قازاقتىڭ قارىمدى قالامگەرىنىڭ حاتى

بۇگىن الماتىداعى ۇيدە اكەمنىڭ قاعازدارىن قاراپ وتىرىپ، جوعارىدا سۋرەتى كورسەتىلگەن مىنا حاتتى كورىپ، وقىرمانمەن ءبولىسۋدى ءجون كوردىم.

بۇل حاتتى قازاقتىڭ ايگىلى جازۋشىسى، دراماتۋرگ، سىنشى، مەملەكەت جانە قوعام قايراتكەرى عابيت مۇسىرەپوۆ حالقىمىزدىڭ تاعى ءبىر اردا ۇلى، جازۋشى، عالىم، جۋرناليست اقسەلەۋ سەيدىمبەككە جازعان ەكەن.  عابەڭ حاتتى 1985 جىلى سول كەزدە «سوتسياليستىك قازاقستان» گازەتىندە قىزمەت ەتىپ جۇرگەن جۋرناليست ىنىسىنە جازعان. حاتتا اتاقتى عالىمنىڭ سپورتقا دەگەن قىزىعۋشىلىعىن، گازەتتە سپورت تاقىرىبىندا جاريالانعان ماقالالاردى قىزىعا دا قۇنىعا وقىپ جاتقانىن كورۋگە بولادى.

وندا بىلاي دەلىنگەن: «اقسەلەۋ! تەلەفونمەن قولعا تۇسە قويمادىڭ. 15-ءىى-83 كۇنگى سوتس.ق.دا باسىلعان گۇلنار ساحاتوۆا دەگەن شاحماتشى قىزىمىز جايىنداعى وچەركتەرىڭىز ماعان قاتتى ۇنادى. گۇلناردىڭ فوتوسىن بۇرىن ءبىر كەسىپ الىپ، شىنىعا قىستىرىپ قويعان روزا يمانباەۆا دەگەن كونكيشى قىزىم بولۋشى ەدى، سونىڭ قاسىنا قىستىرىپ قويدىم.

مۇمكىن بولسا سول روزا جايىندا ءبىر وچەرك جاريالاماسسىزدار ما ەكەن؟

سالەممەن (عابيت مۇسىرەپوۆتىڭ قولى قويىلعان)»

15.ءىى.83

ويدان وي شىعادى دەمەكشى، قازىر وسى ءبىر جاپىراق قاعازدى قولىما ۇستاپ، اكەم ونى ۇيدە نە ءۇشىن ساقتاعانىن ويلاپ وتىرمىن. بىردەن ويعا كەلگەنى، اكەم سول جىلى «سوتسياليستىك قازاقستاندا» جۇمىس ىستەگەن. 1981 جىلى س.م.كيروۆ اتىنداعى قازاق مەملەكەتتىك ۋنيۆەرسيتەتىن لەنيندىك ستيپەنديات اتانىپ بىتىرگەن سوڭ، 1986 جىلعا دەيىن «سوتسياليستىك قازاقستان» («ەگەمەن قازاقستان») گازەتىندە ءتىلشى، ودان كەيىن ءبولىم مەڭگەرۋشىسى بولعان. اكەم ءوزى قانداي دا ءبىر ىسكە مىعىم بولسا قۇجاتقا دا وتە تياناقتى بولاتىن. وسى حاتتى اقاڭ وزىنە كورسەتكەن بولۋ كەرەك. ءسويتىپ، اكەم ونى ءبىر پاپكانىڭ اراسىندا ۇستاپ، وزدەرىنىڭ جۇمىسىنا بەرىلگەن باعانى ساقتاعىسى كەلگەنى شىعار دەپ ويلايمىن.

داستان كەنجالين،

الماتى