SportPress.kz Qazaqstan sport jańalyqtary
Búgin Almatydaǵy úıde ákemniń qaǵazdaryn qarap otyryp, joǵaryda sýreti kórsetilgen myna hatty kórip, oqyrmanmen bólisýdi jón kórdim.
Bul hatty qazaqtyń áıgili jazýshysy, dramatýrg, synshy, memleket jáne qoǵam qaıratkeri Ǵabıt Músirepov halqymyzdyń taǵy bir arda uly, jazýshy, ǵalym, jýrnalıst Aqseleý Seıdimbekke jazǵan eken. Ǵabeń hatty 1985 jyly sol kezde «Soıalıstik Qazaqstan» gazetinde qyzmet etip júrgen jýrnalıst inisine jazǵan. Hatta ataqty ǵalymnyń sportqa degen qyzyǵýshylyǵyn, gazette sport taqyrybynda jarııalanǵan maqalalardy qyzyǵa da qunyǵa oqyp jatqanyn kórýge bolady.
Onda bylaı delingen: «Aqseleý! Telefonmen qolǵa túse qoımadyń. 15-II-83 kúngi So.Q.da basylǵan Gúlnar Sahatova degen shahmatshy qyzymyz jaıyndaǵy ocherkterińiz maǵan qatty unady. Gúlnardyń fotosyn buryn bir kesip alyp, shynyǵa qystyryp qoıǵan Roza Imanbaeva degen konkıshi qyzym bolýshy edi, sonyń qasyna qystyryp qoıdym.
Múmkin bolsa sol Roza jaıynda bir ocherk jarııalamassyzdar ma eken?
Sálemmen (Ǵabıt Músirepovtyń qoly qoıylǵan)»
15.II.83
Oıdan oı shyǵady demekshi, qazir osy bir japyraq qaǵazdy qolyma ustap, ákem ony úıde ne úshin saqtaǵanyn oılap otyrmyn. Birden oıǵa kelgeni, ákem sol jyly «Soıalıstik Qazaqstanda» jumys istegen. 1981 jyly S.M.Kırov atyndaǵy Qazaq Memlekettik ýnıversıtetin Lenındik stıpendıat atanyp bitirgen soń, 1986 jylǵa deıin «Soıalıstik Qazaqstan» («Egemen Qazaqstan») gazetinde tilshi, odan keıin bólim meńgerýshisi bolǵan. Ákem ózi qandaı da bir iske myǵym bolsa qujatqa da óte tııanaqty bolatyn. Osy hatty Aqań ózine kórsetken bolý kerek. Sóıtip, ákem ony bir papkanyń arasynda ustap, ózderiniń jumysyna berilgen baǵany saqtaǵysy kelgeni shyǵar dep oılaımyn.
Dastan KENJALIN,
ALMATY
