بوكسشىلاردىڭ جارىسقا دايىندىعىندا كەمشىلىك كوپ – مينيستر

مەملەكەت باسشىسىنىڭ تاپسىرماسىنا سايكەس، تۋريزم جانە سپورت ءمينيسترى ەرمەك مارجىقپاەۆ قىتايدا وتكەن ازيا ويىندارىنىڭ قورىتىندىسى بويىنشا فەدەراتسيالاردىڭ ەسەبىن تىڭداۋدى جالعاستىرىپ جاتىر، دەپ حابارلادى ۆەدومستۆو.

بۇل جولى ەلىمىزدەگى ەڭ تانىمال سپورت تۇرلەرى سانالاتىن بوكس پەن دزيۋدو فەدەراتسياسىنىڭ وكىلدەرى ەسەپ بەردى. جيىندا ولار سپورتشىلاردىڭ حانچجوۋداعى جارىس تۋرالى ايتىپ، كوڭىل كونشىتپەيتىن ناتيجە كورسەتۋىنىڭ سەبەپتەرىن باياندادى.

ەرمەك مارجىقپاەۆ بوكسشىلاردىڭ فيزيكالىق جانە فۋنكتسيونالدى دايىندىعىندا كەم تۇستار كوپ ەكەنىن، ايەلدەر بوكسىندا رەزەرۆتىڭ جوقتىعىن اتاپ ءوتتى.

ءبارىمىز 57 كەلى سالماقتا شارشى الاڭعا شىققان كارينا يبراگيموۆانىڭ فينالداعى، 71 كەلى سالماقتاعى اسلانبەك شىمبەرگەنوۆتىڭ جارتىلاي فينالدىق جەكپە-جەگىندە بولعان جاعداي تۋرالى جاقسى بىلەمىز. الايدا، بۇل كوماندانىڭ جالپى كورسەتكەن ناتيجەسىنە سەبەپ بولماۋعا ءتيىس. ءبىزدىڭ بوكسشىلار ەكىنشى راۋندتان كەيىن شارشاپ قالىپ جاتىر. فەدەراتسيانىڭ ۇسىنىسىمەن سپورتشىلاردىڭ فيزيكالىق دايىندىعىن جاقسارتۋ ماقساتىندا شەتەلدىك كەڭەسشى شاقىرىلعانىمەن، ناتيجە كوڭىلدەگىدەي بولماي شىقتى. ايەلدەر بوكسىندا رەزەرۆ جوق، ءبىر سپورتشى بارلىق تۋرنيرگە قاتىسىپ شىعادى، — دەدى تۋريزم جانە سپورت ءمينيسترى.

سونىمەن قاتار ەرمەك مارجىقپاەۆ دزيۋدو فەدەراتسياسىنىڭ ەسەبىن تىڭداپ، سپورتشىلاردىڭ ازيا ويىندارىندا جاقىن كورشىلەرىمىزدەن مەدال سانى بويىنشا دا، جەكە بەلدەسۋلەر بويىنشا دا ارتتا قالىپ قويعانىن ايتتى.

ءبىر عانا مىسال، قازاقستان ەرلەر قۇراماسىنىڭ بالۋاندارى حانچجوۋ تاتاميىندە تاجىكستان سپورتشىلارىمەن ءۇش رەت كەزدەسىپ، وكىنىشكە قاراي، سونىڭ ەكەۋىندە قارسىلاستارىنا جول بەرىپ قويدى. ازيادادا تاجىكستان مەن قىرعىزستان ءبىر-ءبىر التىن مەدال، وزبەكستان ءۇش التىن جۇلدەنى جەڭىپ الدى، — دەدى مينيستر.

ونىڭ ايتۋىنشا، كەيىنگى جىلدارى دزيۋدوشىلاردىڭ ناتيجەسى دە، دەڭگەيى دە قۇلدىراپ بارادى.

سوڭعى ونجىلدىقتا دزيۋدودان ۇلتتىق قۇراما سالىستىرمالى تۇردە ءبىر دەڭگەيدە ونەر كورسەتىپ كەلدى. ەلدوس سمەتوۆتىڭ جەتىستىكتەرى فەدەراتسيانى العا تارتتى. بىراق قازىر ونىڭ جاسىنا ساي كۇش-جىگەرى ازداپ سارقىلا باستاعاندا ۇلتتىق قۇرامانىڭ شىنايى دەڭگەيى بەلگىلى بولدى، — دەدى ەرمەك مارجىقپاەۆ.

جيىن سوڭىندا مينيستر وتكەن جارىستاردىڭ ناتيجەلەرىنە تەرەڭ تالداۋ جۇرگىزۋدى جانە سپورتشىلاردى الداعى پاريج وليمپياداسىنا تىڭعىلىقتى دايىنداۋ ءۇشىن كەشەندى جوسپار ازىرلەۋدى تاپسىردى.