلگەردى. اتاپ ايتار بولساق، بيىل مامىردا الماتىدا وتكەن رەيتينگتىك الەم كۋبوگىندا ولار كۇمىس جۇلدەگەر اتاندى. سوسىن، جازدا يتالياداعى الەم كۋبوگىندا ارالاس جۇپتار اراسىندا ءۇشىنشى ورىن العان.

ال بىلتىر قازان ايىندا حورۆاتيانىڭ وسيەك قالاسىنداعى الەم چەمپيوناتىندا اسەم ورىنباي مەن ەدۋارد ەششەنكو سكيت باعدارلاماسىندا قولا جۇلدەنى يەلەنگەن.

بۇل — ەلىمىزدىڭ ۇلتتىق قۇراماسىنىڭ ازياداداعى ءۇشىنشى التىن جۇلدەسى. بۇعان دەيىن اسەم ورىنباي، زويا كراۆچەنكو جانە ولگا پانارينادان جاساقتالعان قازاقستاننىڭ ايەلدەر كومانداسى «سكيت» جاتتىعۋىندا التىن مەدال جەڭىپ الىپ، ازيا ويىندارىنىڭ رەكوردىن جاڭارتتى. ال جەكەلەي سىندا اسەم ورىنباي قولا جۇلدەگە يە بولدى.

ەسكە سالساق، حانچجوۋداعى ازياداعا قازاقستاننان سپورتتىڭ 30 تۇرىنەن 524 سپورتشى (262 ەر جانە 262 ايەل) قاتىسىپ جاتىر. ونىڭ 27-ءسى وليمپيالىق باعدارلاماعا كىرسە، قالعان 3-ءى وليمپيالىق ەمەس سپورت تۇرلەرى. سونىمەن قاتار، ازيادادا 8 سپورت تۇرىنەن، اتاپ ايتقاندا، بوكس، ساداق اتۋ، قازىرگى بەسسايىس، ءجۇزۋ، برەيكينگ، كوگالداعى حوككەي، تەننيس جانە جەڭىل اتلەتيكا بويىنشا پاريج وليمپياداسىنا  ليتسەنزيالار ساراپقا سالىنادى.

جالپى العاندا، ازيانىڭ 45 ەلىنەن 15 مىڭنان استام سپورتشى 40 سپورت تۇرىنەن 481 مەدال جيىنتىعىنا تالاسىپ جاتىر.

شامكەن بايىربەك،

حانچجوۋ

فوتو: تۋريزم جانە سپورت مينيسترلىگى