Karateshiler Azııa chempıonatynda 24 medal jeńip aldy

Almatyda WKF karateden jastar men jasóspirimder arasyndaǵy XXI Azııa chempıonaty máresine jetti. Bul jarysqa sary qurlyqtyń 30-ǵa jýyq elinen 600 tatamı sheberi qatysty, dep habarlady Týrızm jáne sport mınıstrligi.

Chempıonatta Qazaqstan sportshylary 8 altyn, 5 kúmis jáne 11 qola medal alyp, jalpykomandalyq esepte ekinshi orynǵa ıe boldy. Japonııa karateshileri 14 altyn, 5 kúmis, 4 qola medalmen kósh bastasa, úzdik úshtikti Iran (5 altyn, 6 kúmis, 11 qola) sportshylary túıindedi.

Jarystyń sońǵy kúnindegi kýmıte baǵdarlamasynda Dıas Anarbekov (+84 kg), Bıǵabyl Jolaman (55 kg), Aqnıet Sherızat (50 kg) pen Bella Shamasheva (55 kg) Azııa chempıony atansa, Asqar Saparǵalıev (87 kg) pen Daıana Darenskaıa (68 kg) fınalda qarsylastaryna ese jiberip, kúmis júldeni ıelendi. Al Nıkıta Tarnakın (84 kg), Nıkol engel (61 kg) men Venera Jaqsybaeva (+ 68 kg) qola júldege ıe boldy.

Jas karateshilerimizdiń Azııa chempıonatyndaǵy keremet jetistigi elimizde atalǵan sport túriniń qarqyndy damyp kele jatqanynyń aıqyn kórinisi. Bıyl karateshilerimiz halyqaralyq jarystarda óte sátti óner kórsetip jatyr. Máselen, elimizdiń eresekter quramasy Azııa oıyndarynda, álem chempıonatynda top jaryp, úzdikter qatarynan kórindi. Endi mine, jastarymyz qurlyq dodasynda óz myqtylyqtaryn dáleldedi. Bizdiń quramada osyndaı daryndy jas sportshylar ósip kele jatqany qýantady, — dedi Sport jáne dene shynyqtyrý isteri komıtetiniń tóraǵasy Erbol Myrzabosynov.

Búgin karateden eresekter arasyndaǵy Azııa ashyq chempıonaty bastaldy. Jarys 10 qarashaǵa deıin jalǵasady.