تۇركىستاندا داڭقتى قولباسشىنى ەسكە الۋعا ارنالعان تۋرنير باستالدى

تۇركىستان قالاسىنداعى Olympic center سپورت كەشەنىندە كەڭەس وداعىنىڭ باتىرى، گەنەرال-مايور سابىر راحىموۆتى ەسكە الۋعا ارنالعان ەركىن كۇرەستەن جانە ايەلدەر كۇرەسىنەن XXVII حالىقارالىق تۋرنير باستالدى، دەپ حابارلادى تۇركىستان وبلىسى اكىمىنىڭ ءباسپاسوز قىزمەتى.

وبلىس اكىمدىگىنىڭ حابارلاۋىنشا، جىل سايىن ءداستۇرلى تۇردە وتەتىن كۇرەس دوداسىنا بيىل ەلىمىزدىڭ بارلىق وڭىرلەرىمەن قاتار كورشىلەس وزبەكستان، قىرعىزستان مەملەكەتتەرىنەن 24 كوماندا، 454 بالۋان قاتىسىپ، بوز كىلەم كوركىن قىزدىرۋدا.

تارتىسقا تولى سايىستا 2004-2006 جىلى تۋعان ورەندەر 21 سالماق دارەجەسىندە جەڭىمپازدى انىقتايدى. ونىڭ ىشىندە ۇلدار 11 سالماقتا بەلدەسسە، قىزدار 10 سالماق دارەجەسىندە باق سىنايدى، — دەلىنگەن حابارلامادا.

حالىقارالىق كۇرەس ءتۋرنيرىنىڭ اشىلۋ سالتاناتىنا تۇركىستان وبلىسىنىڭ دەنە شىنىقتىرۋ جانە سپورت باسقارماسى باسشىسىنىڭ ورىنباسارى جازيرا مۋسليموۆا مەن تۇركىستان وبلىسى ءماسليحاتىنىڭ توراعاسى نۇرالى ءابىشوۆ قاتىسىپ، سپورتشىلارعا ساتتىلىك تىلەدى.